عن ”الصدأ“ : الغسالة أكلتها البرومة!
كتبت: مها طه
”الغساله أكلتها البرومه “! تعبير كتير بنسمعه خصوصًا زمان، يعنى إيه أكلتها البرومة؟ ببساطة يعني صدت (ظهر عليها طبقة من صدأ) وهنا هنتكلم عن إيه هو الصدأ ؟ وليه بتتكون أو بيظهر؟
الأصح علميا إننا نقول على العملية دى اسم ”التآكل“ واللي مش بس بتحصل فى المعادن لكنها كمان بتحصل لمواد تانية. تآكل المعادن هو عملية طبيعية بتحصل للمعدن النقي عشان يوصل لتركيب كيميائى أكثر ثباتًا، بمعنى أن تقل قدرته على التفاعل مع أي مواد أخرى. أما التآكل نفسه عمومًا، فهو عملية بينتُج عنها تدمير فى الماده نفسها عن طريق تفاعلها الكيميائي مع البيئة المحيطة بها.
أشهر مثال فى العالم لتآكل المعادن بيتم عن طريق عمليات الأكسدة (يعنى التفاعل مع الأكسجين). صدأ الحديد مثلًا بيتم عن طريق تفاعل الحديد مع الأكسجين وتكوين أكاسيد أو أملاح من الحديد، وهي اللىي بتكون الطبقة البرتقالي المميز اللي بتغطي الحديد. عملية التأكل زى ما قولنا ممكن تحصل لمواد تانية زي السيراميك ولذلك كان مصطلح التأكل مناسب أكتر من الصدأ فى المعادن فقط، في عملية التأكل بتفقد المادة خصائصها من قوة ونفاذية المياه والغازات خلالها بالإضافه لتغيُر تركيبها.(1)
الكثير من المعادن بيتعرض للصدأ بمجرد تعرضه للهواء، ولأن عملية التآكل بتعتمد على حجم السطح المُعرض للهواء، فالتآكل ممكن يحصل فى جزء معين من المادة ويؤدى لشرخ أو حفرة أو يمتد لأجزاء كبيرة من المادة. تقريبًا كل المعادن قابلة للصدأ ما عدا النحاس والمعادن النفيسة (ذهب وفضة وبلاتين) لإنها بتوجد فى الطبيعة بصورة ثابتة كيميائيًا أصلًا، وبالتالي لا تتفاعل مع البيئه المحيطة. بعض المعادن زي ”الإستانلس ستيل“ عندها قدرة طبيعية على تكوين طبقة حماية بتقلل من عملية التآكل أو بتمنعها تمامًا لكن غالبًا المواد دي بتكون غالية جدًا، ولذلك بنلجأ لوسائل أخرى لحماية المعادن من التآكل، أو إزالة الصدأ من على الحديد عن طريق استعمال حمض الفسفوريك.(2)
بعض من أنواع التآكل:
1 – تآكل موحد (Uniform Corrosion): هو تآكل للمعدن بشكل عام بيحصل نتيجة تفاعل كيميائي بسيط ينتج عنه شكل موحد للصدأ.
2 – تآكل جلفانى (Galvanic Corrosion): تآكل بيحصل نتيجة تفاعل كيميائي بين معدنين مختلفيين (بيبقى زى البطارية بالظبط معدن فيهم بيعتبر قطب موجب و لثانى قطب سالب فى وجود مادة بتسمح بالتوصيل بينهم واللي بتبدأ تنقل الإلكترونات وساعتها بيحصل التفاعل الكيميائى).
3 – تآكل خيطى الشكل (Filiform Corrosion): هو تآكل بيحصل للأسطح المطلية بالدهانات عن طريق إن الرطوبة بتخترق طبقة الدهان وبتبدأ كمان تشققها وتظهر على السطح (اللي إحنا بنقول عليها إن الحيطه فيها رطوبة).
4 – تآكل خرسانى (Corrosion in Concrete): هو تآكل بيحصل للخرسانة اللي بتستخدم فى البناء لإنه بيدخل فى تركيبها مادة الصلب وبالتالى بتتعرض للصدأ.
5 – التآكل الميكروبى (Microbial Corrosion): هو تآكل بيحصل نتيجة نشاط بعض الميكروبات والكائنات الدقيقة وبيتم التعامل معاها بالمبيدات الحيوية أو بالطرق التقليدي لمنع التآكل.
أما وسائل حماية المواد والمعادن من التآكل غالبًا بتكون عن طريق تغطية سطح المادة بمادة عازلة تمنع تفاعلها الكيميائي مع البيئة المحيطة أو مواد بتقلل من معدل التفاعل الكيميائى.(3)
هل للتآكل أثر اقتصادي؟
للتآكل أثر اقتصادى كبير والخسائر الناتجة عنه ممكن تكون بالملايين. الصدأ يعتبر العامل الرئيسى فى انهيار الكباري والتسبب في الحوادث لأن الحديد لما بيصدأ كتلته بتزيد وبالتالي بيعتبر حمل على باقي الكوبري فيحصل الانهيار، كمان ممكن يحصل التآكل للخرسانه نفسها وبالتالي بيتعرض الكوبري لنفس خطر الانهيار، حاليًا بيتم استخدام أدوات بتقدر تحدد الأماكن اللي بيظهر فيها تآكل الخرسانة عشان يتم معالجتها وبالتالي يتم تفادي المشكله قبل حدوثها.
إيه المواد الغير معدنية القابلة للتآكل؟
فى مواد غير معدنيه قابله للتآكل زي السيراميك و الزجاج، مثلًا السيراميك بيعتبر من المواد اللى ممكن تتآكل مع الوقت عن طريق تحلل السيراميك أو دخوله فى تفاعل كيميائي مع المياه و مواد التنظيف وغيرها.
أما الزجاج فيعتبر مادة مقاومة للتآكل بسبب مقاومته العالية للماء وللمواد الكيميائية، لكن فى بعض الأحيان ممكن يحصل للزجاج تآكل عن طريق تغيُر درجة حموضة السائل المتفاعل مع الزجاج ، سواء بالزيادة أو النقصان، ويزداد معدل التآكل بزيادة فترة تعرض الزجاج لهذا السائل.(5)
و من هنا ممكن نقول إن مش بس المعادن اللي بيحصل لها صدأ أو تآكل، وإن التآكل عملية كبيرة بينتج عنها آثار كتير موجودة فى حياتنا اليومية وبنقابلها كتير.
المصادر
