غير مصنفنوّرها

فوائد الثوم: سلاحك القاتل في مواجهة المخاطر

كتبت: مها طــه

من أول ما بدأ شهر أبريل وإحنا شايفين وشامين وحاسين بالثوم في كل مكان. تبقى قاعد في شغلك عادي، وتشم فجأة ريحة نفاذة تقلب المكان، تفكر تخرج البلكونة تلاقي جارتكم بتعلق حوالي 120 راس ثوم كده في البلكونة بتاعتها. تنزل الشارع وإنت مروح تلاقي عربية محملة ثوم على الدائري وقالبة ريحة المكان. وهنا بقى بيظهر السؤال “إيه اللي بيحصل يا جماعة؟ هو إحنا مهددين بغزو من مصاصي الدماء قريب ولا حاجة؟ فقررنا نتسلح ولا مصر قررت تدخل موسوعة جينيس بتحضير أكبر طبق ملوخية في العالم و لا إيه مش فاهمة.

الثوم دواء لكل داء واسأل الفراعنة

الثوم واحد من أكتر النباتات المنتشرة في العالم كله. وييعتبر واحد من أفراد عائلة عريقة معروفة بريحتها النفاذة واللي بينتمي ليها البصل والكراث وغيرهم. الاعتقاد السائد بيقول إن الثوم في الأصل من سيبريا، وعلى مدار 5000 سنة قدر ينتشر للعالم كله وبقى واحد من أشهر النباتات الطبية واللي بتدخل كمان في الأكل وليها استخدامات كتير مش ممكن تخطر لك على بال.

كتير من الحضارات الكبرى في العالم اتكلمت عن فوايد الثوم، زي الحضارة المصرية القديمة والبابلية واليونانية والرومانية والصينية، كل الحضارات دي سجلت في تاريخها إن الثوم نبات طبي بيستخدم في علاج عدد من الأمراض نظرًا لخصائصه الطبية الفريدة من وجهة نظرهم وقتها.

صورة: Must Küüslauk

حاليًا بقى العلماء قدروا يفسروا السبب ورا الاعتقاد التاريخي بإن الثوم له فوايد طبية، وده بعد ما اكتشفوا إن مركبات الكبريت الموجودة في الثوم واللي بتخرج منه لما يتم تقطيعه أو فرمه هي المسئولة عن الفوايد الطبية دي كلها.

مركب الكبريت الأشهر في الثوم هو “الأليسين” لكنه مركب غير مستقر بيفضل لفترة قصيرة قبل ما ينحل، وعشان كده بيكون موجود بس في الثوم الطازج وهو السبب في ريحته القوية والنفاذة. بمجرد ما بتدخل مركبات الكبريت الموجودة في الثوم للجسم وتحديدًا الجهاز الهضمي، بتبدأ تتنقل كل الفوايد اللي هنتكلم عنها دي وتحقق أثرها الكبير.

الثوم له أثر مناعي

صورة: Daily Express

في دراسة كبيرة تم إجرائها لمدة 12 أسبوع لدراسة تأثير المكملات الغذائية المحتوية على الثوم، توصل العلماء إلى إنها بتقلل من نسبة الإصابة بنزلات البرد بنسبة 62%. أما في حالة الإصابة بالبرد بقى، فالثوم بيقصر المدة اللي بتعاني فيها من أعراض البرد بنسبة 70%، لدرجة إن المجموعتين اللي تم مقارنتهم ببعض، اللي من غير الثوم استمر معاهم دور البرد 5 أيام، والمجموعة التانية اللي أخدت الثوم استمرت معاها أعراض البرد يوم ونص بس.

اعرف أكتر| أمراض المناعة الذاتية: لما يعلن جهازك المناعي تمرده عليك! 

الثوم بيقلل الضغط

معروف إن أمراض القلب والأوعية الدموية زي النوبات القلبية والسكتات الدماغية وغيرهم ممكن يبقى سببهم المباشر هو ارتفاع ضغط الدم، وطبعًا مرض ارتفاع ضغط الدم من أكتر الأمراض المنتشرة في مصر ويمكن في العالم كله، ولذلك الدراسات دول الوقت بتحاول تلاقي حلول غذائية للمشكلة.

