الكمون والليمون: هل شرب كوباية على الريق كفاية عشان تخس؟

كتبت: مها طه

كشخص بيعاني طول عمره تقريبًا من تناوب فترات زيادة الوزن وفقدانه، فطول الوقت بحاول أهتم بإيه ممكن أكله وإيه ممنوع، وطبعًا ده مشكلة لأني بحب الأكل ومعترفة بكده، ولذلك لما ييجي حد يقولي وصفة أو ريجيم جديد أول حاجة بافكر فيها هي يا ترى الشئ ده طعمه حلو ولا نستعد للتعسيف، وحقيقي من أكتر الحاجات اللي افتكر إنها علمت معايا وفرحت إنها من ضمن نصايح الدايت هي كوباية الكمون بالليمون الصبح.

الكمون والليمون .. الميكس السحري

الكمون والليمون بيشتركوا في صفة مهمة جدا وهي إن لهم نكهة قوية، بتكون بمثابة تعويض شوية عن تقليل الزيوت والأملاح في الأكل لو قررت تتجه للأكل الصحي. وقبل ما نتكلم عن عصير الكمون بالليمون خلونا نتكلم الأول عن فوايد كل واحد لوحده.

بعض الدراسات بتقول إن الليمون ممكن يكون له دور في حرق الدهون، لأن تناوله بيزود من امتصاص الكالسيوم، وكل ما زاد الكالسيوم في الخلايا الدهنية، كلما زادت الدهون اللي تقدر الخلايا تحرقها.

ومؤخرًا كتبت “تيريزا تشيونج” الكاتبة في المجال الصحي عن ما يسمى بـ”النظام الغذائي لعصير الليمون”، وبتقول فيه إن عصير وقشر الليمون بيساعدوا الجسم على التخلص من السموم وتحسين أداء الجهاز الهضمي.

“شيونج” كمان قالت إن البكتين الموجود في قشرة الليمون بيمنع المعدة من امتصاص السكر بشكل سريع، ده غير إن الحمض الموجود في الليمون بيحفز إفراز أحماض المعدة، وفي النهاية أشارت إلى إن تناول عصير الليمون على وجبة واحدة على الأقل يوميًا، هيساعد في محاربة الدهون.

فوائد الكمون 

أما عن الكمون فحدث ولا حرج، فوائد صحية كتير معظمها متعلقة بالهضم والجهاز المناعي والدورة الدموية، لكن طبعا مش كل الفوائد دي مثبتة بشكل قاطع، في بعضها مازال بيتناقش وبعضها يعتبر صعب جدًا إثباته لحد دلوقتي على الأقل.

• الهضم:

أحد أكتر الفوائد المرتبطة بالكمون هو استخدامه في علاج عسر الهضم، الكمون عمومًا بيساعد في زيادة الهضم بشكل طبيعي، لأنه بيزود من نشاط الإنزيمات الهاضمة وبالتالي عملية الهضم بتبقى أفضل وأسرع، ده غير إن الكمون بيساعد عن تحفيز إفراز العصارة الصفراوية من الكبد، اللي بتساعد على هضم الدهون وبعض العناصر الغذائية في الأمعاء.

وفي واحدة من الدراسات اللي أجريت على مرضى متلازمة القولون العصبي، قالوا إنهم شعروا بتحسن في الأعراض بعد تناول الكمون المركز لمدة اسبوعين.

• نسبة السكر:

بعض الدراسات، أشارت لاحتمالية استخدام الكمون في حالات مرض السكر، واستندت على المؤشرات الأولية اللي أظهرت تحسن المرضى اللي بيعانوا من زيادة الوزن بالذات، كمان الكمون بيحتوي على مكونات بتقلل من التأثيرات طويلة المدى اللي بتظهر على مرضى السكر، اللي عادةً بتصيب العين والكلى والأعصاب والأوعية الدموية الصغيرة.

