كلام في السيكو سيكو: ضع علامة صح أو غلط أمام العبارة الآتية
كتب: أحمد حسين
مرة في الجامعة كنت بتكلم أنا وواحد صاحبي في موضوع ما. صاحبي كان عنده وجهة نظر علميًا ومنطقيًا غلط لكنه كان مقتنع بيها وبينظّر ليها كمان. بس طبعًا الكلام اللي له علاقة بأي حاجة جنسية مابيتقالش في العلن غالبًا وبيتقال في قعدات خاصة بين الصُحاب. بس الحقيقة إن كتير من الكلام في مسائل السيكو سيكو دي فيه أخطاء كتير متناقلة، وساعات بيكون فيه معلومات صحيحة لكنها بتضيع وسط الكلام الكتير الغلط. فإحنا هنعمل إيه.. هنعمل quiz امتحان صغير كده نختبر فيه معلوماتنا. نقول الجملة وتقولوا صح ولا غلط بس ماتغشوش. وأهو كله لمصلحتك ومصلحة الإنسان والإنسانية بشكل عام.
اختبر معلوماتك الجنسية
–لو ماستعملتوش هتخسره.. صح ولا غلط؟
أيوه إنتوا فهمتوا صح، ده اللي أقصده مش إفيه لعادل إمام ولا إفيه لشخصية كوميدية في فيلم لعادل إمام برضه. في مثل أمريكي بيقول: “if you doesn’t use it, you’ll lose it”، والكلام ده علميًا صح، لأن انتصاب القضيب بيساعد في الحفاظ على صحة الأعصاب الموجود في القضيب، وبيساعد كمان على منع ضعف الانتصاب. طبعًا هنا نقصد الانتصاب بشكل عام سواء هيكون في علاقة جنسية أو لأ.
– الستات بتحتاج للجنس أكتر في فترة التبويض.. صح ولا غلط؟
الحقيقة إنه صح، تأرجح نسبة الهرمونات والدوّامة الهرمونية اللي الست بتدخل فيها في الوقت ده، بتزوّد من شهوتها تجاه الجنس، ده طبعًا مش بالضرورة يتترجم لأي حاجة، هي بس هيكون عندها رغبة أكبر في الفترة دي.
– ممارسة العادة السرية بشكل دوري يفقد الراجل حيواناته المنوية.. صح ولا غلط؟
غلط بشكل واضح، العادة السرية مالهاش علاقة بجفاف الحيوانات المنوية، ولا بتسبب العمى ولا حاجة. دي مجرد أساطير بتتناقلها الأجيال، والأبحاث العلمية الجديدة وجدت أن ممارسة العادة السرية مالهاش أثار سيئة على الصحة، إلا لو تحولت لاضطراب بحيث إن الشخص مابقاش يستمتع غير بيها وكمان بتأثر على حياته سواء العامة أو الجنسية.
– الرجالة بيستمتعوا بالجنس الفموي أكتر من الستات.. صح ولا غلط؟
إيه ده هو إحنا عندنا جنس فموي؟ الحقيقة آه، والحقيقة إن في ناس عارفين إنه آه وعاملين إنهم مش عارفين إنه آه، وفي ناس عارفين بس بينكروا، وفي ناس مُستنكرين ده ودي مش قضيتنا. خلينا بس نقول يعني للناس اللي بيميلوا له، إن إجابة السؤال اللي فوق هي غلط. الستات بتستمتع بالجنس الفموي أكتر، حسب الموقع الطبي “WebMD“ والطبيب الأمريكي “ويليام بلاد”، في حين 10% فقط من الرجالة اللي ممكن يوصلوا للنشوة عن طريق الجنس الفموي مقابل 18% من السيدات.
– الستات ممكن يوصلوا للنشوة الجنسية المتعددة.. صح ولا غلط؟
صح، الستات عندها القدرة إنها توصل للنشوة الجنسية 3 و4 مرات مقابل مرة أو مرتين بس للراجل، بس في المقابل حوالي من 26% إلى 29% بس من الستات هما اللي ممكن يوصلوا للنشوة مع شريكهم، و8 من كل 10 ستات بس هما اللي بيوصلوا للنشوة المهبلية بحسب جريدة “Clinical Anatomy” في بحث أجرته سنة 2014.
