ليه الرجالة بتصلع وبتقرع؟
كتب: أحمد حسين
بدون مقدمات وشرح كتير، الموضوع حزين بما فيه الكفاية. في الفترة الأخيرة كتير من الناس شاركوا في تحدي الـ10 سنين أو #10yearschallenge، وكانت الملاحظة الأشهر، إن البنات زادوا حلاوة والرجالة معظمهم اصلّع! دعونا بقى نطرح السؤال مباشرةً ”ليه الرجالة بتصلع وتقرع؟!“
أسباب الصلع عند الرجال
بالبحث توصلت إلى أن وقوع الشعر أو اختفائه يتم عن طريق محورين، الهرمونات والجينات. الهرمونات لأنها بتأثر في نمو الشعر بشكل أساسي، أو علشان نكون محددين أكتر في الكلام، هرمون التيستوستيرون هو السبب في نمو الشعر، وهو السبب في تساقطه.
فالصلع بيحصل نتيجة لإن بصيلات الشعر بتحول التيستوستيرون إلى ديهدروتستوستيرون، ولحد دلوقتي العماء مش عارفين سبب مؤكد يفسر اللي بيحصل ده، لكن الديهدروتستوستيرون ده بيخلي بصيلات الشعر تنكمش، وكلما انكمشت البصيلات، انكمش الشعر وسقط، لحد ما بتتوقف البصيلات عن إنتاج الشعر بشكل نهائي.
لذلك، الرجالة مُعرّضون للاصابة بالقرع أو الصلع بنسبة أكبر بكثير من نسبة السيدات، وده لأن جسم الرجل بيحتوي على نسبة تيستوستيرون أعلى بكثير من الموجودة عند الست، وده اللي بيسمح لجسم الست بإنتاج الاستروجين (هرمون الأنوثة) بنسبة أكبر بتخلي سقوط الشعر عند السيدات أصعب، إلا في حالة قلة إفراز الاستروجين في سن مُعين، وقتها بيبدأ شعر الستات يبقى اخف، وبدرجة بتقرب من الصلع أحيانًا لما تكبر أوي في السن.
الرجالة _بسبب التيستوستيرون برضه_ مُعرضون بشكل أكبر (بنسبة 6 إلى 1) إنهم يصابوا بمرض الثعلبة (سقوط الشعر من مقدمة الرأس أو من جانبها) ومرض الصلع الوراثي، واللي بيعتبر من الصفات المتأثرة بالجنس، بمعنى إنها صفة وراثية بتظهر بناءًا على تحفيز من الجسم بإنتاج هرمونات الذكورة. لكنه مازال أمر محير للعلماء لان الصلع ممكن تسببه مجموعة من الجينات مش واحد بس ممكن دراسته بسهولة.
أشارت بعض الدراسات، إلى أن جينات عدم سقوط الشعر موجودة في الكروموسوم X ، ولإن الرجالة تركيبهم الوراثي هو XY يعني عندهم كرموسوم X واحد بس، فهو معرض اكتر من الست للإصابة بالصلع زي ما شرحنا من شوية.
يعني مثلًا لو أخ وأخت الاتنين عندهم جين الصلع الوراثي، فالبنت ممكن ميظهرش عليها والولد يظهر عليه، لأن الولد عنده كرموسوم X واحد شايل جين الصلع وبالتالي الصفة هتظهر، أما البنت، فعشان يظهر عليها محتاجة الجين يتواجد على الكروموسومين الـX في نفس الوقت، وده طبعا صعب جدًا.
في بعض الجينات التانية اللي بتؤدي للصلع، زي الموجودة على الكروموسوم رقم 20، اللي بتخلي إحتمالية إصابة الرجالة بالصلع أعلى منها في الستات بحوالي 7 مرات زيادة. وعمومًا، في أسباب وراثية كتير ممكن تؤدي للإصابة بالصلع في الرجالة بشكل خاص.
لكن بلاش نيأس، الصلع مش بيقلل من جاذبيتنا العظيمة كرجالة، بالعكس ساعات بيبقى أحلى أصلًا، وفي كتير من الممثلين والمغنيين – الأكثر جاذبية في العالم – عندهم صلع أو بيحلقوا تمامًا، والحياة ماشية عادي يعني، وبروس ويلز أكيد من أحسن مننا، مثلًا!
المصادر: healthline webmd. mentalfloss
