علاقة الاكتئاب بالفقر!
كتبت: مها طه
أكيد مش محتاجين إثبات إن الفقر بيأثر بشكل مباشر على الحالة النفسية للشخص، لكن الجديد إن فى دراسة جديدة قام بيها فريق من جامعة واشنطن أظهرت إن الحالة المادية للآباء بيكون لها تأثير على دماغ الأطفال، وبتخليهم أكثر عرضة للإصابة بالاكتئاب.
فريق البحث قام بعمل رنين مغناطيسى لوظائف المخ لأطفال عمرهم بين 7 و 12 سنة، واكتشفوا إن المناطق الرئيسية فى المخ مرتبطة بشكل مختلف فى دماغ الأطفال الفقراء عن أقرانهم الأغنياء، المناطق دى فى المخ هي اللى بتتحكم فى قدرات الأطفال على التعلم وبتنظم مستويات التوتر والانفعالات.
قالت قائدة فريق البحث ”ديانا براش“ إن الدراسات السابقة اللى قام بيها فريق البحث وضحت إن الشكل التشريحى للمخ بيكون مختلف عند الأطفال الفقراء، حيث إن حجم الحصين واللوزة _أجزاء من المخ_ تغيرت بشكل كبير فى الأطفال اللي نشأوا فى ظروف مادية قاسية، وفى الدراسة دى وجدوا إن الطريقة اللى بتتواصل بيها الأجزاء دى مع باقى أجزاء المخ اختلفت بطريقة تؤثر بشكل كبير على تنظيم المشاعر والتوتر.
الدراسة كمان لقت إن الأطفال اللى نشأوا فقراء فى سن قبل دخول المدرسة كانوا مُعرضين أكتر للإصابة بالاكتئاب فى سن 9 أو 10 سنين بالمقارنة بالأطفال اللى نشأوا فى ظروف مادية أفضل. الفقر فى الدراسة دي تم قياسه عن طريق مقارنة الدخل بالاحتياجات، مع الأخذ فى الاعتبار عدد أفراد الأسرة، ومن المعروف طبعًا إن الأطفال لما بتنشأ فى بيئة فيها حرمان فده بيؤدى لمشاكل نفسية كبيرة وفرص تعليم أقل.
وبالرغم من إن العلماء مش لاقيين سبب للربط بين الفقر والتغير فى شكل المخ ووظائفه، إلا إن الباحثين افترضوا إنه ده نتيجة للعوامل البيئية زى التوتر وسوء التغذية والتعرض لدخان السجائر وغيرها من السموم بالإضافة للفرص التعليمية المحدودة، وحاليًا الباحثين فى جامعة واشنطن قادرين يوضحوا الطريقة اللى بيأثر بيها الفقر على اضطرابات المشاعر عن طريق الحصين _المسئول عن التعلم والذاكرة والمشاعر فى المخ_ واللوزة _المسئولة عن التوتر والانفعالات_. أثبتت الدراسة إن كل ما كان الطفل أفقر كل ما كان الترابط بين الأجزاء دي وباقي أجزاء المخ أضعف، وده لأن المناطق دى بيبقى حجمها أصغر.
المشكلة الحقيقية إنه حتى لو الأطفال دول تم تحسين أوضاعهم و تغذيتهم بشكل سليم ومحاولة إصلاح ده، فمفيش أي دليل علمي بيقول إنه ده ممكن يعمل تأثير عكسى ويحسن من وظايف المناطق دي.
ومع ذلك ده مش معناه إنه مفيش حل للمشكلة دي لأنه السنة اللي فاتت فى دراسة غير مسبوقة فى الولايات المتحدة أظهرت إنه تحسين الدخل قليلًا ممكن يؤدى لتأثير عظيم، 4 سنين فى مشروع بحثى لتحديد الصحة العقلية للأطفال الفقراء اللى عايشين فى ولاية كارولينا الشمالية، حيث إن ربع الأسر المشاركة فى البحث تم تزويد دخلهم بمقدار 4000 دولار للفرد سنويًا، وبعد 20 سنة الدراسة لقت إن الزيادة الطفيفة دي فى الدخل أدت لنتايج أفضل بكتير من الناحية العاطفية والسلوكية والعقلية مقارنة بأقرانهم.
وقالت ”براش“ إنه فى حاجات كتيرة ممكن تتعمل لتنمية الدماغ و التنمية العاطفية بشكل إيجابي، وإن الفقر مش شرط إنه يكون محدد لقدرات الطفل لكن لازم نقول إن التجارب اللى بيعيشها الانسان فى سن صغير بتأثر فى قدرة وظايف المخ و نموه العاطفي و السلوكي، وإنهم بيأملوا إن الدراسة تلفت النظر لضرورة التدخل لخلق ظروف أفضل للأطفال دول لتطوير قدرات المخ عندهم.
المصدر
