الكلور في أحدث وصفات تفتيح البشرة!!

كتبت: مها طــه

“سمعتوا يا بنات عن وصفة الكلور لتفتيح الجسم 3 درجات ؟! أنا متأكدة إنكم مش مصدقين بس الحقيقة الوصفة طلعت مذهلة بجد، وقالها دكتور(…) بنفسه. كل ما عليكي إنك بس تملي البانيو وتحطي عليه فنجان صغير من الكلور اللي عندك في البيت وانقعي نفسك فيه 10 دقايق، 3 مرات في الأسبوع وهتبقي بيضة وفلة”

الكلام ده صادفني على واحد من أكبر المنتديات النسائية، وطبعًا كعادتي قلت إيه الهجص ده كلور إيه اللي أنقع نفسي فيه! أكيد طبعًا مفيش دكتور جلدية هيقول وصفة الكلور دي، ولأني بحب أتأكد قلت أما أبحث باسم الدكتور. وكانت المفاجأة يا جماعة، إن دكتور جلدية شهير جدًا، وأستاذ وأستشاري وكل الألقاب اللي بنحب نقولها دي، بيطلع في عدد كبير جدًا من برامج التليفزيون الشهيرة جدًا واللي بتحظى بنسب مشاهدة عالية، يقول وينصح بالوصفة دي!

وصفة الكلور للتفتيح .. دكتور جلدية ده ولا بتاع منظفات!

الحقيقة يا جماعة أنا اتصدمت بشكل كبير جدًا، إزاي طبيب متخصص في أمراض الجلدية والتجميل يقول كلام زي ده، وبدأت أشك في معلوماتي نفسها. طول عمري أعرف إن الكلور كغاز بيعتبر من الغازات السامة، وكسائل بيتم تخفيفه وخلطه بالمياه في محطات معالجة المياه عشان “يقتل” الخلايا البكتيرية ومسببات الأمراض، ده غير إن كلنا بنستخدمه لنفس الغرض في التنظيف والتعقيم.

بالبحث عن أثر الكلور عند خلطه بالمياه، ظهر إن الكلور كمادة بيتم إضافتها بشكل طبيعي للمياه العادية اللي بنستحمى بيها زي ما قلنا بغرض إنها تقتل البكتيريا ومسببات الأمراض وكده، وكمان بيستخدم في حمامات السباحة لنفس الغرض، لكن الحقيقة مفيش أي موقع طبي موثوق بيتكلم عن فكرة إننا ننقع نفسنا فيه عشان نبيض ونحلو وكده، بالعكس دول بيناقشوا احتمالات إنه يكون خطر في حالة الاستحمام أصلًا بالمياة العادية أو النزول لحمام السباحة.

غالبية حمامات السباحة بتخضع لمعايير معينة وقياسات لنسبة الكلور أول بأول لتجنُب أي أضرار محتملة. الكلور من المواد الكيميائية القوية واللي ممكن تأثر بالسلب على الجلد (البشرة) بشكل كبير، ومش بس كده ده ممكن يبقى أحد أهم أسباب تلف الشعر والبشرة، وده السبب في إن السباحين دايمًا بيعانوا من مشاكل في الجلد زي الجفاف والتقشير المستمر، وبالذات لو كانوا بيعانوا من الأكزيما أو جفاف الجلد.

الخبراء المتخصصين في العناية بالبشرة بيعتقدوا إن الكلور ممكن يتسبب في علامات مبكرة لشيخوخة الجلد مع مرور الوقت، لأننا لما بنكون في المية، مسام الجلد بتتفتح، والكلور بيقدر يوصل إلى خلايا الجلد، وده بالطبع ممكن يتسبب في جفاف سطح الجلد وتشققه، ويساعد على ظهور التجاعيد.

