.
نوّرها

خالي من الكوليسترول ؟!

كتبت: يارا كمال

الكوليسترول كلمة بنشوفها على علب الزيت وأهالينا بيعانوا منه. بس أنا شخصيًا مكنتش فاهمة بالظبط إيه الكوليسترول ده؟ وكنت أسمع كمان على الكوليسترول الكويس والكوليسترول الضار، وكانوا بيحسسوني بجو التوأم الطيب والشرير، والبجعة البيضاء والسوداء، وجو ”كما بطن واحدة وتوأمين زين وشين“، وكلام من ده.

كوليسترول كلمة نغمها مخيف!

مادة شمعية شبيهة بالدهون وموجودة في كل خلايا الجسم. جسمنا بيحتاج شوية كوليسترول عشان يصنع الهرمونات وفيتامين د والمواد اللي بتساعدنا نهضم الأكل. الجسم بيقدر يصنع كل الكوليسترول اللي بيحتاجه، بس الكوليسترول موجود في بعض الأطعمة اللي بناكلها.

الكوليسترول بيمشي مع تيار الدم في حزم صغيرة اسمها البروتينات الدهنية أو الشحمية (lipoproteins)، الحزم دي بتبقى من جوه دهون ومن بره بروتينات.

فيه نوعين من البروتينات الدهنية اللي بتنقل الكوليسترول عبر الجسم: واحدة منخفضة الكثافة (LDL)، والتانية عالية الكثافة (HDL)، ومهم إن الواحد مننا يكون عنده مستويات صحية من النوعين.

الكوليسترول اللي في هيئة بروتينات دهنية منخفضة الكثافة (LDL)، بيسموه الكوليسترول الضار، لإن ارتفاع مستوي الـ LDL بيؤدي لتراكم الكوليسترول في الشرايين. أما النوع التاني اللي هو الـ HDL، بيسموه الكوليسترول الجيد .. الكويس .. الحلو .. الأمور الشطور، وده لإنه بياخد الكوليسترول من كل أجزاء الجسم للكبد، عشان يتخلّص منه ويزيله من الجسم.

Screen-Shot-2014-05-29-at-1.46.50-PM

لما الكوليسترول بيعلى في الدم، ده ممكن يزوّد احتمالية الإصابة بمرض الشريان التاجي، ودي حالة بتتراكم فيها الترسبات جوه الشرايين التاجية اللي بتمد القلب بالدم. الترسبات دي بتتكون من الكوليسترول والدهون والكالسيوم ومواد تانية موجودة في الدم. لما الترسبات دي بتتراكم في الشرايين بتسبب تصلب الشرايين.

مع الوقت، الترسبات دي بتتصلب وبتضيّق الشرايين التاجية، وده بيحِد من سريان الدم المحمّل بالأكسجين للدم. وفي الآخر، المنطقة اللي فيها الترسبات دي بتتمزّق، وده بيسبب تكوين جلطة دم على سطح الترسبات. لو الجلطة دي كبيرة بشكل كافي، ممكن تسد بشكل كامل أو شبه كامل سريان الدم في الشريان التاجي، وده ممكن يسبب أزمة قلبية أو ذبحة. وممكن المشاكل دي تحصل مع الشرايين اللي مودّية الدم للمخ، وده ممكن يسبب سكتة دماغية.

المشكلة إن زيادة الكوليسترول في الدم ملهاش أي أعراض أو علامات، وبالتالي ماحدش هيعرف إن الكوليسترول في دمه عالي، إلا بالتحاليل الدورية بقى.

    طب إيه اللي ممكن يعلي كوليسترول في الدم؟

أولًا، الأكل غير الصحي، وخصوصًا الأكل اللي فيه دهون مشبَّعة (زي اللي موجودة في الدواجن واللحمة الحمرا ومنتجات الألبان كاملة الدسم).

ثانيًا، السجاير لإن فيها مادة كيماوية اسمها الأكرولين، بتمنع الـ HDL اللي بتنقل الكوليسترول من الترسبات الدهنية للكبد.

ثالثًا، مرض السكر وارتفاع ضغط الدم.

رابعًا، إن يبقى للعيلة تاريخ مرضي في السكتات الدماغية ومرض القلب. وفيه ناس عندها حالة وراثية اسمها فرط كوليسترول الدم العائلي، وده بيسبب إن الكوليسترول يكون عالي حتى عند المريض اللي بياكل أكل صحي.

healhty-food-lower-cholesterol-heart-dietiStock_000083145271_Medium

فيه بقى أكلات بتظبط الكوليسترول زي دقيق الشوفان لإنه بيحتوي على ألياف قابلة للذوبان، واللي بتقلل الكوليسترول الضار (LDL). ومن الأكلات برضه اللي فيها ألياف قابلة للذوبان التفاح والكمترى والخوخ والشعير. كمان الأسماك الدهنية اللي بتحتوي على الأوميجا 3 بتقلل ضغط الدم وخطر تكوين جلطات الدم، بس الأوميجا 3 مابتأثّرش في مستوى الكوليسترول الضار. الأسماك دي زي السردين والسلمون، بس المفروض الأسماك دي تتشوي مثلًا عشان مايتضافلهاش دهون غير صحية.

كمان المكسرات وخصوصًا عين الجمل واللوز بيحافظوا على سلامة الأوعية الدموية، ده غير الأفوكادو وزيت الزيتون المفيدين في تجنيب الجسم أضرار الكوليسترول. وطبعًا لو عايزين الكوليسترول يقل نلعب رياضة وبلاش كسل بقى. ها؟

المصادر:

nhlbi.nih    mayoclinic

nhs.uk    mayoclinic1

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى