داروين: “الإنسان عمره ما كان قرد لا زمان ولا دلوقتي”

أجرته: مها طــه

بما إننا النهاردة بنحتفل بعيد ميلاد العالم الإنجليزي الشهير “تشارلز داروين”، قررنا ناخد حضراتكم في رحلة إلى الماضي ونقوم بحوار مع العالم الشهير ومؤسس نظرية التطور اللي حتى وبعد وفاته بأكتر من 130 سنة مازالت مطروحة للنقاش وليها مؤيدين ومعارضين في كل أنحاء العالم تقريبًا، والعلم كل يوم بيقدم أدلة جديدة عليها.

وإليكم نص الحوار:

لمن يرغب في سماع الحوار على الساند كلاود

• في بداية حوارنا مع العالم الأحياء العظيم “تشارلز داروين” نحب نتعرف على حضرتك؟

انا تشارلز روبرت داروين اتولدت يوم 12 فبراير سنة 1809، في مقاطعة شروبشاير, انجلترا. اتوفيت يوم 19 ابريل سنة 1882، لكن أحب أصحح لحضرتِك والسادة القراء/ المستمعين انا مش عالم أحياء بس على فكرة، انا كمان عالم في التاريخ الطبيعي والجيولوجيا، ولو إن أشهر حاجة تعرفوها من اعمالي هي نظرية التطور.

• بمناسبة كلامنا عن نظرية التطور سؤال مهم جدًا، هل فعلًا الإنسان أصله قرد؟

مين اللي قال الكلام ده!! واضح إن حاجات كتير حصلت السنين اللي فاتت وانا متوفي، لكن خليني أجاوب على حضرتِك، الإنسان عمره ما كان قرد أصلًا لا زمان ولا دلوقتي، حتى جد جد جد جدنا الأكبر عمره ما كان في يوم من الأيام قرد. كل ما في الحكاية إن نظرية التطور  بتقترح إننا عندنا أسلاف قريبين جدًا من القرود.

اعرف أكتر|مفاهيم خاطئة عن التطور: ”إحنا ماكناش قرود!“

ولمزيد من الشرح، إحنا كبشر نسبة التوافق الوراثي أو الجيني بينا وبين الشمبانزي حوالي 90% تقريبًا، لكن أسلافنا دول اللي عاشوا على الأرض من حوالي 7 مليون سنة، كانوا كائنات مش بشر 100% زي الموجودين حاليًا ولا هما قرود 100%، كانوا تقريبًا 50 : 50 زي ما كتير من الأبحاث والدراسات أكيد قالت الكلام ده في الوقت الحالي، ولذلك نقدر نقول عنهم السلف المشترك، يعني إحنا عمرنا ما كنا قرود ولا هنبقى في يوم من الأيام.

• طب هل نظرية التطور فعلًا مجرد نظرية والعلم مقدرش يثبتها؟

خليني في البداية أفرق ما بين مفهومين متناقضين إلى حدٍ ما بيوصفوا كلمة “نظرية” واحدة من وجهة نظر العلماء والتانية من وجهة نظر العامة. تعريف كلمة (نظرية علمية) من وجهة نظر العلم، “هي التفسير المثبت لبعض اوجه الطبيعة، والمبني على مجموعة من الحقائق التي تم تأكيدها مرارًا عن طريق الملاحظة والتجربة. تلك النظرية المدعمة بالحقائق وليست مجرد تخمين، لكنها تفسير معتمد للعالم الحقيقي”.

ومن الكلام ده نفهم إن عشان العلم يوصف نظرية الجاذبية بإنها نظرية علمية، لازم تكون تمت عليها مجموعة من التجارب اللي أثبتت صحة الفرضيات العلمية، ومش بس كدة دي لازم التجارب دي تتعاد مرات كتير وتطلع نفس النتائج أو نتائج مشابهة ليها، وفي وقتها بس نقدر نقول إن الفرضية العلمية أصبحت نظرية علمية.

أما من وجهة نظر العامة، فكلمة “نظرية” بيتم استخدامها من باب وصف أشياء افتراضية، فمثلًا لما حد يعبر عن رأي شخصي معين، في موضوع معين، ممكن ببساطة تلاقيه بيقول “والله انا عندي نظرية في الشئ الفلاني” وهكذا.

