.
نوّرها

هي ”شويكار“ كان عندها دسلكسيا؟

كتبت: يارا كمال

فاكرين ”صدفة بعضشي“ أو شويكار في مسرحية ”سيدتي الجميلة“، لما كانت بتقرا كل الجمل اللي بيقولها فؤاد المهندس غلط؟ الموقف كان بيضحّك، وفي الغالب صدفة كانت بتستهبل أو بتهرّج، ووارد برضه يكون عندها   ”دسلكسيا – Dyslexia“ أو عسر القراءة.

الناس بيفتكروا إن عسر القراءة ده بيكون ناتج عن إن اللي بيعانوا منه بيبقى عندهم مشكلة في رؤية الكلام، أو إنهم بيشوفوا الحروف أو الكلمات معكوسة، لكن المشكلة مش في الرؤية خالص، إنما في معالجة الكلام نفسه، جوا المخ لإن عسر القراءة هو اضطراب في المعالجة الصوتية.

المصابين بالدسلكسيا بيبقى عندهم مشكلة في فك تشفير اللغة، وفي التعامل معها كمان. فاكرين الفزورة بتاعة إيه الدولة الأجنبية اللي لما نحط على آخر حرف فيها نقطة تبقى اسم عالم؟ وبيطلع حلها ألشة في الآخر كدة إنها قطر ولو حطينا على الـ(ر) نقطة تبقى قطز، فأنت تقول له: هو قطز عالم؟ فيقول لك: يعني قطر هي اللي دولة أجنبية؟

اعرف أكتر| ”التعليم: إعادة شحن وتفريغ!“ كيف تستقبل عقول أطفالنا المعلومة؟

الدسلكسيا
صورة: Time Magazine

أهو اللعبة دي كلها ماتنفعش مع اللي عنده دسلكسيا، لإنه بيكون عنده صعوبة في إنه يلاحظ إن لو حرف مثلًا اتشال من كلمة معينة، هتطلع كلمة تانية، وكمان فيه صعوبة عنده مع قراءة الكلمات الطويلة والمعقدة، فلازم يقسّمها. كمان ممكن يتهجى كلمات بشكل غلط، فمثلًا كلمة زي Friends ممكن هو يتهجّاها Frens.

عسر القراءة أو الدسلكسيا مش حالة نادرة. فيه واحد من كل خمسة عنده دسلكسيا، بس بتفرق من حد للتاني، فممكن يكون حد عنده الحالة دي بشكل متوسط، وحد تاني عنده الحالة دي شديدة. زائد كمان إن الحالة دي ممكن تظهر في عدد من الأفراد في نفس العيلة.

وبالتالي بما إننا متعودين في المدارس، إن الطلبة يقروا سوا، فالمصابين بالدسلكسيا بيبقى عندهم صعوبة في إنهم يقروا بنفس السرعة، وإنهم يفهموا وهما بيقروا. يعني لو كنت بتنطط على صاحبك، لما كنت بتجيب درجة كويسة في امتحان الإملاء أو بتقرا من غير ما تغلط زيه، فأعرف إن ده كان غلط، وبرضه الآباء والأمهات بتوع “وإنت متطلعتش الأول ليه؟ ناقص إيد؟ ناقص رجل؟”، لازم يعرفوا إن في فروق فردية، لا تدل أبدًا عن إن ابنهم غبي أو فاشل.

اعرف أكتر| 5 أسباب تخلي المدرسة مكان سيء لصحة أولادك النفسية

سبب الحالة دي هو الطريقة اللي بيشتغل بيها المخ. فيه مفهوم اسمه ”Neurodiversity“ بيعتمد على إن مخ كل واحد فينا بيشتغل بطريقة مختلفة، وبالتالي ماينفعش كل واحد بيفكر بطريقة مختلفة نعتبره مريض أو معيوب، وخصوصًا إن فيه ناس مصابين بالدسلكسيا كانوا عباقرة وناجحين زي بيكاسو ومحمد علي والمخرج ستيفن سبيلبيرج اللي عامل ”الفك المفترس“ و”Jurassic Park“.

صورة: flickr

أول مرة كنت أعرف مصطلح دسلكسيا كان من صاحبة صاحبتي. كانت عاملة موضوع عنه في المجلة اللي كانت بتشتغل فيها، وبتقول إنها كانت مصابة بيه، وما شاء الله دلوقتي بتكتب في مجلة أهيه، يعني تفوقت في الكتابة اللي هي أصلًا كانت المشكلة في حد ذاتها.

المخ عندنا بيتقسّم لنصين: نص يمين ونص شمال. النص الشمال مسئول عن اللغة والحساب والعلوم والمنطق، والنص اليمين مسئول عن الابتكار والمزيكا والفن والحدس. الدراسات بتقول إن الناس اللي عندهم دسلكسيا بيعتمدوا في تفكيرهم أكتر على النص اليمين والفص الأمامي من المخ، عشان كدة الكلام لما بيدخل مخهم بياخد رحلة طويلة عشان يوصل للنص الشمال بتحصل فيه معالجة الكلمات.

اعرف أكتر| اضطراب فرط الحركة ونقص الانتباه .. بين المرض والميزة التطورية!

بس الموضوع له حل، وممكن الناس اللي عندهم دسلكسيا يحسّنوا قدرتهم على القراءة، بإنهم يتعلّموا بطرق تستخدم حواس كتيرة بشكل مكثّف، وعن طريق تحليل اللغة لمقاطع، واستخدام قواعد الهجاء، وبالطريقة دي قراءتهم تتحسّن. الموضوع كله مبني على إننا نتعامل مع الناس حوالينا على إنهم مختلفين، وبيتعلّموا بطريقة مختلفة، وإنهم مش كلهم ينفع معاهم طريقة التسميع بتاع الكتّاب، وإنهم يعيدوا ويزيدوا ورا المدرّس.

فلو افترضنا إن “صدفة بعضشي” فعلًا كانت مصابة بالدسلكسيا، هنلاقيها كانت بتمثّل بجسمها الكلام بس زي ما هي فهمته ”أنت نعجة وحصان“، وبالتالي لو كان فؤاد المهندس شرح لها الكلام الصح بنفس الطريقة، كان زمانها فهمت، بدليل إنها طلعت في الآخر ذكية وضحكت على ولي النعم!


المصادر: TED-Ed understood dyslexia nhs

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى