طباعة البيوت: إحنا مش هنبني بيوت، إحنا هنطبعها!
كتب: أحمد حسين
خلينا نكون واضحين، في أزمة سكن في العالم، وتحديدًا عندنا هنا على أرض الوطن. يعني، إحنا قولنا هنزرع الصحرا، وبعدين بقينا بنبني على الأراضي الزراعية نفسها قبل الصحرا.
رغم إننا قولنا إننا هنحافظ على الأراضي الزراعية _طبعًا طبعًا_ ومش هنعمل فيها حاجة علشان نزرع اللي ناكله وناكل اللي نزرعه وأشياء من هذا القبيل، فماعملناش كده خالص، وجرّفنا الأرض وبوّرناها علشان نبني عليها برضه. وبعد ده كله لسه فيه أزمة سكن.. وبتزيد مع ارتفاع أسعار العقارات!
الأزمة دي فعلًا مش عندنا وبس، في تقارير في الولايات المتحدة قالت إنهم لازم يبنوا حوالي 100 ألف بيت في اليوم، علشان البيوت تساوي عدد البشر اللي هيبقوا موجودين سنة 2050. ممكن نقول إن 2050 دي بعيدة شوية، لكن عمومًا اللي بيخطط للمدن مابيفكرش بالشكل ده، بل بيبقى همّه ينظم ويصمم كل شيء هيبقى موجود سنة 2050 في المدينة المراد بناءها.
الحل.. نطبع بيوت؟
شركة اسمها (World’s Advanced Saving Projects) أو اختصارًا (WASP)، أخدت خطوة تجاه حل الأزمة دي، عن طريق إنها تبنّت مشروع الطابعة ثلاثية الأبعاد القادرة على طباعة البيوت، واللي ممكن تطبع بيت حجمه مناسب تمامًا من الطين وبتمن قليل جدًا يكاد يكون شيء لا يُذكر.
الطابعة واللي أطلقوا عليها اسم (BigDelta)، طولها حوالي 12 متر وبتقدر تبني بيوت حوائطها طولها 4 متر، ودي تعتبر مساحة كافية جدًا لديكورات البيت، سواء بقى أبواب وشبابيك أو أي ديكورات ممكن تُضاف. خلونا نطلع من مساحة الإعلانات دي ونقول إن الطابعة بتقدر تبني في اليوم الواحد من 60 سم إلى متر، وبمواد زي طين التربة والقش والميّه فقط.
المشروع ده مستوحى من مشروع تاني لنفس الشركة عن بناء البيوت بالطين، بس الفرق إن المرة دي فكروا في إنه البيت تكون بالطباعة، والمزج بين التكنولوجيا والمواد الطبيعية زي الطين وجمعهم في مشروع عملاق في طابعة ثلاثية الأبعاد بتطبع بيوت.
الإيطالي ”ماسيمو موريتي“ واللي ابتكر الطابعة، قال إنهم فضّلوا الطين على الأسمنت، لأنه أفضل للبيئة وكمان تكلفته أقل ومتوفر أكتر من الأسمنت كمان. أضاف ماسيمو في كلامه إن التكنولوجيا دي هتساعد على توفير مجمّعات سكنية كبيرة لغير القادرين على امتلاك بيوت.
على حسب كلامه برضه، إنه بحلول سنة 2030 هيكون في 4 مليار شخص محتاجين بيوت، والـ4 مليار دول هيكون دخلهم أقل من 3000 دولار في السنة، وفي خلال الـ15 سنة اللي جايين، هيحتاجوا يبنوا حوالي 100 ألف بيت جديد علشان يوفروا احتياجات الـ4 مليار دول.
السنة اللي فاتت، شركة (WASP) كانت أعلنت عن النموذج البدائي من الطابعة ثلاثية الأبعاد (BigDelta)، بس طبعًا ماكانتش متطوّرة زي دي، وكان طولها حوالي 4 متر، يعنى يساوي طول الحيطة اللي تقدر تطبعها الطابعة الحالية.
الأزمة كلها دلوقتي في بداية تنفيذ المشروع، ماسيمو بيقول إنه محتاجين يبدأوا في أسرع وقت بعد ما يتأكدوا من اختبار أول بيت يطبعوه عن طريق الطابعة، لأن كل ما الوقت يمر، كل ما الموضوع هيبقى أصعب، والناس هتزيد والموضوع يكبر والعالم يتضخّم والكرة الأرضية تنفجر وكلام كبير كده.
المهم يعني إنه بقى في دلوقتي طابعة عندها القدرة على طباعة البيوت ونتمنى المشروع ده ينجح ويُطبق بشكل جيّد في العالم.
المصادر: wonderfulengineering inhabitat