جدير بالذِكر إن كل الدراسات اللي فاتت دي تم إجرائها على الكمون المركز كمكمل غذائي، لكن عمومًا استخدام الكمون كتوابل على الأكل بيساعد في التحكم في نسبة السكر في الدم، وعلى الرغم من إننا لازلنا مش عارفين بالظبط الكمية المطلوبة عشان يحقق الغرض ده، لكن خلينا نقول إنه فعلًا مفيد وده المهم.

• الكوليسترول:

في دراسة لمعرفة تأثير تناول الكمون على نسب الكوليسترول في الدم، كانت النتيجة إن تناول 75 مجم من الكمون مرتين يوميًا لمدة 8 أسابيع، كان كفيل بخفض نسبة الدهون الثلاثية في الدم، وفي دراسة تانية، انخفضت نسبة مستويات الكوليسترول الضار (LDL) المؤكسد بنسبة 10% في المرضى اللي تناولوا مستخلص الكمون على مدى شهر نص.

وفي دراسة تالتة أجريت على 88 سيدة، لدراسة تأثير الكمون على رفع مستوى الكوليسترول الجيد (HDL)، كانت النتيجة إن اللي تناولن 3 جرام من الكمون على الزبادي مرتين في اليوم، كانت عندهم مستويات الكوليسترول الجيد أفضل من غيرهن اللي تناولن الزبادي لوحده.

اعرف أكتر| الزبادي بالليمون وتقليل الوزن؛ فوز بطعم الخسارة يا كابتن مدحت!

لكن برضة خلينا نقول إن كل اللي فات ده بيتم دراسته باستخدام الكمون في صورة مكمل غذائي مركز مش في الشكل المعروف بالنسبة لنا كتوابل مطحونة بيتم إضافتها للأكل، وبيعتبر تأثير الكمون على مستوى الكوليسترول من الأمور اللي مازالت بتحمل أخد ورد ومحتاجة مزيد من الأبحاث والدراسات.

• فقدان الوزن:

أما بالنسبة لدوره المباشر في تعزيز فقدان الوزن، فبرضه منقدرش نقول إن في دراسات قاطعة بتقول إن للكمون دور في إنقاص الوزن، لكن فعلًا نتايج  الدراسات اللي اتعملت لحد دلوقتي تعتبر واعدة جدًا، لكنها طبعا مازالت محتاجة لإجراء أبحاث أكتر عشان نقول إنها مؤكدة تمامًا.

وعليه، فنقدر نقول إن الميكس العظيم ما بين الليمون والكمون على الرغم من عدم وجود أدلة علمية كافية لإثبات فوايده العريضة بشكل قاطع، لكنك بالطبع تقدر تستخدمه لفوايده للمعدة والقولون وتحسين الهضم، ولأنهم من أصحاب النكهة القوية والمحببة في نفس الوقت، فبيساعد في تقليل كميات الأكل اللي ممكن تاكلها، لأنه بيسبب حالة امتلاء جيدة جدًا، ده طبعًا غير وجود محتوى مائي جيد فيه، وده كويس للأشخاص اللي مابيقدروش يشربوا كميات مياه كافية على مدار اليوم.

أما بخصوص سؤالنا الرئيسي عن لو كوباية الكمون بالليمون كفاية عشان تخس، فالإجابة إن مافيش حاجة لوحدها كفاية عشان تخس، ودي ما هي إلا خدعة من الشيطان ودماغك. الكمون والليمون ممكن يكون وسيلة مساعدة على الخسسان.. إنك تخس متطلب منك مجهود في إنك تظبط أكلك وإنك تقلل كمياته وتعرف إيه داخل لجسمك وإزاي بيتحرق وغيره وإن جسمك يكون لائق بدنيا متطلب منك تمارس الرياضة واللي يقولك غير كده بيخدعك.

المصادر:  livestrong  healthline ncbi nlm  indiatimes  sciencedirect