7 معلومات عن نيوتن الفيزيائي العظيم: برلماني سابق ومحاضر ممل!
كتب: أحمد حسين
إسحاق نيوتن اسم مشهور جدًا، تقريبًا مفيش حد مايعرفش الاسم ده، سواء مرتبط بقصة التفاحة _اللي ممكن تكون مش حقيقية_ أو مرتبط بدراسة الفيزياء وقوانين نيوتن للحركة أو للجاذبية. في كل الحالات، الراجل معروف يعني ومش محتاج تعريف. بس للي مايعرفوش، نيوتن هو عالم فيزياء ورياضيات مشهور، اتولد يوم 25 ديسمبر سنة 1642، وعاش حوالي 82 سنة غيّر فيهم شكل الفيزياء النظرية تمامًا.
هنتكلم النهاردة عن حاجات جايز تكون مثيرة للاهتمام، في علم الراجل وفي حياته كمان، حاجات لطيفة مش لازم تكون فظيعة ولا حاجة، وأغلبها هتلاقيني كاتب قبلها “يُقال”، علشان الشخصيات التاريخية اللي زيّه، بيتناقل الناس قصصهم بكثير من الحقائق والقليل من الخيال، وماحدش بيكون عارف يفرّق أوي بين الاتنين، بس المعلومات الأساسية هنذكرها، أما الخيال فمتروك ليكم تعرفوه.
7 حاجات ممكن تحب تعرفها عن حياة نيوتن:
1. علاقة نيوتن بأمه كانت متوترة
والد إسحاق نيوتن توفّى قبل ما يتولد، وبعد ما إسحاق تم 3 سنوات والدته اتجوزت. عاش فترة مع جدته، بس كانت علاقته بأمه متوترة، وكانت متوترة أكتر بجوز أمه، ويُقال إنه كان كاره وجودهم لدرجة إنه كان بيتمنى يولّع في البيت وهما فيه. المهم إنه جوزها توفى أيضًا، بس العلاقة بينهم كانت مرتبكة، هو بعد ما كبر كان حابب يرضيها، وهي كانت مستغربة نجاحه في العلوم، وكان نفسها يبقى مزارع ولا ياخد باله من البيت أو أي حاجة تانية أفيد من موضوع العلوم ده.
2. قصة نيوتن والتفاحة؟ غالبًا ماحصلتش!
القصة اللي كانت بتتحكي لنا، عن نيوتن اللي قعد تحت شجرة، والتفاحة وقعت فوق راسه، طلعت مش كده بالظبط، أو يعني مش كده خالص. يُقال إنه سنة 1665 وبسبب الطاعون، جامعة كامبريدج قفلت أبوابها علشان مايساهموش في انتشار المرض، نيوتن واقف في جنينة بيته بيتأمّل، شاف تفاحة بتقع بعيد عنه، والموضوع أثار أفكاره وخياله، فبدأ يبحث لحد ما كتب قانون الجاذبية. بعض تلاميذ نيوتن نفوا القصة دي كمان، وقالوا إنه كان بيبحث عن موضوع الجاذبية ده، من غير تفاحة ولا غيره. ماحدش عارف الحقيقة بالظبط، لكن الأكيد إنه ما وقعش على راسه تفاحة ولا حاجة.
3. اتنين من قوانينه غيّروا وجه الفيزياء
سنة 1687 كتب نيوتن قانونين غيروا وجه الفيزياء النظرية خالص. الأول كان “قانون نيوتن الثاني للحركة”، اللي بينتمي لمجموعة قوانين الحركة الخاصة بنيوتن. القانون بيقول إن القوة بتساوي كتلة القصور الذاتي (مقاومة الجسم الساكن أو المتحرك للقوة) مضروبة في التسارع (Acceleration). يعني ببساطة، لو حاولت تجر عربية بعربية تانية، مقاومة العربية دي هتكون ضعيفة لو مفيش حد جواها.
أما القانون الثاني فهو “قانون الجذب العام”، اللي بيقول إن قوة التجاذب بتتناسب طرديًا مع حاصل ضرب كتلة كل جسم فيهم، وبتتناسب عكسيًا مع مربع المسافة بين مركز كل جسم فيهم. القانون ده فتح لنا آفاق جديدة، وخلانا ندرك إن في رابط، بين حركة الأجرام السماوية (زي الشمس والقمر)، وبين حياتنا على الأرض خلال النهار والليل، بسبب قوة التجاذب بينا وبين الأجرام دي.
اعرف أكتر| 6 معادلات فيزيائية غيّرت وجه التاريخ!
4. ناس كتير ماكانتش بتحب تحضر محاضراته
سنة 1669، نيوتن أصبح تاني شخص يحصل على لقب أستاذ لوكاسي أو يجلس على الكرسي اللوكاسي، وده أحد أرفع المناصب الخاصة بأستاذية الرياضيات والفيزياء في جامعة كامبريدج، ورقم 17 على الكرسي اللوكاسي كان ستيفن هوكينج بالمناسبة. المهم يعني، ساعتها كان نيوتن عنده 26 سنة، وفضل يدرّس حوالي 30 سنة، وطول المدة دي تقريبًا عدد قليل جدًا هو اللي كان بيحب يحضر له، لأنه ماكانش مهتم أوي بالتدريس، وكان مهتم أكتر بالأبحاث اللي بيعملها.
5. دخل البرلمان وخرج منه تاني
من سنة 1689 إلى 1690 دخل إسحاق نيوتن البرلمان الإنجليزي، ممثلًا لجامعة كامبريدج كما هو مُتّبع، إن الجامعة بيكون لها ممثل في البرلمان. المهم إنه خلال السنة دي، الراجل ماتكلمش ولا كلمة تقريبًا، وعلشان أكون مُنصف، يقال إن الراجل اتكلم مرة واحدة بس، وطلب من أحد العُمّال إنه يقفل الشباك لأن الجو برد. كتّر خيره والله 😀
6. كان عاوز حجر الفلاسفة!
بعيدًا عن اهتمامه بالعلوم سواء فيزياء أو رياضيات، الراجل كمان كان مهتم جدًا بالخيمياء، ولمن لا يعلم، الخيمياء فرع يُقال إنه أصل الكيمياء الحديثة، معني بدراسة ظواهر غريبة وغير علمية، زي إكسير الحياة وهو مشروب أسطوري المفروض بيمنحك الخلود، أو حجر الفلاسفة وده اللي يقدر يحوّل أي مادة -زي الرصاص مثلًا- لدهب، ودي كلها حاجة لحد دلوقتي تعتبر غير علمية، ومفيش دليل علمي عليها.
7. الكلب بتاعه حرق 20 سنة من الأبحاث!
القصة كالتالي، كان في شمعة على المكتب اللي بيشتغل عليه نيوتن، الكلب بتاعه خبط فيها، فحرق المكتب بالأبحاث اللي عليه، اللي نيوتن قضى فيها حوالي 20 سنة، تخيليوا 20 سنة فجأة يروحوا كده، بسبب حيوان بريء مالوش ذنب غير إنه بيلعب عادي. القصة دي يُقال إنه كتبها في مذكراته، ورغم كده، بعض المؤرخين بيقولوا إن ده ماحصلش، وإنه اللي حصل إن نيوتن فتح الشباك، والرياح جات وقّعت الشمعة على الأبحاث، واتحرقت فعلًا بس لا كان في كلب ولا حاجة خالص.
المصادر: history mentalfloss mentalfloss
