رمضان والرياضة: متخليش حاجة توقفك!

كتبت: مها طه

رمضان السنة دي زيه زي السنين اللي فاتت جاي في الصيف والحر، وطبعًا بنبقى مفرهدين وحاسين بإرهاق طول اليوم تقريبًا، ومع ذلك ممكن تفتح التليفزيون تلاقي ماتش كورة أو أي رياضة تانية وتلاقي اللاعيبة صايمين عادي! فهل الصيام فعلًا ممكن يمنعنا من ممارسة الرياضة ولا إحنا اللي بنتدلع ومش مستحملين؟

معادلة الرياضة والصيام

لازم نعرف إن الصيام مش معناه الأنتخة ولا القعدة، إنت ممكن تمارس رياضة في رمضان عادي، لكن ده بيكون على حسب قدرة جسمك العضلية، وعمرك، وممارستك المستمرة للرياضة، يعني مثلًا بالنسبة للشخص العادي فكفاية جدًا نص ساعة مشي قبل الفطار بساعة مثلًا، المجهود البدني بالنسبة للشخص اللي مش متعود عليه ماينفعش يتعدي حدود التمارين الخفيفة.

بالنسبة للرياضيين الموضوع مختلف شوية، وعشان كدة لازم نشرحه من الأول، الشخص الرياضي بيحرق يوميًا سعرات حرارية أكتر من اللي بيحرقها الشخص العادي في أسبوع، وبالتالي فهو بيحتاج للأكل بشكل أكبر من الشخص العادي، وبالتالي أكيد بيجوع أكتر.

الحقيقة إن الخمول والإرهاق اللي بيصيب الشخص الرياضي هو هو اللي بيصيب الشخص العادي، لكن في الحقيقة الشخص الرياضي بيكون عنده دوافع نفسية أكبر بتخليه يقدر يتحمل ويحافظ على تركيزه بشكل أكبر ده بالإضافة لإنه طبقًا للأبحاث فالعطش مثلًا مش بيؤثر على الأداء الرياضي بأكتر من 2% بس.

الرياضة في رمضان

من أشهر الأمثلة للاعبين مسلمين قرروا يصوموا في رمضان والصيام ممنعش ممارستهم للرياضة ولا قلل من تركيزهم وأدائهم، هو اللاعب ”موي صبيحي“، بطل التجديف البريطاني من أصل مغربي، واللي حصل هو وفريقه على الميدالة الفضية في بطولة أوروبا، وحصل على الميدالة البرونزية في أولمبيات لندن 2012، والذهبية في يطولة العالم للتجديف، واللي قال إنه بيصوم عادي بالرغم من إنه أحيانًا ممكن يعاني من الإرهاق بسبب الصيام إلا إن أداؤه مش بيتأثر كتير بده.

واختلفت الآراء..

”إيما جاردنر“، خبيرة التغذية في المعهد الإنجليزي للرياضة، صرحت، لوكالة رويترز للأنباء، بإن التحدي اللي بيقابل الرياضيين في رمضان هو الحفاظ على مستوى المياه في الجسم، لإنهم بيبذلوا مجهود كبير وبالتالي بيفقدوا كميات مياه كبيرة، ومابيقدروش يعوضوها في وقتها، ده بالإضافة لمحاولة الحفاظ على مستويات الطاقة في الخلايا عشان يقدر الجسم يقوم بوظايفه.

وأضافت إن الكتلة العضلية للجسم بتُعتبر هي كمان مشكلة، لأن الأبحاث بتقول إنه في حالة الصيام لعدد من الساعات، فالجسم بيبدأ يحرق الأول السكريات المُعقدة الموجود في الجسم على شكل كربوهيدرات ويحولها لجلوكوز _أبسط جزئ سكر_، الجسم بعد كدة بيحرق الدهون عن طريق تحويلها لشكل الجلوكوز برضه، ولو الصيام طوّل شوية، الجسم بيبدأ يحرق كتلته العضلية.

لكن”جيري دفوراك“، الرئيس التنفيذي للقطاع الطبي في الاتحاد الدولي لكرة القدم (الفيفا)، مش متفق مع الكلام ده، وبيقول إنه من خلال متابعته الطبية للاعبين لقى إنهم مش بيعانوا من أي تدهور في صحتهم ولا نزول في مستوى الأداء خلال الصيام، وقال إنهم قاموا بدراسات مستفيضة لدراسة حالة اللاعبين وكلها قالت إنهم لو التزموا بالتعليمات الصحية للأكل والنوم، مش هيعانوا من أي مشاكل صحية أو مشاكل في الأداء.

التعليمات الصحية اللي لازم اللاعبين يلتزموا بيها هي إن التدريبات تبقى يا إما بدري جدًا بعد الشروق، أو بعد الفطار بحوالي ساعتين، لأن هي دي الأوقات المثالية اللي ممكن معاها تجنُب حدوث أي مشاكل صحية.

لكن وبالرغم من ده في لاعبين مسلمين بيفضلوا إنهم يفطروا في اليوم اللي عندهم فيه ماتش، خصوصًا لو بطولة كبيرة زي كاس العالم أو غيره، عشان يقدروا يحافظوا على طاقتهم ويأدوا المهمة بنجاح من غير ما الصيام يسبب لهم أي مشاكل، زي ”مسعود أوزيل“، لاعب المنتخب الألماني، واللي فضّل في خلال مشاركته في كاس العالم البرازيل 2014، واللي كان متزامن مع رمضان إنه يفطر عشان أداء المنتخب ميتأثرش بيه.

في الأخر خلينا متفقين إن كل جسم له طبيعة خاصة في النهاية، واللي ممكن حضرتك تتحمله ببساطة غير مُحتمل بالنسبة لغيرك، ممكن ماتقارنش نفسك كشخص مش رياضي بالرياضيين، لكنك في نفس الوقت لازم تحافظ على معدل يومي من أي نشاط بدني ولو خفيف عشان تضمن إن وزنك ميزيدش في رمضان، وعشان كمان تحافظ على مستوى لياقة بدنية كويس، يخليك تتمتع بصحة كويسة.

المصادر:  designntrend  bbc  bbc1