كتبت: يارا كمال

فاكرين كارتون ”باباي“ اللي كنا بنشوفه وإحنا صغيرين؟ باباي كان بيواجه فيه مجموعة من الأشرار خطفت حبيبته ”زيتونة“.  زيتونة كانت بتتخطف كل شوية عادي، ده كان روتين حياتهم أصلا­! فبطلنا الخارق كان  معاه دايمًا صفيحة سبانخ ياخد منها وقت اللزوم، قوم إيه عضلاته تكبر ويهزمهم كلهم. السبانخ كانت كلمة السر 😀

يا ترى إيه اللى خلى مبتكر شخصية ”باباي“ يختار السبانخ بالذات عشان تبقى الحاجة اللي بتديه القوة الخارقة دي؟

السبب في ده كان غلطة عملها عالم اسمه ”فون وولف“.  المفروض إن في كل 100 جرام سبانخ 3.5 ملليجرام حديد. ”فون وولف“ وبسبب غلطة في كتابة العلامة العشرية بقى كل 100 جرام سبانخ فيهم 35 مللي جرام حديد، يعني الكمية تضاعفت عشر مرات! الكلام ده حصل سنة 1870 م. والغلطة دي ماتعرفتش إلا سنة 1930 م!  

إحنا جايين نقر حقائق عن السبانخ 😀

الحقيقة، السبانخ مهياش أكتر خضار أو فاكهة فيه حديد، يعني مثلاً نص كوباية سبانخ مغلية فيها 2 مللي جرام حديد، وكوباية سبانخ نية فيها مللي جرام حديد (خلي بالك يعني المغلي أحسن)، في حين إن ربع كوباية مشمش مجفف فيها مللي جرام ونص حديد، وربع كوباية تين مجفف فيها 0.8 مللي جرام حديد، ونص كوباية بسلة مطبوخة فيها  1.26 مللي جرام حديد، وربع كوباية زبيب مجفف فيها 0.8 مللي جرام، وربع كوباية بروكلي مطبوخ فيها 0.6 مللي جرام حديد.

يعني السبانخ مالهاش فضل أوي على باقي الخضار والفاكهة، زائد إن أصلاً الحديد اللي في الفاكهة بيبقى مفيهوش مادة الهيموجلوبين اللي بتساعد على امتصاص الحديد (Non – Heme) على عكس اللحوم والأسماك والدواجن.

يعني جسمك بيمتص 30% من الحديد اللي في اللحمة وبيمتص من 2 لـ 10% من الحديد اللي في السبانخ، يعني باباي كان أكرم له ياكل فرخة مثلاً عن إنه ياكل سبانخ عشان يكتسب القوة. كمان الأوكسالات (وهي أملاح حمض اسمه حمض الأكساليك) اللي في السبانخ بتقلل امتصاص الحديد وامتصاص الكالسيوم ودا بيخليه يترسب في الجسم ويكوّن حصوات في الكلى.

بس ده لا يمنع إن للسبانخ فوايد تانية وإن فيها حديد. يعني السبانخ بتحتوي على من 30 لـ50% من مادتين اسمهم: لوتين و زياكسانثين ودول بيعملوا وقاية من أمراض العين اللي بتيجي في السن الكبير زي المية البيضة وحاجة اسمها الضمور البقعي وده مرض بيخلي الإنسان مايقدرش يشوف الحاجات اللي ادام عينيه مباشرةَ.

الخَضَار اللي فيه السبانخ ده مش من فراغ، ده كلوروفيل. ميزة الكلوروفيل إنه تركيبته الكيميائية تشبه تركيبة الهيموجلوبين. يعني 1- 2 % من وزن السبانخ كلوروفيل، لدرجة إن الجنود الفرنسيين أحياناً كانوا بيضيفولهم سبانخ على الخمرة عشان تعوض نزيف الإصابات. السبانخ فيها كمان فيتامين أ وفيتامين ك وحمض الفوليك.  فيتامين أ مضاد للأكسدة ومهم للنظر والمناعة والجلد والعضم.

مضادات الأكسدة: لما الجسم بيحوّل الأكل لطاقة بينتج معاه حاجة اسمها الشوارد الحرة (Free Radicals)، ودي مواد كيماوية شريرة بتسرق الإلكترونات من جزيئات الخلايا اللي في الجسم، وتغيّر في تركيبتها ووظيفتها والمادة الجينية اللي فيها. وده ممكن يسبب السرطان وفقدان البصر وتصلب وانسداد الشرايين. مضادات الأكسدة بقى بتدي الجزيئات الحرة دي الكترونات من عندها، فالجزيئات الحرة متاخدهاش من الخلايا).

فيتامين ك بيساعد على تجلط الدم وبناء العضم، والفوليت (اللي هو فيتامين ب بس قابل للذوبان) بيحمي من أمراض القلب والشرايين، وبيحمي الأطفال اللي لسه مولودين من مشاكل في بناء الجهاز العصبي عندهم (وده بسبب نقص الفوليت عن الأمهات خلال فترة الحمل)، وهو عموماً بيساعد في نمو المخ، وبيحمي من نوع من فقر الدم.  ده غير إن السبانخ مفيهاش كالوريز كتيرة ولا دهون، يعني لو بتعمل ريجيم كل وأنت متطمن بس طبعاُ مضمنلكش الحاجات التانية اللي معاها هتعمل فيك ايه.

من الآخر، مفيش أكل بيدي قوة خارقة للإنسان ولا فيه أكل فيه كل الفوايد اللي ربنا خلقها، بل بالعكس لو كترت في أكل حاجة معينة ممكن تضرك بدل ما تنفعك.

 المصادر: redcrossblood nei.nih udc.ndh oregonstate