العرق اللي بتفرزه ده لمصلحتك.. صدقني!
كتب: أحمد حسين
بما إننا داخلين على الصيف، فإحنا لازم نتكلم عن حاجة مهمة غالبًا لا تقل أهمية عن وجود التكييف في حياتنا، ألا وهي ”العرق“، أي نعم! اللي دايمًا بيوصم بمليون حاجة سيئة على رأسها طبعًا فكرة الريحة الوحشة، على الرغم من إنه مظلوم في الموضوع ده لأن سبب الريحة الوحشة في الأساس هو وجود بكتيريا على الجلد بتتفاعل مع الميه اللي جسمنا بيخرجها فبينتج هذه الرائحة الكريهة علشان كده الدُش ضروري جدًا في الصيف.. ضروري ضروري ضروري قالها ثلاث ثم مات إثر الخنقة من الروايح في المترو!
إيه هو العرق ده من الأساس؟
هو عبارة عن مياه وكلوريد الصوديوم وبوتاسيوم مش أكتر. ”د. كريج كراندال“ أستاذ الباطنة بجماعة تكساس بيقول عن العرق إنه ماينفعش يعتبر مقياس دقيق للصحة، والسبب في ده إن كمية العرق اللي بتخرج بتختلف من شخص لشخص حسب عدد الغدد العرقية اللي موجودة في جسمه، الموضوع بيولوجي بحت وبيختلف من شخص لشخص، علشان كده صعب يتم تحديد نسبة مُعينة تكون هي النسبة الصحية للعرق مثلًا.
في 2010، اتعملت دراسة في اليابان موضوعها هو سؤال هل الرجالة والستات اللي بيمارسوا رياضية بيعرقوا أكتر من الناس اللي مابيمارسوش رياضة ولا لأ؟ والدراسة اكتشفت إن الناس الرياضيين مابيعرقوش أكتر ولا حاجة لكنهم بيعرقوا بشكل كبير في أثناء التمرين. ”د. يوشيميتسو اينو“، من جامعة أوساكا الدولية وأحد المشاركين في الدراسة، كمان قال إن الرجالة غالبًا بيعرقوا أكتر من الستات.
د. كاراندال قال إن الفرق بين الرياضيين وغير الرياضيين له علاقة مباشرة مع قدرة كل شخص على توليد الحرارة، فمستوى اللياقة المرتفع بيخليك تتمرن أكتر، وده بيولد مزيد من الحرارة، وبيؤدي بدوره لمزيد من العرق. وأضاف كمان إن الرجالة بيعرقوا أكتر من الستات لنفس السبب اللي بيعرق بيه المصابين بالسمنة أكتر من الناس الرفيعين مثلًا؛ حجم أجسامهم أكبر، فبينتجوا حرارة أكبر وده بيؤدي لإنتاج عرق أكتر.
أبحاث د. كاراندال أثبتت إنه الإنسان بيعرق أكتر بعد ما يقضي وقت في الأماكن اللي بيكون فيها مناخ حار، يعني مثلًا، الرياضي اللي بيتدرب في أفريقيا، هيعرق بشكل أكبر بكتير من اللي بيتدرب في أوروبا، باختصار، العرق مش واحد، وكله على حسب الشخصية وتكيّفها مع المناخ.
الحر والتدريب مش هما الحاجتين الوحيدين اللي بيخلوا الإنسان يعرق، في بعض الناس بيعرقوا لما بيكونوا عصبيين، بس الغدد اللي بتخرّج العرق في وقت العصبية مختلفة عن الغدد اللي بتخرّجه وقت التدريب أو وقت الحر لأن الغدد العرقية اللي بتعتبر حساسة للعواطف معظمها موجودة في منطقة الإبط والإيد (راحة اليد) والقدم.
في حالة بتصيب بعض البشر اسمها حالة ”فرط العرق – Hyperhidrosis“، الحالة دي بتؤدي بالمصاب بيها إلى إنه يعرق بشكل مفرط جدًا من كل جسمه أو من جزء معين منه. الحالة دي مختلفة عن حالة تانية الأطباء بيطلقوا عليها ”حالة العرق الخبيث“، ودي اللي بيتم فيها إفراز العرق نتيجة للمرض أو العدوى.
”د. آدم فاينمان“، طبيب الأمراض الجلدية في مدرسة جورج واشنطن للطب، بيقول إنه في بعض الأدوية ممكن تتسبب في إفراز العرق نتيجة لبعض الأمراض اللي بتصيب الغدد، فالأفضل للناس اللي بيحسوا إنهم بيعرقوا طول الوقت (صبح وليل) إنهم يستشيروا الطبيب في أسرع وقت لمعرفة حالتهم والاطمئنان برضه.
في النهاية، عايز أقول إن العرق ده اللي بنفرزه مابيشيلش السموم من الجسم زي ما بعض الناس فاهمين، يعني لو أكلت أكلة سريعة يعني وكانت مليانة مواد تُعتبر سامة للجسم، لما تعرق السموم اللي في الأكلة دي مش هتخرج وكده، فمفيش أي دليل علمي بيقول إنه العرق بيخرّج السموم من الجسم لحد دلوقتي.
المصاد
