الكربوهيدرات: سكّر .. طبق الرز سكّر!
كتبت: يارا كمال
يا ترى كل الحاجات اللي مليانة سكر طعمها مسكّر؟ طب يا ترى أكل الكنافة الكتير ممكن يجيب لك سكر لكن طبق الرُز المحترم اللي على تمة عينه أمان؟ كلنا ممكن نكون عارفين إن الرُز مصدر مهم للكربوهيدرات، بس أعتقد أغلبنا مش عارفين إيه هي الكربوهيدرات.
إيه هي الكربوهيدرات؟
مبدئيًا كده، الكربوهيدرات هو الغذا اللي بنتناوله، عشان يمد جسمنا بالسكر. الكربوهيدرات هي الجزيئات اللي الجسم بيكسرها ويحللها عشان يحصل على السكر. فيه كربوهيدرات بسيطة وكربوهيدرات مركّبة حسب تركيبتها.
الكربوهيدرات البسيطة بتبقى يا إما سكر بسيط اسمه سكر أحادي (Monosaccharide) وده زي الجلوكوز والفركتوز والجلاكتوز، أو سكر ثنائي (Disaccharide) واللي بيتكوّن من اتنين من سكر أحادي أو سكر بسيط، وده بيكون زي اللاكتوز والمالتوز والسكروز. كل ده بيندرج تحت الكربوهيدرات البسيطة.
أما الكربوهيدرات المركّبة، فدي بتتكوّن من 3 أو أكتر من السكريات البسيطة مرتبطين ببعض ومصفوفين، لو عدد السكريات دي من 3 لـ10 يبقى اسم نوع الكربوهيدرات هنا ”سكر قليل“ (Oligosacchrides)، ولو أكتر من 10 يبقى اسمه ”سكر متعدد“ (Polysacchrides).
خلال الهضم، الجسم بيحلل الكربوهيدرات المركبة دي للوحدات اللي بتتكوّن منها واللي بتكون سكر بسيط (سكر أحادي)، وده اللي الخلايا بتستخدمه عشان الطاقة. عشان كده لما بناكل أي أكل غني بالكربوهيدرات، مستوى السكر في دمنا بيعلى. الفكرة بقى إن جسمنا مابيستجيبش للكربوهيدرات كلها بنفس الشكل.
يعني عندك مثلًا النشا والألياف. الاتنين سكريات متعددة، وبيستمدوا من النبات، والاتنين بيتكونوا من مئات الآلاف من السكريات البسيطة المرتبطين ببعض، الفكرة بقى في إن الروابط اللي بين السكريات البسيطة في كل واحد فيهم مختلفة، وبالتالي بيختلف تأثيرهم على الجسم.
في النشا، جزيئات الجلوكوز بيربط ما بينهم روابط ألفا، واللي أغلبها سهل تكسرها إنزيمات القناة الهضمية. لكن في الألياف، الروابط ما بين جزيئات السكر البسيط بتبقى روابط بيتا، واللي الجسم مابيقدرش يحللها. الألياف كمان ممكن تحصر شوية نشا وده بيمنعه من إنه يتكسّر، وده بنسميه (النشا المقاوم).
عشان كده الأكل الغني بالنشا زي المقرمشات والعيش الأبيض، بيتهضم بسهولة، وده بيطلق كمية كبيرة من الجلوكوز في دمك كإنك شربت حاجة فيها جلوكوز كتير زي المشروبات الغازية. الأنواع دي من الأكل عندها مؤشر جلايسيمي عالي (Glycemic index)، وده عبارة عن الكم اللي بيرفع بيه أكل معين مستوى السكر في الدم.
لكن في الأكل اللي مليان ألياف زي الخضروات والفاكهة والحبوب الكاملة، روابط بيتا اللي بيصعب تكسيرها وهضمها بتبطّأ إطلاق الجلوكوز في الدم. أهي الأكلات دي عندها مؤشر جلايسيمي منخفض، وأكلات زي اللحوم والجبنة والبيض عندها أقل مؤشر جلايسيمي.
كيفية إدارة السكر في الدم؟
لما السكر بيتحرّك من القناة الهضمية لمجرى الدم، الجسم بيبتدي يقوم باللازم عشان ينقل السكر للأنسجة، وهناك يمكن معالجته واستخدامه كطاقة.
الأنسولين، وده هرمون بيتخلّق في البنكرياس، هو واحد من الأدوات الأساسية في الجسم لإدارة السكر في الجسم. لما بتاكل والسكر يعلى في الدم، الأنسولين بيُفرز في الدم، عشان يحفّز عضلاتك والخلايا الدهنية في جسمك إنها تاخد الجلوكوز وتحوّله من سكر لطاقة.
الدرجة اللي بيقدر بيها الأنسولين يقلل السكر في الدم اسمها (الحساسية للأنسولين). لما الحساسية للأنسولين بتقل، ده بنسميه (مقاومة الأنسولين). اللي بيحصل إن البنكرياس بيبعت أنسولين للخلايا، وخصوصًا الخلايا العضلية، بس هي استجابتها ليه بتقل، وبالتالي السكر بيزيد في الدم، والأنسولين بيعلى.
لما تاكل كميات كبيرة من الكربوهيدرات بشكل مزمن (يعني مش مرة ولا اتنين، لأ ده الطبيعي بتاعك)، ده مع الوقت ممكن يسبب مقاومة الأنسولين.
وفيه علماء كتير بيعتقدوا إن مقاومة الأنسولين بيؤدي لحالة خطرة اسمها متلازمة التمثيل الغذائي (Metabolic syndrome)، ودي بتتضمّن مجموعة من الأعراض زي ارتفاع نسبة السكر في الدم وزيادة في محيط الوسط وارتفاع ضغط الدم. وده كمان ممكن يزوّد خطورة الإصابة بحالات زي أمراض القلب والأوعية الدموية ومرض السكر النوع 2. انتشار متلازمة التمثيل الغذائي بيزيد في العالم كله، و32% من تعداد سكان الولايات المتحدة الأمريكية عندهم متلازمة التمثيل الغذائي.
فخلي بالك، إن مش كل الحاجات اللي بتتحوّل في جسمك لسكر طعمها مسكّر.
المصدر:
