سبونج بوب آكل اللحوم!
كتب: أحمد حسين
أغلبنا تعامل مع الإسفنج ولو مرة واحدة على الأقل في حياته، وعادةً المرة دي بتكون في الأغراض المنزلية، وده بسبب طبيعة الإسفنج القادرة على سحب الماء (كل السوائل عمومًا) وطرده مرة تانية.
قطعة الإسفنج اللي في إيدك دي كانت في يومًا ما حيوان بيعيش في البحر، بيتغذى في أغلب الأوقات على الأجزاء الصغيرة من الشعب المرجانية _اللي بتنمو جانبه_ عن طريق المسام الموجودة على جسمه اللي بيستخدمها في سحب الماء إلى الداخل واختيار اللي يقدر يهضمه من محتوياتها، وبعدين يطرد باقي الماء بالأجزاء اللي ميقدرش يهضمها للخارج.
لكن يا ترى إيه اللي يحصل لو الاسفنج أكل اللحوم؟
سنة 2012، قام مجموعة من العلماء بأكاديمية كاليفورنيا للعلوم بجامعة فيكتوريا، ومجموعة تانية من العلماء من مختلف المعاهد المهتمة بدراسة البحريات بشكل عام باكتشاف نوع جديد من الاسفنج يطلق عليه ”الاسفنج القيثارة“ أو ”The harp sponge“،اللي بيعيش في عمق المحيط (حوالي 3.5 كم أسفل سطح المحيط). ولكن كان المدهش اكتشاف إن النوع ده من الإسفنج بيتغذى على اللحم، وبيقدر يهضمه بشكل طبيعي.
إزاي بيقدر يهضم اللحوم؟
الإجابة موجودة في تكوين ”الإسفنج القيثارة“، النوع ده من الإسفنج بيتكون من أشواك رفيعة تشبه العمود الفقري (وفوقها كرة صغيرة بتحتوي على الحيوانات منوية الخاصة بالاسفنج)، بنية الأشواك دي بتشبه لحد كبير اللاصقات الموجودة على الشنط والملابس الـ(velcro)، اللاصقات دي دورها إنها تلتقط المخلوقات البحرية الصغيرة الموجودة في عمق المحيط.
تخيل مثلًا، إن كائن صغير من فصيلة القشريات ليكن الجمبري مثلًا، مر بجانب النوع ده وتم التقاطه عن طريق الأشواك دي، إيه اللي يحصل؟ يبدأ الاسفنج في تحويل الجمبري الصغير لوجبة، يبدأ الاول في تغليفه عن طريق الغشاء الحيواني له (Membrane)، وبعدها بيبدأ في هضمه ببطء.
الأمر اللي لفت نظر العلماء لقدرة الإسفنج ده على أكل اللحوم وهضمها _بالرغم من شكل الإسفنج العادي بالنسبة لكائنات المحيط_ هو أنهم بعد ما أخذوا عينة من النوع ده من الإسفنج وتحليلها، اكشتفوا أن فيه بقايا من أحد الحيوانات القشرية مهضومة وموجودة جوا أنسجة النوع ده.
بالرغم من إن المحيط مكان مخيف، إلا أنك مش لازم تخاف لسببين،
أولًا: إننا مش بنتعامل مع النوع ده من الاسفنج،
ثانيًا: إن النوع ده موجود على عمق كبير جدًا غالبًا مش ممكن يوصل له الإنسان بسهولة، ده غير إن النوع ده حجمه صغير نسبيًا بالنسبة لحجم الإنسان العادي. وعشان كدة مفيش داعي للخوف يعني، وأكيد في حاجات أسوء بكثير في المحيط من مجرد إسفنج زي ده.
