عملية الليزك: عن مميزاتها وعيوبها؟ وليه في ناس ماتقدرش تعملها؟

كتبت – يارا كمال

 كل يوم قبل ما ادخل انام بحسس على وشي عشان اقلع النضارة، وبعدين افتكر إني خلاص عملت الليزك وتخلصت من النضارة وإلى الأبد. الحقيقة ده شعور مبهج في حد ذاته، كفاية سنين المعاناة مع لبس النضارة، وضرورة وجود نضارتين عشان لو واحدة اتكسرت اعرف اروح البيت أصلًا.

إنما هو إيه الليزك ده؟ أظن كل اللي الناس تعرفه عنه إنه شعاع ليزر بنبص فيه وهو بيقوم بالواجب بقى، أو ده اللي الدكتور بيقولهولك عشان ماتتقفلش من العملية، وهي فعلًا بسيطة جدًا وبتاخد وقت قليل أوي (يعني حوالي 10 دقايق ببنج موضعي على هيئة قطرة).

بس صاحبتي لما جيت أعمل العملية دي نصحتني إني ما أفكرش أتفرج على فيديو للعملية عشان ما اتقفلش.

في الحقيقة، الليزك مش مجرد شعاع ليزر بس. وأنا في العملية كنت حاسة إن الدكتور بيستخدم أداة كده بيمسح بيها فوق عيني، بس وقتها طبعًا مفيش أي مجال إني أقفل عيني أو أعمل أي حركة تهور. بس الصراحة، بعد ما خرجت حسيت إن الموضوع كان بسيط أوي وإني كنت بأفور.

إيه هو الليزك ؟

الليزك (LASIK) اختصار لـ(Laser-assisted in-situ keratomileusis)، يعني التصحيح الموضعي لتحدب القرنية بمساعدة الليزر. الهدف من العملية دي هو تصحيح بعض مشاكل الرؤية وتقليل استخدام النضارة أو العدسات أو قلعهم خالص.

العملية دي بتغير شكل نسيج القرنية الشفاف في مقدمة العين، وده عشان أشعة الضوء اللي داخلة العين تتركز بدقة على الشبكية بدل ما تنزل قبل الشبكية أو بعدها. عشان نفهم أكتر، الليزك بتتعمل في حالة لو حد عنده قصر النظر أو بعد النظر أو الاستيجماتيزم.

قصر النظر (myopia) عبارة عن إن مقلة العين بتكون أطول شوية من الطبيعي أو لما القرنية تنحني بحدة، وبالتالي أشعة الضوء بتتركز قدام الشبكية وده بيخلي الرؤية البعيدة تبقى مشوشة، وبالتالي الواحد يشوف الحاجات القريبة واضحة، لكن الحاجات البعيدة لأ، زي ما تبقى قاعد في الفصل عارف تقرا اللي في الكتاب قدامك كويس، بس مش عارف تقرا اللي على السبورة.

طول النظر (hyperopia) ده بقى هتشوفه عند الناس اللي بتنزل النضارة شوية عن عينيها عشان بتعرف تشوف الحاجات البعيدة كويس بس مابتقدرش تشوف الحاجات القريبة. يعني ممكن يكون بيقرا حاجة بالنضارة بس عشان يبص لك بينزل النضارة لإنه مش محتاج يشوفك بيها.

وأحيانًا بتبقى الرؤية البعيدة والقريبة كمان مشوشين. وده لإن مقلة العين أقصر من المتوسط أو لإن القرنية مسطحة جدًا، وبالتالي الضوء بيتركز وراء الشبكية.

الاستيجماتيزم بقى إن القرنية تكون منحنية أو مسطحة بس بشكل مش منتظم. فالرؤية بتبقى مشوشة والصورة تفاصيلها مش واضحة. لو حابب تعرف أكتر عن الاستيجماتيزم ادخل هنا: ”الاستجماتيزم“ الحياة بقع ألوان سايحة من غير خطوط!

اللي بيحصل في عملية الليزك بقى إنه باستخدام يا إما مشرط القرنية المجهري الآلي (mechanical microkeratome) أو مشرط قرنية ليزري (laser keratome)، الدكتور بيعمل فتحة في القرنية بحيث تبقى طبقة معلقة من ناحية واحدة في العين، بحيث تبيّن اللي تحتها.

لما بنرفع الطبقة اللي اتفتحت دي، سدى القرنية (stroma) ودي الجزء الأوسط في القرنية بيبان. الجزء ده بقى اللي بنلعب فيه، بمعنى إن فيه نبضات ليزر (ليزر إكسيمر) بنتحكم فيها بالكمبيوتر بتبخر جزء من سدى القرنية بحيث تظبّط تحدب القرنية (الكيرف بتاعها يعني) والطبقة المرفوعة دي بترجع تاني.

الدكتور قبل ما يعمل العملية، بيقيس سمك القرنية وانكسار الضوء والرسم التفصيلي للقرنية وضغط الهوا واتساع حدقة العين. الخريطة المفصّلة دي هي اللي بتسمح له أثناء العملية إنه ينحت القرنية بشكل دقيق.

