مجدي يعقوب: من طبيب شاب ألهمه مرض عمته إلى منقذ للملايين ومُلهِم
كتبت: مها طه
زي النهاردة 16 نوفمبر سنة 1935، وفي مدينة بلبيس بمحافظة الشرقية، ولد الدكتور مجدي يعقوب، جرّاح القلب العظيم. الدكتور مجدي يعقوب هو واحد من أعظم جرّاحين القلب في العالم، وبيعتبر من الرواد في مجال زراعة الأنسجة وتجديد عضلة القلب وعلم زراعة الأعضاء.
فضلًا عن دوره العظيم في تخريج أجيال متميزة جدًا من أطباء القلب والجرّاحين، حيث يعمل كبروفيسور في الكلية الملكية في لندن.
والد الدكتور مجدي يعقوب كان أستاذ في الجراحة العامة، وهو اللي ألهمه عشان يكون طبيب بالأساس. في عمر 4 سنوات، شهد الدكتور مجدي يعقوب وفاة عمته العشرينية كنتيجة لمرض في القلب، وهو ما ألهمه عشان يتخصص تحديدًا في أمراض وجراحات القلب.
مسيرة دكتور مجدي يعقوب بدأت بالتحاقه بكلية الطب وهو في عمر 15 سنة بس واتخرج كطبيب من كلية طب قصر العيني سنة 1957، سنة 1962 انتقل دكتور مجدي يعقوب إلى لندن، وبدأ دراسة في كلية الجراحين الملكية في لندن.
أبرز أعمال مجدي يعقوب :
باعتباره واحد من رواد جراحة القلب في العالم، يعقوب طوّر كتير من التقنيات الحديثة في مجال زراعة القلب، وتحديدًا اللي بتشمل استخدام تقنيات النانو في مجال صمامات القلب، بالإضافة لأجهزة الاستشعار اللاسلكية لمرضى القلب، ده بالإضافة إلى إن دكتور مجدي يعقوب أول من وضع اجراءات خاصة لتحويل الصمامات في الأطفال المولودين بعيوب خلقية.
اعرف أكتر عن استخدام تقنية النانو في الطب من هنا.
سنة 1995، أسس دكتور مجدي يعقوب جمعية خيرية باسم ”سلسلة الأمل“، ومقرها في المملكة المتحدة. بتتعامل الجمعية مع الأطفال اللي بيعانوا من أمراض القلب في البلدان اللي مزقتها الحروب وفي البلدان النامية اللي بتفتقد للرعاية الطبية الكافية. يُذكر إن مؤسسة ”سلسلة الأمل“ أنشأت كتير من برامج التدريب والأبحاث في مصر وكتير من دول الشرق الأوسط.
سنة 2008 قام دكتور مجدي يعقوب بتأسيس مؤسسة مجدي يعقوب للقلب، واللي كانت أساس لمركز القلب في أسوان سنة 2009، بهدف تقديم الخدمات الطبية المجانية للمحتاجين، بالإضافة لمؤسسته، أسس في نفس السنة شبكة أبحاث مجدي يعقوب، وبناءًأ عليها تم إنشاء مركز أبحاث القلب والأوعية الدموية القطري بالتعاون مع مؤسسة قطر ومؤسسة حمد الطبية.
الجوائز والإنجازات في تاريخ مجدي يعقوب :
- الملكة إليزابيث التانية ملكة إنجلترا، منحت الدكتور مجدي يعقوب لقب ”سير“ سنة 1992 لمساهمته في الطب والجراحة.
- سنة 1998، حصل على زمالة أكاديمية العلوم الطبية عن عمله وتطويره لتقنيات رائدة في مجال أمراض القلب. وفي نفس السنة حصل على جائزة معهد تكساس للقلب، نظرًا للإنجاز العلمي اللي حققه في مجال أمراض القلب والأوعية الدموية.
- حصل على جائزة الزمالة الثانية سنة 1999 من الجمعية الملكية. منحته المملكة المتحدة جائزة الإنجاز المتميز مدى الحياة تقديرًا لمساهمته في الطب في نفس السنة.
- حصل دكتور مجدي يعقوب على كتير من الجوائز والألقاب والأوسمة، زي جائزة منظمة الصحة العالمية للخدمات الإنسانية سنة 2003، وكمان وسام الاستحقاق من الأكاديمية الدولية لعلوم القلب والأوعية الدموية، وجائزة الإنجاز مدى الحياة من الجمعية الدولية لزراعة القلب والرئة.
- سنة 2011 تم منح دكتور مجدي يعقوب وسام النيل في مصر، وتم منحه وسام الاستحقاق البريطاني من الملكة إليزابيث الثانية سنة 2014.
دكتور مجدي يعقوب هو مؤسس أكبر برنامج لزراعة القلب والرئة، حيث تم إجراء حوالي 2500 جراحة تحت رعاية البرنامج، كما أنه كتب أكتر من ألف مقال علمي، وساهم في تأليف العديد من الكتب لتوثيق أعماله.
دكتور مجدي يعقوب هو اللي قام بأول جراحة قلب مفتوح في نيجيريا سنة 1974، وفي سنة 1981، قام دكتور مجدي يعقوب بعملية زراعة قلب لمريض اسمه ”ديريك موريس“ اللي بعد كده تم تصنيفه كأطول شخص يعيش بعد إجراء عملية زراعة قلب، لأنه عاش 25 سنة بعد إجراء العملية.
سنة 2009 ظهرت قصة دكتور مجدي يعقوب مع ”هانا كلارك“ المراهقة ذات الـ16 سنة، واللي تم وصف حالتها بالمعجزة. ”هنا“وهي عمرها سنتين كانت بتواجه الموت لأن قلبها كان ضعيف جدًا لدرجة تخليه ببساطة مش قادر على ضخ الدم بشكل كافي، وكان الحل هو عملية زراعة قلب.
دكتور مجدي يعقوب فريقه الطبي قرروا وقتها إنها بدل ما ببساطة يشيلوا قلبها يزرعوا قلب جديد، لأ احتفظوا بقلبها الأصلي، وزراعة القلب الجديد عشان يقوم بالوظيفة المطلوبة لحد ما يقدر قلبها الأصلي يكتمل نموه ويُعيد بناء نفسه بالشكل المطلوب، ولما وصلت لسن 16 سنة تم إعادة قلبها الأصلي للعمل، عشان تبقى بكدة أول شخص في المملكة المتحدة يخضع لعملية زرع أعضاء معكوسة.
كل اللي فات ده ميجيش أي حاجة في إنسانية وعلم دكتور مجدي يعقوب، واللي بيُعتبر نموذج مُشرف مش بس لأي مصري، لكن لأي إنسان قادر يخدم البشرية بعلمه، ويفيد المحتاجين. لا أُنكر حبي وتقديري الشخصي للسير الدكتور الجرّاح العظيم مجدي يعقوب والنموذج الحقيقي للعالم.
المصادر: sir-magdi-h-yacoup egyptianstreets drmagdiyacoub scoopempire independent thefamouspeople