بعض الدراسات اللي تمت مؤخرًا على الثوم، قالت إن له تأثير قوي على خفض ضغط الدم عند المرضى المصابين بيه. في واحدة من الدراسات اللي قاست تأثير 600 – 1500 ملليجرام من مستخلص الثوم – ما يعادل 4 فصوص ثوم – يوميًا مقارنة بعقار “أتينولول” المستخدم لخفض ضغط الدم، وكانت النتيجة بتثبت إنهم متساويين في الفعالية.

medicalnewstoday

الثوم ومضادات الأكسدة

الأكسدة عملية طبيعية بتتم في الجسم، وبينتج عن عملية الأكسدة مواد ضارة اسمها الشوارد الحرة (free radicals)، واللي ممكن يبقى ليها أثر سلبي على الجسم وتساهم في تسريع عملية الشيخوخة. الجسم عشان يحمي نفسه من خطر الشوارد الحرة لازم يدخل له مضادات أكسدة تقضي على الشوارد الحرة. الثوم بقى من ضمن مواد طبيعية كتير بتحتوي على مضادات أكسدة ممكن تساهم في الوقاية من عدد من الأمراض.

الجرعات العالية من الثوم بتزود إنزيمات مضادات الأكسدة وبتقلل من الإجهاد الناتج عن عملية الأكسدة خصوصًا في مرضى الضغط العالي، ولو حطينا كل الكلام ده مع بعضه في إطار واحد، هنلاقي إن الثوم بيقلل من الكوليسترول ومن ضغط الدم وكمان فيه مضادات أكسدة، وبالتالي ممكن يعتبر بمثابة وقاية من خطر الإصابة بكتير من أمراض الدماغ الشائعة زي الألزهايمر والخرف.

صورة: verywellhealth

الثوم ديتوكس أصلًا

الجرعات العالية من الثوم وبسبب احتواءه على مركبات الكبريت أثبتت قدرتها على حماية أعضاء الجسم المختلفة من التسمم الناتج عن المعادن التقيلة. في دراسة تم إجرائها لمدة 4 أسابيع على العاملين في مصنع لبطاريات السيارات، واللي طبعًا بيتعرضوا لكميات كبيرة من معدن الرصاص السام، لقوا إن الثوم خفّض من مستويات الرصاص في الدم بنسبة 19%.

ومش بس كده لكن كمان تناول ثلاثة جرعات يومية من الثوم كانت كافية تمامًا لتخفيف بعض أعراض التسمم زي الصداع وارتفاع ضغط الدم، زيها زي عقار البنسلامين المستخدم في تقليل أعراض التسمم.

صورة: Institute of Ecolonomics

اعرف أكتر| ليه الديتوكس ما الفنيك موجود؟! 

للثوم فوائد ولكن..

الثوم له فوايد كتير أوي غير اللي إحنا قولناه ده، لكن ده لا يمنع إنه ممكن يكون له آثار جانبية ولابد من وجو احتياطات في التعامل معاه. صحيح الثوم آمن بالنسبة لمعظم الناس في حالة أكله، لكنه برضه ممكن يسبب رائحة فم كريهة وحرقة المعدة والغازات والغثيان والإسهال أحيانًا، لكن دي كلها آثار جانبية ممكن تكون ناتجة من طريقه دخول الثوم في الأكل أو بسبب مرض في المعدة أو القولون مثلًا.

الأخطر بقى إن الثوم ممكن يزود من خطر النزيف، وكتير من التقارير أشارت إلى إن الثوم زود بالفعل من النزف في المرضى اللي تناولوه بعد الجراحة، وبالنسبة للناس اللي بتعاني من احد اضطرابات النزف زي الهيموفيليا أو سيولة الدم، فتناول الثوم وبالذات الطازج منه ممكن يزود من خطر النزيف.

صورة: wikihow

وبالنسبة للناس اللي بيعانوا من ضغط الدم المنخفض ممكن الثوم يزود من الحالة لإنه زي ما قولنا بيساهم في خفض الضغط أصلا. كمان الثوم ممكن يخفض من مستويات السكر في الدم، ولذلك ينصح الجراحين المرضى بتجنب تناول الثوم قبل أسبوعين على الأقل من إجراء العمليات الجراحية لتجنب كمان احتمالات زيادة النزف.

