الديمودكس: مش إنت الوحيد اللي بتستخدم وشك!
كتبت – يارا كمال
بتقرف من العناكب والعقارب والكلام ده؟ إنت ممكن تبقى متفهم فكرة إن فيه ميكروبات وبكتريا على وشك بس يكون عليه حشرات صعبة أوي. ممكن تقرف جداً وإنت بتقرا الكلام ده ووشك يهرشك زي ما حصل معايا. لكن في الحقيقة، فيه نوع من السوس بيعيش على وشك وجوه مسامه حياة كاملة واسمه (Mite).
السوس (Mite)
ده من العنكبيات (زي العناكب والعقارب). فيه أكتر من 48 ألف نوع من السوس، منهم حوالي 65 من جنس اسمه (Demodex) أو الدويديّة، منهم جنسين عايشين على وشك: (D.folliculorum) الدُّوَيدِيَّةُ الجُرَيبِيَّة ، (D.brevis) الدُّوَيدِيَّةُ الصَّغيرَة.
الكائنات دي طبعاً لا ترى بالعين المجردة عشان كدة عمرنا ماتعرفنا عليهم قبل كده. ما تحاولش تقوم تغسل وشك، لإن ده مش هيغيّر من الواقع حاجة. اعتبرهم أصدقاءك وارضى بالأمر الواقع.
هما شبه السجق شوية، وعندهم 8 رجلين في أول جسمهم. الطويلة اللي فيهم اللي هي D.folliculorum طولها تلت ملليمتر. الكائنات دي اكتشفت عام 1841 وبعدها بسنة قدر العلماء يحطوا توصيف مظبوط ليهم.
طب كل البشر عندهم الكائنات دي ولا يمكن الموضوع مرتبط بالنضافة؟ اللي العلماء متأكدين منه إنه الكائنات دي موجودة عند كل أجناس البشر، بس فرصة تواجدها عند البشر وهما أطفال قليلة جداً. يعني لو أنت سنك أقل من 20 سنة، فاحتمالية إنك تكون بتحمل الكائنات دي نسبتها 4% بس، لكن لو كبير في الغالب هي على وشك دلوقتي.
الكائنات دي بتبقى موجودة في بصيلات الشعر والرموش، والخدود والأنف والجبهة والدقن، وموجودة كمان في الودن، والصدر وأماكن تانية في الجسم.
السوس “انا عايش ومتعايش”!
الكائنات دي بتتغذى على الزيوت (عشان كدة بتعيش على وشوشنا بشكل أساسي)، فالجلد الجاف بيئة غير مناسبة بالنسبالهم، وبالتالي هما بيزيدوا في الصيف. بس الزيوت مش كافية لتغذيتهم، في عالم متخصص في السوس اسمه ”وليام نوتنج“، بيقول إنها بتتغذى على الخلايا اللي بتبقى حوالين بصيلات الشعر، وتمتص اللي جواها بإبرة قابلة للطي أو الانكماش في وسط بؤهم.
الكائنات دي بتتحرك في الضلمة وبتقف في النور العالي (قال يعني خايفة نشوفها). الكائنات دي رجليها قصيرة ، فممكن تاخد نص يوم عشان توصل من ودنك لحد مناخيرك مثلاً.
طب معلش إيه نظام عملية الإخراج عندهم عشان مش هيبقوا على وشوشنا ومعاهم فضلاتهم كمان. الكائنات دي لا بتتبول ولا بتتبرز – الحمد لله. هي معندهاش شرج أصلاً، وبتحتفظ بمخلفاتها جوة قناتها الهضمية. بس لما بيموتوا، جسمهم بيتحلل والمخلفات دي بتطلع.
بس للأسف الكائنات دي بتتكاثر فوق وشنا. عدد الذكور أكتر من عدد الإناث من 3 لـ 5 مرات. الإناث بتدفن نفسها، بعد تلقيح الذكور ليهم، جوة بصيلات الشعر أو الغدد الدهنية، وبعد نص يوم، بتبيض. بعد يومين ونص، البيض بيفقس. بعد ست أيام، السوس الصغيرين ده بيوصل لمرحلة البلوغ، وبيعيش حوالي خمس أيام كمان، يعني هي أعمارهم كلها بتلعب في حدود الأسبوعين.
يا ترى الكائنات دي جتلنا منين؟
مفيش شئ أكيد، بس المهم إن الـ D.brevis أقرب للسوس اللي عند الكلب من أختها الـ D.folliculorum، فممكن نكون أخدناها منه وفضلت تتنقلنا من جيل لجيل أو من أي حيوان مستأنس، بس مفيش دليل على الكلام ده.
طب يا ترى الكائنات مضرة ؟
والله المفروض إنها كائنات مسالمة، بس اللي يخلينا نشك في ده إنها بتبقى شايعة أكتر في خدود الناس اللي عندهم مرض اسمه ”وردية الوجه“(Rosacea)، وهو مرض من اسمه بيخلى الوش يحمر وفيه حبوب. يعني بيبقى فيه 12.8 سوسة في السنتيمتر مربع عند الناس المصابة، في حين إنه بيبقى فيه 0.7 في السنتيمتر مربع عند الناس اللي مش مصابين.
مانقدرش نأكد إن الكائنات دي هي اللي بتسبب المرض، بس ممكن يبقى فيه علاقة ما بينهم. يعني مثلاً فيه علاج للمرض ده اسمه ميترونيدازول، مع ذلك الكائنات دي بتقدر تعيش فيه وهو مركّز تركيز عالي كمان.
فيه علماء فسروا ده بإن المرض ده اللي بيسببه مش الكائنات دي نفسها إنما البكتريا اللي في المخلفات بتاعتها – اللي بتخرج بعد ما بتموت – هي اللي بتعمل كده، عشان كده المضادات الحيوية بتقتل البكتريا بس مبتقتلش الكائنات دي نفسها، وده برضه مش أكيد.
بس العلماء قدروا يستفيدوا من الكائنات دي في حاجة بعيدة جداً: إنهم يتتبعوا تاريخ الشعوب البشرية، وازاي اتفرقوا في الأرض، يعني مثلاً اكتشفوا إن الـ(D. brevis) اللي في اليابان مختلفة عن اللي في الأمريكتين، في حين إن الـ(D. folliculorum) مش مختلفة. ليه؟ لإن الـ(D. brevis) بتعيش جوة مسام الجلد، فمش سهل تتنقل وبتفضل محتفظة بخواصها، على عكس الـ(D. folliculorum) اللي بتعيش على السطح وبتنتشر عند أجناس من البشر كتير.
المصادر: news.ncsu medicalnewstoday healthline