أضرار الكلور الموجود في مياه الاستحمام

طب ده بالنسبة للكلور في حمامات السباحة، أمال في الدش اليومي العادي ممكن يعمل إيه؟

طبعًا كلنا بعد يوم شغل طويل أو أسبوع متعب بنفكر في دش سخن أو دافي عشان نستمتع بالهدوء والاسترخاء، والحقيقة إنه على الرغم من مراعاة معايير معينة في نسب الكلور اللي بيتم بيها معالجة المياه قبل ما توصل للدش بتاع حضرتك، إلا إنه ده لا يمنع أبدًا إن الكلور الموجود ده وفي ظل درجة حرارة المياه المرتفعة شوية، هيتبخر وينتج عنه غاز الكلور.

بالنسبة بقى للبشرة، فالمياه السخنة دي بتساعد على فتح مسام الجلد أصلًا وبكده بتسمح لغاز الكلور المتبخر ده بالدخول للمسام المفتوحة دي، وفي الحالة دي طبعًا هيكون تركيزه أكتر من الموجود في حمام السباحة، نظرًا لإن المسام مفتوحة أكتر.

اللي بيحصل ده ممكن يتسبب في: جفاف الجلد، الهرش (الحكة)، حب الشباب، تهيج في الجلد، تغيير البيئة البكتيرية الطبيعية والصحية للجلد. وبالمناسبة أضرار الكلور الموجود في الاستحمام مش بس ليها تأثير على الجلد، ده الأخطر إنها ممكن تتسبب في أمراض تانية خطيرة على المدى الطويل زي الإصابة بالربو وبـحساسية الجهاز التنفسي كنتيجة لاستنشاق غاز الكلور بشكل كبير، والأخطر هو إن الكلور معروف كمادة مسرطنة أصلًا!

في دراسات أجراها مجموعة من الباحثين على 49 من الأشخاص البالغين الأصحاء بعد السباحة لمدة 40 دقيقة في حمام سباحة مغلق (مفيش تعرض للشمس) بيحتوي على الكلور، وبعدها سحبوا عينات منهم لتعيين وجود العلامات الحيوية اللي بتشير لاحتمالات الإصابة بالسرطان.

قال أحد الباحثين لـWebMD إنهم بالفعل وبعد تحليلهم لعينات من الدم والبول، لاحظوا زيادة في العلامات الحيوية المرتبطة بالسرطان، وأضاف إن التعرض لمياه حمام السباحة ارتبطت بزيادة واحدة من العلامات الحيوية دي لخمسة أضعاف، لكن طبعًا ده مش معناه إن السباحين كلهم محكوم عليهم بالإصابة بالسرطان يعني، لكن ده لا يمنع إنها بتزود احتمالات الإصابة عندهم بالسرطان أكتر من غيرهم، وأوصى ببعض النصايح ليهم.

رجوعًا بقى لموضوعنا عن وصفة الكلور للتجميل والحلاوة والتفتيح، تخيل حضرتك كل اللي إحنا قولناه ده مع حاجات عادية زي نزول حمام السباحة لمدة 40 دقيقة أو الاستحمام بدش دافي شوية، أومال لما الناس تسمع وصفة الكلور من حد زي “الدكتور” الشهير مع آفة التجويد كمان الموجودة عندنا كمصريين، ممكن تكون النتايج إيه؟!

ببساطة ممكن تلاقي عندك عروسة بدل ما تعمل “الوصفة” دي 3 مرات في الأسبوع، لأ 5 بقى، وبدل معلقتين كلور، لأ نحط 6 مثلًا! ده غير طبعًا إنها مش هتنزل في بانيو مياة ساقعة يعني، دي عشان تزود المفعول هتنقع نفسها في مية بتغلي بقى.

للأسف إحنا بنعاني من جهل مخلوط بالنصب وإدعاء المهنية والكلام باسم الطب عن وصفات آخرها تتقال داخل أحد الحمامات البلدي، ومش المفروض إنه يتصدق أصلًا، لكن إحنا بلوتنا جاية من كل الاتجاهات، وطبعًا مانقدرش نلوم أوي على البنات والستات اللي سمعوا الكلام ، لأنهم في النهاية خدوا الوصفة دي من “دكتور”!