اعرف أكتر|نظرية التطوّر مجرد نظرية!

اما عن سؤالِك، فنظرية التطور عشان تتحول من فرضية لنظرية علمية معترف بيها، مرت بكل اللي قولناه، نتيجة لتراكم كتير من الأبحاث العلمية في مجموعة من المجالات المختلفة، زي علم الحفريات وعلوم الجيولوجيا وصولًا لعلم الوراثة والأجنة وعلم التشريح المقارن.

• هل نظرية التطور بتتعارض مع المعتقدات الدينية من وجهة نظر حضرتك؟

حقيقي أنا شخصيًا مش مهتم أوي بفكرة الصراع الديني والعقائدي، ولذلك خلينا نقول إن نظرية التطور مش هدفها الإجابة عن سؤال “كيف بدأ الخلق؟” اللي أصلًا بتختلف على إجابته المعتقدات الدينية، لكن النظرية مهتمة اكتر بتفسير تنوع صور الحياة على الأرض، مهتمة بدراسة أسباب التنوع البيولوجي ده بدايةَ من أكثر انواع الأحياء الدقيقة بساطة ولحد الإنسان الأكثر تعقيدًا بين كل الكائنات الحية الموجودة على الأرض.

• في حالة إن نظرية التطور كانت فعلًا حقيقة لا تقبل الشك، ليه البشر لم يتطوروا لحد اللحظة دي؟

(ضحكات متقطعة) ومين برضة قال إن البشر لم يتطوروا طول مدة حياتهم على الأرض من أقدم الأسلاف البشرية ولحد النهارة، مثلًا كل الثدييات معروفة بقدرتها على إنتاج اللبن وإرضاع صغارها، لكن البشر هما الكائن الثديي الوحيد اللي بيقدر يهضم سكر اللاكتوز الموجود في اللبن بعد بلوغ سن الفطام، ومش بس كدة لأ البشر كمان يقدروا يهضموا ألبان كائنات تانية زي الأبقار مثلًا ودي ميزة تطورية اكتسبها البشر. ومش بس الصفة دي في غيرها كتير زي ضمور الزايدة الدودية وفقدان ضروس العقل وغيرهم.

اعرف أكتر|تطور الإنسان: 7 حقائق مدهشة وغريبة بتأكد إن حضرتك بتتطور!

• إيه هو التخصص الأساسي لحضرتك؟

رجعتيني للذي مضى، انا حقيقي سنة 1825 كنت باساعد والدي الطبيب “روبرت داروين” في علاج الفقراء في المقاطعة اللي عايشين فيها، ويمكن ده كان السبب اللي خلاني التحق بكلية الطب جامعة ادنبره اللي كانت في الوقت ده أفضل مدرسة طبية في المملكة المتحدة. لكن الحقيقة حسيت إن دراسة الطب مملة جدًا وبالذات الجراحة اللي حسيت إنها شئ قاسي ومؤلم بجد.

لما والدي شاف إني مهمل في دراسة الطب، خلاني اتحول لدراسة الآداب في كلية المسيح بجامعة كامبريدج، وحصلت فعلا على درجة البكالريوس كخطوة أولى في الطريق عشان كان طموحه وقتها إني أبقى قسيس. وفي وسط كل المحاولات دي، بدأ اهتمامي بدراسة التاريخ الطبيعي وجمع عينات من الخنافس، ومن هنا انطلق الشغف والتحقت بدورة “آدم سيدجويك” الجيولوجية، وبعدها بدأت الرحلات والاستكشافات.

في نهاية حوارنا معاك نحب نشكرك على سعة صدرك ونقول لحضرتك إن الأثر باقي والله ولحد النهاردة في ناس كتير حوالين العالم بتحاول تثبت صحة نظريتك أو تثبت خطأها على حسب، لكن شكرًا على التوضيح والشغف وكل الاسهامات وفروع العلم الكتير اللي اعتمدت على نظرية التطور والانتخاب الطبيعي.