بات مان ولا سوبر مان؟! الخفاش طبعًا!
كتبت: يارا كمال
أيوة طبعًا ودول ييجوا إيه في حلاوة الخفاش الوطواطي ولا طعامة الخفاش الوطواطي؟! بطلنا نجم أفلام الرعب، الملك المتربع على عرش مملكة الظلام. إنه الخفاش. أيوه، اللي بيطلع من المغارة في برامج المقالب بتاعة رامز جلال، ويمسك في وشك، وبيقولوا كمان إنه هيمص دمك حتى أخر قطرة!
بس الحقيقة إحنا ظالمين الكائن ده والله، مع إنكم طالعين السما ببات مان يعني وعلى فكرة، ممكن أقلب عليه في ثانية عادي. أومال فين الحقيقة؟
الخفاش مش دراكولا .. أوي!
أول حاجة بتيجي في دماغك، إن الخفاش هيمسك فيك ويمص دمّك. لكن هل تعلم عزيزي اللي بتقرا إن فيه أكتر من 1200 نوع من الخفافيش، 3 بس منهم اللي بيمصوا دم كائنات تانية، وواحد من التلاتة دول بس اللي بيفضّل دم الثدييات، وحتى النوع ده في الغالب بيتغذى على دم المواشي، تمام؟ مش بس كده، ده كمان الخفافيش اللي بتمص الدم دي لقوا في لعابها مادة كيماوية اسمها ”Desmoteplase“، المادة دي بتحلل الجلطات، وبتتجرب في إنها تعالج مرضى السكتة الدماغية.
قرفت؟ وإيه داااه؟ وإزاي بناخد دوا من لعاب الخفافيش الدراكولا في نفسها دي؟ صحيح، الإنسان ناكر للجميل. الخفافيش مش بس بتساعدنا في علاج الجلطات، دي كمان بتاكل مصاصين الدماء اللي بحق وحقيقي: الناموس. حوالي 70% من الخفافيش بياكلوا حشرات.
الفكرة إنه برغم إن الناموس بيقرصك قرصة خفيفة وبيمص كمية دم قليلة، بس المشكلة إنه بينقل الأمراض عندكم أخرها فيروس ”زيكا“، اللي قالب دماغ العالم اليومين دول.
وبعدين هو مش بياكل كميات عادية وهو صغيّر كده، ده ولا المبيدات الحشرية والصاعق. الخفاش البني الصغنن الوحيد ده يقدر ياكل 1000 حشرة في الساعة الواحدة، وممكن مجموعة خفافيش من نوع اسمه ”Mexican Free-Tailed bats“ تاكل أطنان كتيرة من العتة في ليلة واحدة بس.
في الولايات المتحدة الأمريكية لوحدها، الخفافيش بتوفر 3.7 مليار دولار من خلال مكافحة الحشرات اللي ممكن تهاجم الزرع بدون استخدام المبيدات، وده مهم بالذات للناس اللي بتاكل اللي بتزرعه وبالتالي عايزين ياكلوا حاجة مفيهاش مبيدات. يعني من الآخر بتوفر فلوس وبتحافظ على صحة الناس.
الخفاش بيوفق راسين في الحلال
الخفاش شكله وحش، صح؟ شبه الفار، لأ وكمان بيطير، ولونه أسود كده، أو الرمادي الجربان ده، بس هو فعليًا فراشة أوي في نفسه.
معروف إن الحشرات اللي بتتغذى على الرحيق، بتساعد في تلقيح النباتات. كمان خفافيش الفاكهة ذات البيج سايز أو الحجم الكبير ليها دور مهم في تلقيح النباتات ونقل حبوب اللقاح والبذور بينهم، من خلال الانتقال بين الزهور وهي بتتغذى على الفاكهة والرحيق.
مثلًا، في جنوب شرق آسيا، فيه نوع من الخفافيش اسمه ”cave nectar bat“، هو الوحيد اللي بيلقّح ثمرة الدوريان (بينقل لها حبوب اللقاح يعني). فيه أنواع تانية من الخفافيش هي اللي بتلقّح الخوخ والموز، يعني من غير الخفافيش ماكنش زماننا دلوقتي مستمتعين بالأنواع دي من الفاكهة.
الخفاش الملهم
الخفاش ماخدمناش بس في قتل الناموس وتلقيح النباتات، لأ ده كمان ألهم الإنسان وخلاه يخترع حاجات مكانتش هتيجي على باله لو مكانش شافها في الخفاش، زي الروبتات الطائرة وطائرات التجسس الموفرة للطاقة. الخفاش هو الحيوان الوحيد في الثدييات اللي بيقدر يطير، يعني أكيد ملهم!
الخفاش .. فارس الظلام فعلًا
الخفافيش بتستخدم حاجة اسمها تحديد الموقع بالصدى ”Echolocation“، عشان يقدروا يتحركوا في الضلمة وكمان يلاقوا الفريسة. الطريقة دي تشبه فكرة السونار. مش معنى كده إن الخفاش أعمى زي ما فيه ناس بتفتكر. أبدًا، كل الخفافيش بتشوف، لأ ده كمان فيه بعضهم عنده عيون كبيرة عشان يقدروا يشوفوا في الضوء الخافت.
زيه زي الكلب.. ولكنكم تحبون الكفار إستايل!
فيه ناس بتخاف إن الخفافيش تسبب لهم أمراض، وهو بالفعل زي أي حيوان تاني ممكن يبقى بيحمل أمراض، زي مرض السعار أو داء الكلب (واللي على فكرة ممكن ييجي من أي حيوان ثدي)، كما إن أقل من 5% بس من الخفافيش اللي بيحمل المرض ده. فإشمعنى بقى نجيب كلب في البيت، ونخاف من الخفاش يعني؟
إحنا طول عمرنا بناخد بالمظاهر. خلينا نقول إنه لا بات مان ولا سوبر مان. هو الخفاش. صحيح، مش وسيم ومعصعص ومابيروحش الجيم، إلا إنه بطل وبيحمي العالم فعلًا. وعلى رأي ”فِل“ المدرب بتاع هرقل في كرتون ديزني، لما قال:”البطولة مش عضلات ومجانص .. أكبر من كده خالص .. في ضمير غايص في الروح“.
على العموم، كل كائن على وجه الأرض بطل بيحط التاتش بتاعه في البيئة عشان تفضل متوازنة وعشان راحتنا واستفادتنا كبشر. وتقريبًا كده إحنا الكائن الوحيد اللي بيخرّب للأسف!
المصدر
