عن ”الكمانجة“: كإنه سحبة قوس في أوتار كمان!
كتبت: يارا كمال
الكمانجة دي هي النجمة اللي لو خدت دور البطولة هتسحر الناس، ولو كانت كومبارس جماعي هتدّي تقل للمقطوعة اللي بنسمعها. أنا دلوقتي بتعلّم أعزف كمانجة عشان لقيت إنه مش هينفع أبقى بحب الكمانجة أوي كده وماتعملش عزفها. فيه ناس بتعزف كمان شرقي وفيه غربي، والاتنين ليهم عشاقهم. يعني مين ينسى عزف الحفناوي أيام زمن الفن الجميل؟
أنا مثلًا ياسر عبد الرحمن عزفه ومزيكته كفيلة إنها تجنني وتجيب لي هلاوس، وأنا شخصيًا ماعرفش هو بيعزف على الكمانجة بإبرة ولا بيسحر لها ولا بيعمل إيه بالظبط فيها، ده غير محمود سرور اللي مرة سمعته بيعزف أغنية ”الدم“ بتاعة عمّار الشريعي، وكإنه بيغني الغنوة بكلماتها بكمانجته عشان ياخد جزء من روحنا معاه.
وفيه ناس بتحب الغربي زي مثلًا صاموئيل يارفينيان صاحب عزف الكمان الشهير في تراك Yanni الشهير ”until the last moment“، وطبعًا لكل واحد منّا تفضيلاته.
الكمانجة بتفرق عن الآلات الوترية التانية زي العود والجيتار إنها بتتعزف بقوس وطبعًا مش وحدها اللي كده، بس استخدام القوس بيدّي استرسال في النغمة. الكمانجة حضن، مسكتك ليها بتخلي اللحن يعدّي على روحك قبل ما يطلع للناس، وحركة القوس رايح جي بتخرط قلبك على أوتارها قربان. الكمانجة بتعيّط وتضحك وتتكلم وتسحر، ممكن تبقى ناعمة أوي أو يبقى قوسها زي السكاكين على الأوتار.
كان من الصعب إن الواحد يبقى بيعزف كمان وهو مش عارف هي بتطّلع الصوت ده إزاي، كمان حسيت إنه هيكون لطيف لو اللي بيحبوا الكمان في المطلق عرفوا هي بتطلع الصوت ده إزاي برضه.
مبدئيًا كده لازم نفهم إن الموسيقى في الآخر صوت .. فيزياء يعني (للأسف). إيه هو الصوت؟ الصوت بيحصل نتيجة اهتزاز. الاهتزاز ده بيعمل اضطراب في جزيئات الهوا (أو المادة اللي بيتنقل فيها الصوت عمومًا). فجزيئات الهوا تتحرّك لقدام، وتضغط الجزيئات اللي بعدها، وده بيزوّد الضغط فيهم، والجزيئات دي تضغط اللي بعدها وهكذا. أهو الاضطراب ده بنسميه موجة صوتية.
عدد الاهتزازات اللي بتحصل في الثانية بنسميه (التردد). في عالم الموسيقى بقى، كل نغمة ليها تردد. طبعًا كل جزء في الكمانجة بيبقى بيخدّم على النغمات اللي طالعة دي.
يا عازف الكمانجة قول آه وعذّب الوتر
أينعم الأبنودي كان بيقول كده على الربابة، بس لو ماتقالش كده على الكمانجة، هنقوله على إيه؟
بتختلف النغمة في الكمانجة من وتر للتاني حسب كذا حاجة:
- تخن أو سمك الوتر: كل ما الوتر ما يكون أتخن، كل ما اهتزازه يكون ابطأ.
- شَدّة الوتر: عارفين المفاتيح اللي بتبقى في آخر الكمان؟ دي بتتحكّم في شَدّة الوتر، واللي بتختلف معاه النغمة.
- عازف الكمان بيحط صوابعه على أماكن محددة في الوتر، ليه؟ لأن هو كده بيغيّر طول الجزء اللي متاح له يهتز، وده بيتحكّم برضه في النغمة.
طبعًا القوس هو اللي بيدي الطاقة للوتر عشان يتهز وهو اللي بيدي النغمة دي استمرارية، وكمان بيسمح للعازف إنه يتحكم في ارتفاع الصوت والأداء نفسه.
بس يا ترى الكمانجة أوتار وقوس بس؟ الأوتار لوحدها مش هتعمل صوت أوي. اللي بيحوّل اهتزازات الأوتار لصوت هو الفرسة وجسم الكمانجة نفسه.
ياللي وسطك وسط كمانجة
فعلًا جسم الكمانجة ممكن يتقاس عليه موضة الكيرفي، بس بالرغم من رقة جسمها ده إلا إنه هو فعلًا اللي بيدّي لصوتها قوّة. الألواح المصنوع منها جسم الكمانجة والجوانب والهوا اللي جواها هما اللي بينقلوا اهتزاز الفرسة ويحولوها لاهتزازات في الهوا اللي حوالين الكمانجة نفسها.
أما وش الكمانجة أو اللوح الخشبي اللي من فوق (Belly) وضهرها (Back plate) فدول فيهم من المرونة اللي يخليهم يتهزوا لفوق وتحت.
الفرسة (Bridge)، اللي هي حتة الخشبة الصغيرة المزخرفة اللي بترفع الأوتار شوية دي، هي اللي بتوصّل طاقة اهتزاز الأوتار لجسم الكمان. أنا أحيانًا عشان أبويا مايولعش فيا وأنا بتدرّب في البيت، بحط مشبك غسيل في الفرسة عشان صوت الكمانجة يوطى، هي فيه حاجة مخصوص بتتحط اسمها (mute)، عشان توطي صوتها بس المشبك بيقوم بالواجب برضه.
الفرسة بتكون موجودة بين فتحتين في الكمانجة (f holes). الفتحتين دول ليهم وظيفتين: إنهم بيوصلوا الهوا اللي جوه الكمانجة بالهوا اللي براها، وإن الجزء اللي بين الفتحتين من وش الكمانجة (belly) بيقدر يتحرّك أكتر من أغلب الخشب اللي في باقي جسم الكمانجة.
فيه كمان جنب قاعدة الفرسة على طول عمود صغير كده اسمه ”Sound post“، بس من جوه جسمها بقى. العمود ده بيربط بين وش الكمانجة (Belly)، واللي بتكون مرنة، بضهرها (Back plate)، واللي بيكون أصلب. كمان العمود ده بيمنع وش الكمانجة (Belly) إنه ينهار نتيجة شَدّة الأوتار، زائد إنه بيجمع اهتزازات الألواح اللي بيتكوّن منها الجسم.
فيه حاجة كمان تحت اللوح الخشبي اللي فوق عند الفرسة برضه بس من جوه، بس على الناحية التانية من قاعدتها ومن الـsound post. الحاجة دي اسمها ”bass bar“. الجزء ده بينقل حركة الفرسة لمساحة كبيرة من الـBelly. لازم آلة موسيقية في جمال الكمان تكون بالدقة دي في الصنع. باختصار هي صالة كبيرة من خشب داخلها نور الشمس من فوق، تخشها تطير من جمال الصوت، وتبقى مش عايز تخرج.
المصادر:
