كتبت: يارا كمال
مادام فيه حاجة ناس كتير اهتموا بيها، يبقى لازم يبقى فيه هجص. وطبعًا من ضمن الحاجات اللي الناس واجعة دماغ بعض بيها هي الدايت. دوّر كده في دايرة معارفك هتلاقي ناس كتير منهم بيقولوا إنهم عاملين دايت أو هيبدأوا دايت، ودول غالبًا عمرهم مابيبدأوه 😀
وعشان البشر بيحبّوا الفهلوة حبتين، قبل مابيبدأوا الخطوة دي مابيقروش كفاية وبيكتفوا بالمعرفة السطحية، وده بيخلي خرافات كتير تنتشر، خلونا نتكلّم عن عشرة من أشهر الخرافات المشهورة في عالم الدايت.
خرافات التخسيس
1- بلاش كربوهيدرات .. الكربوهيدرات وحشة:
بصوا يا جماعة مفيش عنصر وحش في المطلق، وفي الآخر صوابعنا مش زي بعضها، يعني مش عشان أخ طلع وحش تبقى بقية العيلة كده. بمعنى إن الكلام ده ينطبق على جزء واحد بس من عيلة الكربوهيدرات، وهو الكربوهيدرات البسيطة أو المكررة زي السكر والعصاير والنشويات زي الرز الأبيض والعيش الأبيض والبطاطس.
أما الكربوهيدرات المعقدة زي الفاكهة والخضار والحبوب الكاملة زي: الشوفان، الشعير، الكينوا والأرز البني، فدي مصادر هايلة للطاقة، وممكن تاكل منها من غير ما تضيف لنفسك سعرات حرارية كتير. الأكل الغني بالألياف مع كربوهيدرات معقدة هيخليك تشبع على عكس الكربوهيدرات البسيطة.
المشكلة الحقيقية بقى لما الدهون بتتحد مع الكربوهيدرات البسيطة، لإن الاتحاد ده بيبعت إشارات كبيرة للجسم إنه يخزّن الدهون، وده بيرفع مستوى السكر في الدم بشكل كبير، واللي بيزوّد إنتاج الأنسولين، وبيقول لجسمك يخزّن الدهون في الخلايا.
2- بعض الأكلات بتحرق الدهون .. آآآآآه زمبؤلك كده:
فيه ناس بتقول إن أكل زي الكرفس وشوربة الكرنب والجريب فروت، بيحرق الدهون. بصوا يا جدعان، مفيش أي نوع من الأكل بيحرق الدهون. بعض الحاجات اللي فيها كافايين ممكن تسرّع التمثيل الغذائي بس لوقت قصير جدًا، ولكنهم مش بيخسسوا ولا حاجة.
3- كل ما تتمرن، كل ما تخسر وزن .. عاش يا وحش:
للأسف التمارين مابتحرقش سعرات حرارية كتيرة أوي زي ما إحنا فاكرين. يعني لو واحد وزنه حوالي 56 أو 57 كيلوجرام مثلًا، لو ذاكر لمدة تلت ساعة هيحرق حوالي 35 سعر حراري، ولو لعب بيلاتس (وده نظام تمارين باستخدام أجهزة معينة)، هيحرق حوالي 100 سعر حراري، ولو لعب كورة هيحرق حوالي 130 سعر حراري في نفس الوقت.
الحل اللي قدامك عشان تفقد وزن إنك تحرق سعرات حرارية أكتر من اللي بتستهلكها، وكل الأنشطة الجسمانية بتحرق سعرات، حتى الأنشطة اللي زي الوقوف والقعاد والنوم، وكل ما النشاط يبقى قوي، كل ما تتحرق سعرات أكتر.
يعني عشان تنقص كيلو، أنت محتاج تحرق 7700 سعرات حرارية زيادة (يعني 1100 سعر كل يوم على مدار الأسبوع). وبالتالي، لو قللت 660 سعر من اللي أنت بتاكله كل يوم، وزوّدت نشاطك بحيث تحرق 440 سعر زيادة كل يوم، تقدر تقول إنك ممكن تنقص الكيلو ده كل أسبوع.
وفقدان الوزن التدريجي (يعني حوالي من 225 جرام لـ907 جرام في الأسبوع)، هو أحسن طريقة للحفاظ على الوزن اللي فقدته على المدى الطويل.
طبعًا التمارين الرياضية عنصر مساعد مهم في فقدان الوزن، ده غير إن ليها فوايد صحية تانية مهة جدا جدا، عشان ماحدش يتلكك بس 😀
4- التمارين بتحوّل الدهون لبروتين .. يا سلام:
بصوا يا جماعة الأنسجة العضلية والأنسجة الدهنية بيتكونوا من نوعين مختلفين تمامًا من الخلايا. أنت ممكن تفقد دهون وتبني عضلات، مافيش بقى فكرة إن الدهون تتحوّل لعضلات.
5- هخس 9 كيلو في 20 يوم .. لا يا راجل؟
والله كلام جميل، وماله أخس لي بتاع 9 كيلو في 20 يوم؟! بس للأسف الكلام ده مستحيل، إلا لو أنت في حجم كينج كونج. يعني مثلًا الدايت المبني على الصوم أو السوايل هيخليك تفقد وزن لإن قناتك الهضمية فضيت، بس هتفقد كمان ميه وعضلات (ودي مش حاجة كويسة)، ده غير إنك أول ما ترجع تاكل تاني، وزنك اللي فقدته هيرجع زي ما كان خلال أيام.
يعني من الآخر، لو مش هتخسر وزن على المدى الطويل، ماتعذبش نفسك. بص المفروض ماتنقصش أكتر من 1.36 كيلوجرام في الأسبوع بعد الكام أسبوع الأولانيين. فقدان الوزن بمعدل أكتر من كده ممكن يزوّد خطر تكوين حصوات في المرارة. كمان الريجيم اللي بيمد الجسم بأقل من 800 سعر حراري في اليوم ممكن يؤدي لعدم انتظام ضربات القلب، وده ممكن يكون مميت.
يبقى الحل إنك تفقد وزنك تدريجيًا يعني من 225 جرام لـ900 جرام، وكل من كل العناصر الغذائية بشكل معتدل وحاول تحسّن نشاطك الجسماني، وبالشكل ده هتفقد وزن وتقدر تحافظ على ده لوقت طويل، و ده كمان هيقلل خطر إصابتك بمرض السكر النوع 2 وأمراض القلب وارتفاع ضغط الدم.
6- بلاش دهون .. قلل الدهون:
في التسعينات طلعت موضة الريجيم اللي فيه دهون قليلة، بس الدهون مشبعة وبتحسّن الطعم وبتساعد على حرق الدهون برضه، يعني هي مهمة لو أنت عايز تفقد دهون. زائد إن الأنظمة الغذائية اللي فيها دهون قليلة ممكن تؤدي لجفاف الجلد وإن لونه يبقى باهت، وإننا نحس بالبرودة بسهولة.
طب نعمل إيه؟ محتاجين نلعبها بمعلمة. فيه أنواع دهون كويسة زي الدهون غير المشبعة الأحادية والمتعددة، ودهون مش كويسة زي الدهون المشبّعة والمتحولة.
فمن الآخر حاول تاكُل كميات معتدلة من الدهون الصحية من السلامون والأفوكادو وزيت الزيتون والمكسرات، وتقلل من الدهون المشبَعة اللي موجودة في الأكل المقلي واللحمة الحمرا والزبدة، وحاول تبعد عن الدهون المتحولة تمامًا، واللي بتكون موجودة في البطاطس المقلية والسلع المحمصة المعلبة والكوكيز والمقرمشات. ولو لقيت مكتوب على إزازة زيت نباتي كلمة ”مهدرجة جزئيًا – partially hydrogenated“، ماتجيبهاش أصلًا.