الليزك جميلة، وهتخلصك من مشاكل النضارة. فيه فيديو لطيف عن مشاكل النضارة. هو عن البنات بس إلى حد كبير يمشي بنات وولاد:

بس ده لا يمنع إن ليها عيوب. بس مبدئيًا خلينا في مميزاتها:

• الليزك هتصحح لك نظرك فعلًا. حوالي 96% من المرضى وصلوا للرؤية المطلوبة بعد العملية.
• قطرة التخدير كمان كافية أوي إنك تحس بألم بسيط جدًا أو ماتحسش بألم أصلًا (أنا شخصيًا ماحستش بحاجة) أثناء العملية.
• تصحيح النظر هيكون حصل يا إما بعدها علطول أو في نفس اليوم. أنا شخصيًا برضه خرجت من العملية وأنا شايفة كويس من غير نضارة.
• الموضوع مش محتاج إن العين تتغطى برباط أو ضمادة.
• ممكن يتعمل على العملية شوية تعديلات عشان لو حصلت اختلافات في النظر مع السن، عشان الرؤية تبقى مظبوطة تاني.
• بعد العملية، أغلب المرضى بيقل اعتمادهم على النضارات والعدسات بدرجة كبيرة وكتير منهم مابقاش يحتاجهم أصلًا.

فيه بقى عيوب أو مشاكل ممكن تحصل في العملية:

• ممكن الدكتور مايشيلش كل النسيج المفترض إزالته عشان يوصل للنتيجة المطلوبة، وبالتالي مش هنوصل لأفضل رؤية ممكنة، وده بيكون أكثر شيوعًا بين الناس اللي أصلًا عندهم قصر نظر، بس ملحوقة. ممكن تتعمل عملية تانية خلال سنة عشان نشيل الجزء اللي مكانش اتشال ده.
• أحيانًا بيحصل العكس. يعني الدكتور حف بزيادة، يعني الليزر شال نسيج كتير شوية. بس كون النسيج اتشال منه أكتر من المطلوب طبعًا أصعب في الحل من إنه ماتشالش منه بشكل كافي.
• ممكن النظر يرجع زي ما قبل العملية مع الوقت وبالتدريج، وده بيرجع لحالات معينة زي التئام الجرح بشكل مش طبيعي أو الاضطرابات الهرمونية أو الحمل.
• نادرًا، ممكن تتسبب العملية في فقدان النظر نتيجة المضاعفات الجراحية. وممكن ناس بعد العملية مايبقوش بيشوفوا بنفس الوضوح اللي كانوا بيشوفوا بيه قبل كده.
• لو الدكتور مش شاطر أو معندوش خبرة كافية، ممكن مايشيلش نسيج القرنية المطلوب بشكل منتظم، وده بيسبب استيجماتيزم، وبالتالي عشان نعالج المشكلة هنحتاج نعمل عملية تانية أو نلبس نضارة أو عدسات.
• بعد العملية، ممكن يبقى عندك صعوبة في الرؤية بليل، وممكن كمان تحس بتوهج الأضواء والحاجات وممكن تشوف هالة كده حوالين الأنوار الساطعة وممكن تعاني من الرؤية المزدوجة. ممكن كمان قدرتك على الرؤية في ضوء خافت (زي الرؤية في الشبورة) تقل عن ما قبل العملية.
• الليزك بتسبب جفاف في العين بشكل مؤقت بعد العملية لمدة حوالي ست شهور لحد ما العين تلتئم، وده ممكن يقلل جودة الرؤية، وبالتالي بتحتاج تاخد قطرات لترطيب العين بيكتب لك عليها الدكتور.
• الطبقة اللي بتترفع من العين عشان العملية تتم في الجزء اللي تحتها، ممكن رفعها أو تنيها أو إزالتها يسبب مضاعفات زي العدوى وزيادة الدموع والالتهاب. ممكن كمان الطبقة الخارجية من القرنية (الظهارة) تنمو بطريقة غير طبيعية تحت الطبقة اللي كانت مرفوعة أثناء الالتئام.

ليه في ناس ماينفعش يعملوا عملية الليزك؟

عمومًا فيه حالات معينة لا يُستحب معاها العملية دي لإنها ممكن تزوّد المشاكل الناتجة عن العملية:

• اضطرابات المناعة الذاتية زي التهاب المفاصل الروماتيدي.
• حالات نقص المناعة بسبب تناول أدوية تثبيط المناعة أو الإصابة بفيروس (HIV) اللي بيسبب مرض الإيدز.
• جفاف العين المستمر.
• الرؤية غير المستقرة بسبب أدوية أو تغيرات هرمونية أو الحمل أو الرضاعة أو السن.
• حالات كتيرة للعين زي القرنية المخروطية والتهاب القرنية والتهاب العنبية والهربس البسيط اللي بيأثر على منطقة العين والميه البيضا والميه الزرقا وإصابات العين واضطرابات الجفن.

وفي حالة إن نظرك أصلًا كويس بشكل عام أو بؤبؤ عينك كبير أوي أو القرنية عندك رفيعة أوي أو لو عندك تغيرات في نظرك نتيجة السن ممكن تقلل وضوح الرؤية أو بتمارس رياضة فيها احتكاك جسدي كتير زي إنك تكون ملاكم، فالمنافس ممكن يديك بالبوكس في عينك اللي عامل فيها العملية، يستحسن ماتعملش العملية.

يُفضل برضه لو إنت في أوائل العشرينات أو أصغر، يعني كشف النضارة بتاعك لسه بيتغيّر، تستنى شوية على  قرار الليزك ده. يمكن ناس تعتبر العملية دي رفاهية. هي صحيح النضارة والعدسات يغنوا عنها، بس برضه العدسات في بلدنا مع التلوث والتراب ممكن تتعب العين، وفيه ناس بيزهقوا من النضارة أو مابيحبوش شكلهم بيها. وفي كل الأحوال هو ده دور العلم، إنه يسهل حياتنا وينهي معاناتنا أيًا كانت.

المصادر:  mayoclinic.org  webmd  aao.org  fda.gov  fda.gov2