هو النبات بيتنفس إيه؟
كتبت: مها طه
”هو النبات بيتنفس إيه؟“ لما سألت السؤال ده لطلبة في مدرسة إعدادية، الإجابة كانت ثانى أكسيد كربون! طيب، هو فعلًا النبات بيتنفس أكسجين بالليل بس؟ الحقيقة، الموضوع كان وقعه عليّا غريب، خاصةً لما سألتنا أصدقاء ليا نفس السؤال، ولقيت حيرة على وشهم مع عدم تأكد من الإجابة!
الحقيقه إن النبات كائن حى وبالتالى فهو بيتنفس أكسجين. الفكره الخاطئة السائدة عندنا عن النبات دى جت بسبب الخلط بين مفهوم البناء الضوئى ومفهوم تنفس النبات. البناء الضوئى والتنفس ما هما إلا عمليات حيوية منفصلة ولكنها مرتبطة ببعضها بشكل كبير في نفس الوقت، الارتباط ده مهم جدًا عشان تتم العمليتين بشكل سليم، لأن ببساطة المواد الناتجة عن أى العملية الأولى هى المواد اللى بتدخل فى تفاعل العملية التانية، والعكس. عمليتي البناء الضوئى والتنفس هما اللى بيحافظوا على التوازن البيئى المطلوب بين نسب الأكسجين وثانى أكسيد الكربون فى الجو. وبكده نقدر نقول إن البناء الضوئى يُعتبر العملية العكسية للتنفس.
عملية التنفس بيتم التعبير عنها بمعادلة إذا قمنا بعكسها تبقى هى المعادله اللى بتعبر عن البناء الضوئى:
البناء الضوئى بيحتاج لوجود ثانى أكسيد الكربون،وبينتُج عنه الأكسجين. أما عملية تنفس النبات فلازم لحدوثها وجود الأكسجين، وبينتُج عنها ثانى أكسيد الكربون.
الأكسجين الناتج من عملية البناء الضوئى بتستهلكه كل الكائنات الحيه تقريبًا، وعشان كده بتُعتبر النباتات بالإضافة لبعض الطحالب، وبعض الكائنات الأخرى اللى بتقوم بعملية البناء الضوئى هى مصدر الأكسجين الرئيسى على الأرض. النباتات بتستهلك غاز ثانى أكسيد الكربون اللى بينتُج عن عملية التنفس فى تكوين الغذاء اللازم ليها، عن طريق التفاعل الكيميائى بين ثانى أكسيد الكربون والماء فى وجود ضوء الشمس، اللى بيُعتبر عامل رئيسى مهم لإتمام عملية البناء الضوئى. فعليًا العملية دى بتتوقف بالليل، وبالتالى ففي النهار النبات بيقوم بعمليتي البناء الضوئى والتنفس، أما بالليل فهو بيتنفس فقط.
المصادر