في المقابل 75% من الرجالة بيوصلوا للنشوة مع شريكتهم، الفرق بين النسبتين واسع، والسبب في ده إن الوصول للنشوة عند الراجل ممكن ياخد حوالي 5 دقايق في مقابل من 10 إلى 15 دقيقة للست، أيوة في فرق في السرعات وههه وكده.
اعرف أكتر| الألم الجنسي: عندما يعترض الألم طريق النشوة
– ممكن حد يصاب بالعمى من المتعة.. صح ولا غلط؟
الكلام ده صح بس مش دقيق. في 2010 أقر خبر في أحد الجرايد الدنماركية بوجود راجل عنده 66 سنة أُصيب بعمى في عين واحدة بسبب احساس متعة شديد، طبعًا الأمر ده نادر جدًا، بس ممكن يحصل بشكل أقل صعوبة، في حالة اسمها “Amaurosis Fugax” أو الكمنة العابرة بالعربي، الحالة دي ممكن تسبب عمى مؤقت يدوم من ثواني لدقائق قليلة في عين واحدة من الاتنين بعد الوصول للنشوة الجنسية، والسبب لحد دلوقتي مجهول بالنسبة للأطباء، لكنهم بيقترحوا إن له علاقة بتقلّص الأوعية الدموية في العين كرد فعل للنشوة.
– الرجالة بس هما اللي بيحتلموا (بيحلموا أحلام جنسية).. صح ولا غلط؟
غلط بس برضه مش دقيق أوي، الستات كمان بيحتلموا وبيحسوا بالنشوة، بس مش لازم يحصل عملية “قذف”. دكتور إيلين لان الطبيب النفسية بجامعة أمستردام، قالت إن ستات كتير ممكن يصحوا من النوم بعد حلم مثير حاسين بنفس الشعور اللي بيحسوا بيه بعد وصولهم للنشوة الجنسية.
– ممكن القضيب “يَعلَق” داخل المهبل في أثناء العملية الجنسية.. صح ولا غلط؟
الحقيقة صح، على الرغم من إن الأمر يبدو وكأنه في فيلم كوميدي للكبار فقط، بس بحسب دكتور جون دين طبيب الصحة الجنسية الإنجليزي للـBBC، قال إن الأمر بيحصل بس بشكل نادر نتيجة انقباض عضلات الحوض عند الست في أثناء الوصول للنشوة، فممكن ساعتها القضيب يلتصق ويَعلَق ويفضل مكانه، زي ما حصل _بحسب د/دين_ مع زوجين من إنجلترا راحوا المستشفى بسبب حادث زي ده.
– الـLove Bites مش مُضرّة.. صح ولا غلط؟
الحقيقة غلط، اللاف بايت ممكن تكون مؤذية وهنا إحنا نقصد الغشومية في التعامل زي ما البعض بيروّج إن اللاف بايت لازم تكون عنيفة. سنة 2010 في ست نيوزلندية راحت المستشفى بأزمة قلبية ومش قادرة تحرّك دراعها الشمال بسبب إن شريكها كان غشيم جدًا، واللي حصل إنه عضّ شُريان رئيسي قريب من الرقبة، فيعني الأفضل بلاش نتعامل تعامل دراكولا ده مع بعض، ده لمصلحتنا والله.
اعرف أكتر| عن مشاهدة الأفلام الإباحية: الـporn وعصور الخداع!
– تحاشى ممارسة الجنس وقت ما تكون عيان.. صح ولا غلط؟
الكلام ده غلط، بس برضه في بعض السياقات المحددة، إحنا هنا بنتكلم عن أمراض زي البرد والحُمّى، مابنتكلمش عن أمراض القلب وغيرها. بحسب جريدة “The Sun” الإنجليزية في دراسة أُجريت في الولايات المتحدة، والنتيجة كانت إن ممارسة الجنس بتزوّد نسبة الجلوبيولين المناعي أ واللي بيحفّز الجهاز المناعي للتخلص من الأمراض دي بسرعة أكبر.
في النهاية يعني، نتمنى نكون أضفنا معلومة أو صححنا معلومة عندكم. وفي سبيل إننا نحاول نختم الموضوع بخاتمة لطيفة، نحب نتمنى حياة سعيدة للمرتبطين وغير المرتبطين وبالتوفيق للجميع 😀
اعرف أكتر| حالات جنسية غير معتادة “بتحصل في أحسن العائلات”
