هل المخ هو العقل؟
كتب : احمد حسين
كتير بنخلط بين مفهوم العقل والمخ، والسؤال اللي بيطرح نفسه دايمًا هو هل فيه فرق بين العقل والمخ؟ وإذا كان فيه فرق يا ترى إيه هو؟
ما هو العقل وما هو المخ؟
المخ هو أهم جزء في الجهاز العصبي، هو المحرك الأساسي اللي بيرسل الإشارات العصبية لجميع أعضاء الجسم عن طريق الخلايا العصبية المتصلة بكل عضو، وهو المنظم لعمليات الإدراك والحس عن طريق الحواس المختلفة.
أما العقل فمفيش تعريف ثابت له، وجميع الباحثين عن تعريف للعقل وجدوا أن العقل هو الجزء المسئول عن المشاعر والتفكير والإبداع، لكن مفيش تعريف أساسي للعقل.
هل العقل جزء من المخ؟ وهل يتأثر المخ بالعقل والعقل بالمخ؟
كتير من العلماء _في مجال المخ والأعصاب_ بيعتقدوا أنهم جزء واحد لا يتجزّأ ولا ينفصل. لكن المخ ممكن يتأثر بالعقل، فالأمراض العقلية مثلًا عبارة عن حالات إنفعالية سلوكية خارجة عن الحد الطبيعي وغير مألوفة بالنسبة لمعظم البشر بحسب تعريف الدكتور ”سالم رشود“ أخصائي الأمراض العقلية.
صحيح الأمراض دي لا تؤثر على الأوردة أو الخلايا الموجودة في المخ، لكنها تؤثر على كيمياء المخ وإفرازه للهرمونات المختلفة، فلو كان المخ مسئول مثلًا عن إفراز هرمون السعادة (السيروتونين) فوجود مرض عقلي ممكن يؤثر على إفراز المخ الهرمون ده.
أما العقل فممكن يتأثر بالمخ، فلو أصاب المخ مرض من الأمراض العصبية، هيتأثر العقل بشكل مباشر، ويؤثر على تفكير الإنسان فيبقى مشوّش ويضطرب السلوك بشكل واضح.
إذن أين يقع العقل؟
الإجابة عن السؤال ده زي ما اتفقنا غير دقيقة، لأن العقل في الأساس شيء معنوي،بمعنى إننا منقدرش نلمسه ونتعامل معاه بشكل مباشر زي المخ كدة الموجود داخل الجمجمة، وقدر ببساطة نعرف تشريحه وأجزاءه المختلفة. ومع ذلك العلماء اعتبروا العقل جزء من المخ في النهاية.
إذن ما أهمية وجود العقل؟
أهمية وجوده غالبًا إنه المسئول عن المشاعر اللي بنحس بيها وعن طريقتنا في التفاعل معاها والتعبير عنها. مثلًا لما بنتعرض وإحنا صغيرين للسعة من النار، بنحس باللسعة وندرك إنها مؤلمة وبالتالي بيتخزن في مشاعرنا (عقلنا)، فنتفاعل مع الشعور ده بعد كدة بالبعد عن مصدر النار.
وكمان زي السقوط من أماكن مرتفعة، فندرك عن طريق العقل أنه ممكن يصيبنا بكسور مؤلمة، وفي الحالة دي هنقف على مسافة مناسبة من حدود المكان العالي، لتفادي العواقب اللي عقلنا أدركها.
فالعقل بالنسبة للمخ زي التردد بالنسبة للراديو، إحنا محتاجين الراديو (الشئ المادي) عشان نقدر نستقبل التردد (الشئ غير الملموس)، وكذلك محتاجين العقل عشان المخ يقدر يترجم الادراك ده لردود أفعال معينة، عشان التفاعل يتم وبكدة تكتمل الوظيفة.
أخيرًا، نقدر نقول إن المخ والعقل منفصلين من حيث المعنى والوظايف كمان، لكنهم متصلين بشكل ما، لأن دور كل منهم بيكمل دور التاني، وفي النهاية وجود المخ مهم لوجود العقل، ووجود العقل والادراك مهم لوظايف المخ.
المصادر: differencebetween brainpages Mind vs Brain
