التحكم في الغضب: هدي أعصابك لا ييجيلك sugar ولا حاجة!
كتبت: مها طــه
في فيلم الأنيمشن الشهير “Inside Out” اللي بيتكلم عن مشاعرنا وأهميتها في حياتنا وبيصور المشاعر وكأنهم أشخاص عاملين مجلس قيادة مصغر كده جوا دماغنا، هتلاقي مشاعر الفرح والحزن والاشمئزاز والخوف، لكن كل اللي فاتوا دول كوم والغضب أو “Anger” كوم لوحده، كائن أحمر جميل كدة وبمثلني بشدة كشخص عصبي، وأعتقد – وفقًا لرؤية الفيلم – إنه رئيس مجلس قيادة دماغي فعليًا.
أنا متعصب ولازم تستحملوني
الغضب في العموم شعور طبيعي وصحي كمان، ولازم يتم التعبير عنه وإلا تبقى في مشكلة كبيرة. بس برضه لو عبرت عن الغضب بزيادة، وطلعت زي المدفع في اللي حواليك ده هيؤثر عليك وعليهم، لأن الغضب في الأغلب بيكون شعور قوي، وبالتالي بيمنعك من التفكير السليم واتخاذ القرارت السليمة، وساعتها في الأغلب هتدفع التمن غالي عشان عصبي وتحديدا عشان مش قادر تتحكم في العصبية أو الغضب ده.
الغضب من وجهة نظر علم النفس هو استجابة شائعة بتحصل كنتيجة للمرور بالتجارب المحبطة أو المؤذية، لكنه أحيانًا بيكون استجابة ثانوية للحزن أو الوحدة أو حتى الخوف، وفي بعض الأوقات كمان ممكن يبقى مجرد شعور عاطفي خالص بنحس بيه من غير أسباب واضحة.
اعرف أكتر| ليه لما بنتعصب وشنا بيحمر؟!
الغضب بقى من الناحية الفسيولوجية بيعتبر جزء من استجابتنا لفكرة الهروب أو المواجهة، لكنه لو زاد عن حده بيكون الغضب على المدى الطويل للإصابة بمشاكل صحية خطيرة زي ارتفاع ضغط الدم وما يصاحبه بقى من مشاكل القلب والصداع ده غير المشاكل الجلدية ومشاكل الجهاز الهضمي، ده غير إنه على المستوى النفسي ممكن يكون محفز للسلوك العنيف ويمكن ارتكاب الجرائم كمان.
إزاي تسيطر على غضبك؟
في البداية عشان تعرف تتحكم في الغضب، لازم تكون عارف بوادر الغضب أو العلامات المبكرة ليه، وهي نفس العلامات اللي بتميز حالة “الهروب أو المواجهة”. ساعتها بيحصل انطلاق لهرمون الأدرينالين، وبالتالي النبض يبدأ يكون سريع وكذلك التنفس، ده غير الشعور العارم بالتوتر، وتبدأ تلاقي نفسك بتجز على أسنانك، وبتعرق وجسمك بيترعش من فرط العصبية. وقتها بقى يا معلم خليك عارف أنك داخل على نوبة غضب قوية ولازم تتعامل معاها. إزاي بقى تتعامل مع الموقف.. أقولك:
- أول حاجة جرب تتنفس بعمق، وحاول تسيطر على الأفكار السيئة اللي بتدور في دماغك، وتفكر بدالها في شئ إيجابي، صحيح إحنا عارفين إن ده صعب لكنه ممكن جدًا مع التدريب.
- كرر ببطء كلمات أو جمل بشكل هادي زي “ريلاكس – relax”، “اهدا”، “الموضوع بسيط”وهكذا. مع تكرار فكرة التنفس بعمق. عادي لو حسيت الموضوع قلب على فيلم بنات العم 😀 جرب بس ومرة في التانية هتلاقي الموضوع بيتحس.
- حاول تعبر عن اللي مضايقك بشكل طبيعي وبهدوء، لكن برضه من غير ما تكبت مشاعرك.
- لو حسيت ببوادر غضب، ابعد عن الدخول في جدال، لو تقدر قوم اتمشى بحيث تبعد عن مصدر الغضب ولو بشكل مؤقت لحد ما تهدأ.
