عن بلورات الثلج ومعدن الجليد!
كتبت: مها طه
أول ما نسمع كلمة معدن، الصورة اللى بتيجى فى بالنا هى الذهب، الفضة، النحاس وغيرهم من معادن. الحقيقة إن علماء الجيولوجيا بيصنفوا المواد على إنها معادن أو لأ عن طريق قاعدة معينة تعتمد على 5 شروط لازم تتوفر فى أى ماده عشان يتم اعتبارها معدن.
والشروط هي:
- إنها تكون مادة طبيعية (موجودة بشكل طبيعى فى البيئة).
- إنها تكون مادة غير عضوية (مش بينتجها أى كائن حى).
- إنها تكون مادة صلبة.
- تركيبها الكيميائى محدود (بتتكون من عدد قليل من العناصر).
- تركيبها الذرى منتظم (بتتكون من بللورات).
معدن الجليد: هل يمكن اعتبار المياه معدن؟
وفقا للـ5 شروط اللي اتكملنا عليهم ، هتبقى الإجابة طبعًا لأ، الماء مادة سائلة. مع ذلك بخفض درجة حرارته لصفر مئوية بيتحول لشكل صلب وهو ”الثلج“. مع تطبيق الشروط السابقة على الثلج، نجدها تنطبق عليه ماعدا الشرط الأول، لأن الثلج لا يوجد على هيئة صلبة بصورة طبيعية، لأنه ببساطه كان سائل (ماء) وتم تجميده.
أما الجليد الموجود فى المناطق المتجمدة، فهو موجود فى الطبيعة بالشكل ده وعشان كده ممكن اعتباره كنوع من المعادن. الجليد في أصله عبارة عن أمطار متساقطة فى أماكن درجات الحرارة فيها تحت الصفر، ونتيجة لكده بتتجمد وتتحول لرقائق من الثلج.لذلك اعتبر العلماء الماء مادة (شبه معدنية) لتوافر الشروط ماعدا كونه سائل، ومش بيتكون من بلّورات.
الجليد له نفس التركيب الكيميائى للماء، ولذلك فهو كمان عديم اللون، لكن الحقيقه إننا بنشوف الجليد باللون الأبيض بسبب بلوراته اللى بتعكس الأشعه الساقطة على جوانبها، وبالتالى ينتُج عنها ظهور اللون الأبيض.
شكل بلورات الجليد بيُعتببر من أكتر أشكال البلّورات إثارة للدهشة فعلًا، بتكون سداسية الشكل، كما إن مفيش بلورة جليدية على وجه الأرض تشبه التانية زي بصمة الإنسان كده، بالإضافه لإن شكلها حقيقي جميل ومميز. البلورات لما بتتجمع مع بعضها بتكون الجليد بالشكل اللي بنشوفه عليه.
إزاى الجليد بيتكون أصلًا؟
حبات المطر الموجودة فى السُحب الرعدية نتيجة لحركة الرياح بتبدأ جزيئات الماء الصغيرة الموجوده فيها تتجمد، وتتراكم فى شكل ثلج. لما وزن التلج ده يتقل، وماتقدرش السحب على حمله أكتر من كده، بيبدأ يتساقط _فى شكل جليد_ على الأرض. الجليد ممكن يوصل قطره لـ 13 سم تقريبًا، بيتجمع فى أماكن معينة.
أما الأنهار الجليدية فهى بتتكون نتيجة لتساقط الجليد فى مناطق درجة حرارتها منخفضه جدًا مع بقائه على حالته، ليبدأ بعدها في التراكم والتدفق فى شكل يشبه إلى حد كبير الأنهار. عند وصول الأنهار الجليدية لمكان فيه ماء تبدأ في تكوين ”الجبال الجليدية“.
