أحدث طرق الحماية من الخطف في أبليكاشن الموبايل
كتبت: مها طـه
أخبار خطف البنات والأطفال زادت جدًا في الفترة الأخيرة، وما بين كلام حقيقي فعلًا ومخيف وكلام تاني لمجرد الشهرة والـ”أي كلام“ وخلاص، لازم نعترف إنه بقى فعليًا في حالة من الخوف بتعيشها كتير من الامهات وهما خارجين مع أطفالهم أو بيعيشوها البنات نفسهم لو ماشيين في الشارع لوحدهم.
الوضع ده مش عندنا في مصر بس، في كتير من دول العالم ممكن يبقى المشي فيها بالليل لوحدك خطر، وده اللي دفع مجموعة من الطلاب في جامعة ميتشجان الأمريكية لإنهم يصمموا تطبيق ”APP“ على الموبايل، والهدف الوحيد منه هو الحماية من الخطف وإنك متبقاش لوحدك. إزاي هنعرف مع بعض.
تطبيق الرفيق .. الحماية من الخطف
عشرات الآلاف من الناس وفي جميع أنحاء العالم بدأوا في استخدام تطبيق السلامة الشخصية الجديد Companion app، واللي بيتيح لأصدقائك بالمشي معاك لحد البيت لو مروّح لوحدك بالليل، وده طبعًا افتراضيًا عن طريق استخدام تقنيات الواقع الافتراضي.
التطبيق صممه 5 طلاب في جامعة ميتشجان، والهدف منه كان توفير فكرة الحماية من الخطف ، وتحديد المكان اللي بيكون فيه الشخص عن طريق الـGPS على الخرائط الإلكترونية.
الطريقة دي بتسمح لأي شخص تختاره إنه يكون رفيق ليك، سواء كان صديق أو قريب أو ايًا كان، التطبيق ده مش محتاج إن الشخص التاني ينزله، كفاية إنك لوحدك اللي يبقى عندك التطبيق واللي بينزل لأنظمة الأندرويد والـiOS بشكل متاح ومجاني.
المُستخدم كمان ممكن يختار مجموعة من الأشخاص عشان يبعت لهم الطلب، وده عشان لو في حد مشغول أو غير متاح في الوقت ده، الأشخاص اللي بتختارهم بيتم إرسال رسالة نصية ليهم على موبايلاتهم بطلبك ومع الرسالة ”لينك“، واللي لما المُستقبِل بيفتحه بيلاقي نفسه على صفحة ويب ظاهر عليها خريطة تفاعلية هدفها إظهار مكان وطريقة مشي المُستخدِم.
لو المُستخدم اتغيرت وجهتهم أو طريقة مشيتهم زي إنه مثلًا وقع أو جري فجأة أو حتى شد سماعات الأذن من الموبايل، في الحال التطبيق بيكتشف التغيُرات دي، ويسأل المُستخدم هل هو بخير، لو كان المُستخدم فعلًا كويس بيدوس على علامة ”ok” في خلال 15 ثانية.
ولو ده محصلش فمعناه إنه ممكن يكون في مشكلة فعليًا، فالتطبيق بيحوّل الموبايل نفسه لنظام إنذار شخصي، بحيث إنه يصدر صوت عالي جدًا، كفيل لتخويف المجرم في الحالة دي، وكمان بيتيح ليك فكرة الاتصال بالشرطة.
التطبيق هو اللي بيتصل بالشرطة من موبايلك ومش بس كده ده طبعًا بيرسل تنبيه للشخص اللي إنت متواصل معاه، واللي طبعًا ممكن هو كمان بدوره يكلم الشرطة، ويقدر يحددلهم مكانك بالظبط، وكمان يقدر هو نفسه يكلمك ويتطمن عليك.
بالرغم من إن التطبيق في الأصل أمريكي، لكنه موجود في أنحاء العالم كله، وبالفعل التطبيق بقى مُستخدم في الممكلة المتحدة وبلجيكا وفرنسا والنرويج.
كل ردود الأفعال اللي وردت لمُصممي التطبيق كانت إيجابية، سواء من رجال أو نساء، لدرجة إن كتير من الآباء والأمهات قالوا إنهم عايزين يستخدموه مع أطفالهم، عشان يقدروا يحددوا مكانهم بالظبط، وبعض الناس قالوا إنهم ممكن يستخدموه مع آبائهم المسنين كمان، عشان يتأكدوا من إنهم بخير.
بالإضافة لفكرة استدعاء الشرطة والإحساس بالونس بوجود حد معاك ولو بشكل افتراضي، فالمُستخدم كمان ممكن يختار من التطبيق حالة ”أنا متوتر“، وده بيساعد التطبيق في إنه يعرف الحالة بالظبط اللي ممكن تكون فيها في خطر حقيقي، وقال المصممين إنهم بعد أسبوع واحد بس من انطلاق النسخة التانية من التطبيق، وردت ليهم 500 حالة من طُلاب جامعة كانوا في مواقف غير آمنة، وتدخل فيها التطبيق.
المصادر:
