عرق النسا يبقى بييجي للنسا .. معروفة!
كتبت: يارا كمال
فاكرين لما فؤاد المهندس كان بيقول في مسرحية من مسرحياته: ”وعندي عِرق النِسا“، فالجمهور يضحك أوي أوي. ليه بيضحكوا؟ لإن ناس كتير بتربط ما بين اسم المرض وإن ليه علاقة بالستات (النساء يعني). يعني كإن راجل بيقول على نفسه إنه حامل أو نَفَسَة.
على فكرة بقى، أصلًا بقى ماسموش عرق النِسا. اسمه عرق النَسا، بالفتحة يعني، والموضوع مالوش أي علاقة بالستات.
العَرَض ده هو ألم بينتشر بطول عِرق النَسا أو العصب الوركي، وده العصب الأكبر في الجسم، وهو اللي بيتحكّم في العضلات اللي ورا الركبة وأسفل الساق، وهو اللي بنحس من خلاله بالمنطقة ورا الفخد وبجزء من أسفل الساق وبباطن القدم، بس الألم بيبقى في ناحية واحدة بس في الجسم أو ممكن يحس بضعف في المنطقة دي أو تنميل أو يبقى مش حاسس بيها.
الحالة دي ممكن تيجي بسبب الانزلاق الغضروفي (ما بين كل فقرة والتانية في العمود الفقري قرص بيبطّن الفقرات مليان مادة جيلاتينية. لما الأقراص دي بتتحلل، ممكن ده يسبب ألم نتيجة الاحتكاك ما بين الفقرات أو لو حصل ضغط على الضهر، وده ممكن يؤدي لتهيّج الأعصاب).
ممكن كمان يكون السبب حالة اسمها (تضيق العمود الفقري)، بمعنى إن العمود الفقري بيضيق وده بيعمل ضغط على النخاع الشوكي والأعصاب، أو إن المصاب يتعرّض لإصابة زي كسر في الحوض، أو بسبب نمو زائد في عظام العمود الفقري. وفيه حالات نادرة بيجيلها العرض ده نتيجة إن العصب فيه ورم ضاغط عليه أو لإن العصب حصل له تلف بسبب مرض زي السكر وفيه حالات كتير أصلًا مابيبقاش ليها سبب.
برغم إن الألم اللي بيتسبب فيه عرق النَسا بيكون شديد، لكن أغلب الحالات ممكن تتعالج من غير جراحة، لكن لو حد بيعاني من ضعف واضح في الرجل المتأثرة أو فيه تغيرات في المثانة أو الأمعاء، فده ممكن يحتاج جراحة.
ممكن الألم يبقى زي الصدمة الكهربائية. والألم بيبقى أسوأ مع الكحة أو العطس، وكمان القعدة لمدة طويلة بتزوّد الأعراض.
على العموم، عِرق النَسا لما بتكون أعراضه مش جامدة، بتروح لوحدها مع الوقت، بس لو استمرت أكتر من أسبوع روح للدكتور أو في حالة إنك ماعرفتش تتصرف مع الأعراض دي بنفسك. وفي حالات طارئة، لازم تروح له فيها فورًا، زي إنك تحس بوجع مفاجئ وشديد في أسفل الضهر أو أسفل الساق، وتنميل أو ضعف في رجلك أو لو حسيت بالألم ده بعد إصابة شديدة ناتجة عن حادثة مثلًا، أو لو فيه صعوبة في التحكم في مثانتك أو أمعائك.
ومن ضمن الحاجات اللي ممكن تزوّد احتمالية الإصابة بعِرق النَسا: السن ومشاكل العمود الفقري المتعلقة بيه، والبدانة لإنها ممكن تضغط على العمود الفقري، ووظيفتك كمان عليها عامل يعني لو بتسوق لفترات طويلة أو بتشيل حاجات تقيلة (يعني رجالة خالص أهوه مش نِسا ولا حاجة) أو لو بتقعد لفترات طويلة (زيي) وممكن كمان مرض السكر يعرضك لتلف العصب.
أهم حاجة إن لما الموضوع يستلزم استشارة طبيب زي ما ذكرنا من شوية، تروح على طول عشان عِرق النَسا لو تطوّر ممكن يسبب تلف دائم في العصب. والدكتور مش هيضحك على فكرة، لو طلع عندك عرق النَسا (لا قدر الله)، لإن عرق النَسا مش للسيدات فقط.
المصدر