وعملا بمبدأ الصراحة عشان نكون واضحين مع بعض، عشان تتحكم في الغضب لازم تغير شوية من بعض سلوكياتك كشخص في العموم، زي إنك تزود من نشاطك البدني ووتهتم بممارسة تمارين رياضية حتى لو خفيفة بانتظام بهدف تحسين الحالة المزاجية، وتحاول تتخلص من التوتر والتراكمات اللي ممكن تكون محفز لنوبات غصب غير مبررة.
اعرف أكتر| القلق: ولماذا طلب منّا كارنيجي أن ندعه ونبدأ الحياة؟
أحيانًا بيكون الغضب ما هو إلا تعبير عن الشعور بالوحدة، سواء كانت وحدة حقيقية بإن الحياة الاجتماعية للشخص مافيش فيها أشخاص مقريبن، أو حتى الوحدة النفسية رغم وجود ناس لكنهم مش قادرين على التواصل والدعم. حاول تدور على الدعم من الآخرين، اتكلم عن مشاعرك العميقة مع القريبين ليك، واشتغل على محاولة تغيير السلوكيات اللي شايفها سلبية.
لو مش عارف تحدد امتى بالظبط بتحس بالغضب، جرب تكتب عن أفكارك ومشاعرك أول بأول، وبالتالي هيكون من الأسهل معرفة الأسباب اللي بتؤدي للشعور بالغضب، وبكده تقدر تقلل منها أو تتحاشى وجودها أصلًا. وكمان هتقدر تتعامل مع مشاكلك وأفكارك دي بهدوء.
التحكم في الغضب
السيطرة على الغضب بتتطلب شوية تغيير في الشخصية، منها إنك تحاول تلاقي منظور مختلف للأمور، فتلاقي نفسك بتفكر بشكل مختلف، ويمكن كمان بتضحك في مواجهة المواقف اللي كانت زمان بتعصبك. كمان حاول كشخص عصبي إنك تبقى مستمع جيد، لماتسمع اللي قدامك بهدوء، هتقدر تتواصل مع الآخرين، وتفهم مشاعرهم وبالتالي كلامهم، ووقتها يمكن فعلًا تعرف إن أحكامك المسبقة هي سبب غضبك.
حاول كشخص عصبي تعبر عن مشاعرك بهدوء بشكل مباشر، ومن غير ما تبقى دفاعي أو حتى هجومي. حاول تحيّد مشاعرك، خليك عقلاني ومنطقي. طبعًا مش معنى إنك تتحكم في غضبك، إنك تتجاهل مشاعرك أو تكبتها؛ لأن ده كمان ممكن يتسبب في مشاكل صحية ونفسية كبيرة، زيها بالظبط زي نوبة الغضب غير المبررة اللي ممكن تتسبب في مشاكل صحية خطيرة.
اعرف أكتر| الكبت النفسي المنخفض: لعنة العظماء!
لو حاسس إن الكلام ده صعب عليك، فده شعور طبيعي جدًا، لأن أي شئ قبل ما تجربه بتحسه صعب، حتى لو كان شئ بسهولة المشي مثلًا. كلنا في مرحلة ما من حياتنا كان المشي بالنسبة لنا صعب، وإن كان التحكم في المشاعر والسلوكيات أصعب شوية، لكن كمان ممكن تلجأ لطبيب/ أخصائي نفسي، بحيث يساعدك على التحكم في الغضب.
مشاعرنا جزء معقد من طبيعتنا الفسيولوجية والنفسية، ولذلك لازم نتعامل معاها ونطور طريقة تعبيرنا عنها طول الوقت، ولذلك دعوة لنفسي وليكم خلونا نحاول نتعامل مع الواقع الضاغط أصلًا بإننا نعبر عن مشاعر الغضب والتوتر بشكل منطقي يجنبنا المشاكل الصحية والنفسية، ويخلينا كمان نحافظ على علاقتنا العاطفية والأسرية والاجتماعية عمومًا من غير ما نخسر حد أو نكسر حاجة فوق دماغه 😀
المصادر: webmd apa psycom medicalnewstoday