الثوم أحيانًا بيكون له تفاعلات مع بعض الأدوية، ولذلك ممنوع تناول الثوم مع أخد عقار “Isoniazid” المستخدم في علاج السُل، والأدوية المستخدمة في علاج مرض الإيدز. ومن الضروري الاحتياط من الثوم مع حبوب منع الحمل ومع أدوية تثبيط المناعة المستخدمة في حالات زراعة الأعضاء وأدوية سيولة الدم اللي بياخدها مرضى الضغط العالي.

إزاي نحافظ على الثوم عشان نستفيد من كل الفوايد دي؟

معروف إن بيوت مصرية كتير بتشتري الثوم وبتقوم بتخزينه في موسم الثوم أو فترة ازدهاره وانتشاره. بس لازم نعرف إزاي نحافظ على الثوم ونخزنه بطريقة سليمة عشان ما يفقدش قيمته ونحقق أقصى استفاده من فوايده. في الأول هنتكلم في الوضع العادي للناس اللي مالهاش في التخزين تعمل إيه:

  • اشتري كمية معتدلة، الثوم في الأساس من أقوى المنكهات وبالتالي كمية صغيرة منه كفاية أوي في كل مرة.
  • حاولي تختاري الثوم اللي هتشتريه من نوعية جيدة، مفيهوش سواد كتير وناشف.
  • على عكس الشائع، عشان نحافظ على الثوم مدة طويلة محتاجة تحتفظي بيه في مكان مظلم وبارد وجاف، ممكن في برطمان كبير مثلًا في المطبخ، وأهم حاجة نبعده عن الرطوبة والحرارة والتعرض المباشر لأشعة الشمس.
  • استخدمي من الثوم على قدر احتياجك، قشري منه عدد فصوص مناسب للطبخة لأنه بمجرد ما يخرج من القشرة بيبوظ بسرعة.
صورة: healthline

ولو أم مصرية أصيلة وبالتالي عاوزة تستغلي الموسم، وتشتري كمية كبيرة ومحتاجة للتخزين يبقى عليكي وعلى الآتي:

  • الفريزر: وفي الحالة دي هتقشري الثوم وتحطي الفصوص في أكياس بلاستيك، وطبعًا ممكن قبلها تفرميه بحيث يبقى جاهز على طول، وممكن كمان تخلطيه بزيت الزيتون بحيث يمنع تجمده في الفريزر وفي نفس الوقت يحفظه ويبقى سهل الاستخدام.
  • الفرن: دخلي فصوص الثوم للفرن بحيث تنشف شوية، وبكده تقدري تحتفظي بيها لمدة طويلة من غير ما تبوظ.
  • المخلل: ودي طريقة بسيطة أوي لحفظ الثوم في الثلاجة، هتجيبي فصوص الثوم وتحطيها في برطمان فيه خل أبيض وتحطي عليه معلقة كبيرة ملح لكل كوب خل في البرطمان، وممكن تضيفي له أعشاب مجففة لو تحبي، وبكدة هيفضل الثوم فريش ويعيش معاكي مدة طويلة طالما مغمور في الخل.

طبعًا وجب التنويه إن الأبحاث والدراسات اللي بنتكلم عنها كلها محتاجة لمزيد من البحث والتدقيق لحد ما نقدر نقول بشكل قاطع إن الثوم بيعالج لوحده أو بيساهم في علاج كل الأمراض دي، وبالتالي لازم نستشير طبيب في أي من الحالات الطبية ذكرناها فوق ونلتزم بالعلاج كمان. وكده كده مافيش مطبخ يخلو من الثوم اللي بيدي الأكل طعم مختلف وجميل. وكل موسم توم وإنتوا طيبين.. قولوا لنا بقى ماما اشترت توم وخزنته ولا لسه؟ 😀


المصادر:  healthline  webmd  goodhousekeeping  howstuffworks  wikihow  epicgardening

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق