الشعاب المرجانية: مملكة يقف وراءها ملايين الجنود المجهولة (الجزء التاني)
كتبت: يارا كمال
اتكلمنا في الجزء الأول عن إيه هو حيوان المرجان، وازاي بيصنع الشعاب المرجانية، وازاي بيعيش فيها. تعالوا نعرف تأثير العوامل الخارجية على الشعاب المرجانية بالإيجاب أو بالسلب، ونعرف إحنا عملنا إيه في الشعاب المرجانية، ونتكلم كمان على الحاجز المرجاني العظيم.
إيد لوحدها ما تصقفش
على فكرة، مش المرجان بس اللي بيكوّن الشعاب. يعني من الحاجات اللي بتخش في مكونات الشعاب، الرمال المرجانية.
الرمال المرجانية بتتكوّن من تآكل الحجر الجيري وصدفات الحيوانات بفعل الأمواج والتيار وأسنان بعض الأسماك، وبتتحبس جوه فتحات الشعاب.
وهنا فيه طحالب اسمها ”coralline algae“ أو الطحالب المرجانية اللي بيكون لها قشرة، ودي بترسّب قشرة صلبة من كربونات الكالسيوم على الرمال المرجانية اللي دخلت الشعاب، وبكده تلحم الأجزاء المدمّرة من الشعاب.
لا دهب ولا ياقوت .. كل ده مرجان
نيجي بقى لمثال على الشعاب المرجانية: الحاجز المرجاني العظيم. هو مش مجرد مثال، ده واحد من عجائب الدنيا السبع الطبيعية، ده مش مجرد مجاز، ده هو فعلًا كده. ده أكبر هيكل فيه حياة موجود على وجه الأرض، لدرجة إنه ممكن يتشاف من الفضاء الخارجي ، حضرتك متخيل؟!
تخيّل إن الكائن الصغير ده عامل شعاب ممتدة لمسافة 2300 كيلومتر! طبعًا كل ده مش شِعب واحد، دول حوالي 3000 شِعب. الحاجز المرجاني العظيم فيه 400 من أنواع الشعاب المرجانية و2000 نوع من الأسماك و4000 نوع من الرخويات، وستة من السبع أنواع سلاحف بحرية اللي موجودة في العالم.
الحاجز المرجاني العظيم بيمتد على طول الساحل الشمالي الشرقي من أستراليا اللي بيطل على بحر كورال (بحر المرجان). والأستراليين اعتبروه حديقة بحرية سنة 1975 بعد موجة من غضب عام ضد اقتراح التنقيب عن النفط على طول الشعاب المرجانية.
وبعد مرور ست سنين، حطوا الحاجز المرجاني العظيم في قائمة التراث العالمي باعتباره منطقة رائعة الجمال ومهمة طبيعيًا جدًا. في المنطقة دي فيه 1% معمولة للأبحاث بس، أما باقي الحديقة البحرية فيها مناطق للتعليم والترفيه، وفيها مناطق للاستخدام العام، واللي بيُسمح فيها بالصيد التجاري.
مش هنسيب الشعاب في حالها.. برضه
عايزة أقول لكم إن الحاجز المرجاني العظيم ده محظوظ لإنه محمي ومُعتنى بيه، وده لا يمنع إنه اتعرّض لتدمير برضه. كفاية إن عوامل التدمير البشرية والطبيعية دمّرت 10% من الشعاب المرجانية في العالم واللي بتُستعاد دلوقتي، و30% هتموت تمامًا خلال العشرة عشرين سنة الجايين.
عندك كمان الفلبين اللي هي واحدة من 25 بؤرة تنوع حيوي في العالم،فيه 70% من الشعاب المرجانية فيها اتدمّرت و5% بس اللي في حالة كويسة.
قبل ما نعرف إيه اللي ممكن يعرّض الشعاب المرجانية الجميلة للدمار، محتاجين نعرف هي إيه أهميتها بالنسبة لنا؟ يعني هل هي مجرد جزء جميل من الطبيعة؟
- أولًا: الشعاب المرجانية هي بيت ربع الأنواع البحرية، يعني لو دمرتها كإنك حرقت غابة كبيرة جدًا، وتخيل بقى كم الحيوانات اللي هتموت وتتشرّد بسببك.
- ثانيًا: الشعاب بتصد عننا إلى حدٍ ما الأمواج والعواصف القوية.
- ثالثًا: فيه أدوية كتير بتتاخد من الحيوانات والنباتات اللي بتعيش في الشُعب المرجانية واللي ممكن تعالج السرطان والتهاب المفاصل والعدوى البكتيرية والفيروسات وأمراض تانية.
- رابعًا: ده غير إنها مصدر لأكلنا، وإنها كمان كنز اقتصادي عظيم من حيث إن وجودها موفر وظايف كتير لينا ده غير دخل السياحة بقى.
المشكلة بقى إن فيه حاجات بتمثل خطر على الشعاب المرجانية، واللي زاد وغطي بقى إحنا البشر، اللي مابنسيبش حاجة في حالها. الشعاب المرجانية ممكن تتدمّر بسبب زيادة الحرارة درجة واحدة بس، لإن ده بيطرد الطحالب اللي بتعيش فيها في عملية بيسموها ابيضاض الشعاب المرجانية (coral bleaching).
الطحالب هي اللي بتدي الشعاب المرجانية اللون بتاعها، ومن غيرها الشعاب يبقى لونها أبيض سخيف كده. ولو استمر السبب اللي طرد الطحالب من الشعاب، الطحالب مش هترجع والمرجان هيموت.
كمان الأعاصير والكائنات اللي بتفترس المرجان ممكن تؤدي لدمار الشعاب، أما احنا بقى فممكن ندمّر الشعاب المرجانية بالتلوث والصيد الجائر. ده احنا وصل بينا الاستسهال إننا بقينا بنصطاد بالسيانيد عشان نصيب السمك بحالة ذهول كده فنقدر نصطاده بسهولة! وده بيسمم الشعاب كمان مش السمك بس.
وده على فكرة بيُستخدم في أكتر من 15 دولة. لأ وكمان بنصطاد بالتفجير، وده ممكن يدمّر الشعاب خالص ويخلي المستعمرات القريبة من مناطق التفجير تبيض هي كمان، وفيه أكتر من 40 دولة بتسمح بالصيد بالتفجير.
الملوثات والصرف الصحي اللي بنرميه في الميه بيوفر مغذيات للطحالب الضارة والكائنات المنافسة للمرجان، وده بيقلل مساحة المرجان في البيئة. كمان إحنا بناخد الحجر الجيري اللي معمولة منه الشعاب عشان نستخدمها في مواد البناء.
ده غير بقى السياح اللطاف، اللي بيروحوا ومعاهم حتة من الشعاب من باب التذكار. خلينا مانكرهش نفسنا على الأقل وندمّر كل جمال نشوفه في الطبيعة، ده حتى هييجي علينا بالخسارة.
المصادر: animals noaa.gov greatbarrierreef unesco