7- إيدك والتلاجة بالليل عشان ماتتخنش:
بص يا حبيبي، كلت بليل قبل ما تنام أو أول ما صحيت، السعرات الحرارية هي هي مش هتنفش بليل مثلًا، المهم نوعية الأكل في كل الأوقات وحرق السعرات دي بيكون أحسن في أنهي وقت اللي هو الصبح طبعا. وطبعًا مش حاجة كويسة أصلا لو نمت تقيل أو وأنت لسه واكل، بصرف النظر عن فكرة زيادة الوزن.
8- عايزة حاجة ساقعة دايت:
مش دايمًا الأكل أو المشروبات اللي بيبقى مكتوب عليها إن فيها دهون أقل أو خالية من الدهون أو مش مضاف لها سكر بتبقى فيها سعرات أقل من نفس المنتج العادي رغم إنه غالبًا فيه دهون ومضاف له سكر. المشروبات الدايت أحيانًا بيبقى فيها سعرات أقل، وأحيانًا نفس السعرات وأحيانًا أكتر كمان. إزاي بقى؟
لإنهم ممكن يتضاف لها سكر أو دقيق أو مكثفات نشا، عشان يحسنوا الطعم أو القوام أو التركيب بتاع الأكل ده بعد ما شلنا منه الدهون، والإضافات دي بتزوّد سعرات.
كذلك الأكل اللي بيبقى مكتوب عليه إنه مش مضاف ليه سكر أحيانًا بيتحلّي بمركزات عصير الفواكه، وبالتالي بيبقى برضه فيه نفس كمية السعرات، حتى مابتبقاش القيمة الغذائية اللي فيه أفضل ولا حاجة.
عايز تتطمن بص على عدد السعرات اللي على العلبة وعلى حجمها هي كمان. إحنا طلع بيتضحك علينا يا جدعان.
9- منتج للتخسيس طبيعي 100%:
لا تكون فاكر إنه لمجرد إنه بيقول لك إنه منتج للتخسيس طبيعي أو مصنوع من الأعشاب يبقى أنت كده في الأمان. لأ أبسلوتلي (بصوت اللمبي). المنتجات دي في الغالب بتكون مش مختبرة علميًا وبالتالي مانقدرش نقول هي آمنة ولا لأ أو بتعمل مفعول فعلًا ولا لأ.
يعني مثلًا فيه منتجات عشبية كانت بتحتوي على مادة اسمها الإفيدرين. المادة دي منعتها الحكومة الأمريكية، لإنها بتسبب مشاكل صحية خطيرة وممكن تؤدي للوفاة. قوم إيه بقى، المصنعين بتوع المنتجات الجديدة بقوا بيعملوا منتجات بيقولوا إنها خالية من المادة دي، بس عادي جدًا ممكن تبقى المنتجات دي فيها مكونات تانية شبيهة للإفيدرين، يعني مش معنى إن المنتج خالي من الإفيدرين إن مامنوش خطر.
على العموم أي منتج بيقولوا لك عليه إنه بيضمن فقدان سريع للوزن ودائم يبقى في أحسن الظروف مابيعملش حاجة، وفي أسوأها خطير. (الصورة مثال للتوضيح فقط)
10 – عايز تخس؟ فوّت وجبات:
بالعكس بقى، لإنك احتمال لما تاكل وجبات أقل، تحس بالجوع أكتر بين كل وجبة والتانية، وبالتالي تاكل أكتر من العادي بتاعك. واحتمال كمان تكون الوجبات الكتير الصغيرة تكون بتساعدك على التحكم في شهيتك.
وفيه دراسات أظهرت إن الناس اللي بيفوّتوا الفطار وياكلوا مرات قليلة على مدار اليوم بيميلوا إنهم يكون أتقل من الناس اللي بتاكل فطار صحي وياكلوا أربع خمس مرات في اليوم.
ونتمنى لكم دايتًا متوازنًا معقولًا، وفقدان للوزن مقبولًا، وربنا يكفيكم شر الميزان والحلويات، ويضرب الظالمين منهم بالظالمين، ويخرجنا من بين أيديهم سالمين.
المصدر: well.wvu.edu CNN
