.
حيّ يرزق

إيه اللي كان هيحصل لو رامز جاب تنين كومودو حقيقي؟!

كتب: أحمد حسين

السنة دي كالعادة رامز جلال راجع ببرنامج مقالب برضه، المرة دي الخطر مش طيّارة ولا سمكة قرش، الخطر المرة دي حيوان برّي يعتبر من أخطر 60 حيوان على وجه الأرض “تنين الكومودو” أضخم أنواع السحالي البرية على الأرض.

طبعًا لغير المحبين لرامز بمقالبه ومش بيهضموا حس الفكاهة اللذوذ ده، فطبعا رامز لابس بدلة الكومودو زي ما شوفنا في الإعلان، لأنه طبعا مايقدرش فعلًا يجيب الحيوان ده، كونه ممكن ياكل رامز بالضيوف بطاقم البرنامج كله!

تنين الكومودو “تمساح البر”

تنين الكومودو تنين كومودو، من السحالي البرمائية آكلة اللحوم، مش بيعيش غير في جزر كومودو الإندونيسية، طوله حوالي 3 متر ووزنه بيتراوح بين 100 إلى 135 كيلوجرام، الحيوان البري ده فضل سنين طويلة مجرد أسطورة لما كان بيتناقل الكلام عن التنانيين القوية اللي بتعيش في الجزيرة، لحد ما اكتشفها بالفعل الأوروبيين سنة 1912 وأطلقوا عليه اسم “تنين الكومودو”، في حين إن سُكّان الجزيرة بيقولوا عليهم “Ora” أو تمساح البر.

تنين كومودو

على الرغم من إن حركته بطيئة، لكن الكومودو ممكن يجري بسرعة 20 كيلو في الساعة لو كان بيطارد فريسة. الخطورة  الحقيقية بقى إنه ممكن يفترس أي شيء حتى لو كان أكبر من حجمه، جاموس برّي وجاموس بحري وغُزلان وخنازير وحتى البشر. مواطن القوة عنده في جلده السميك وديله القوي اللي بيستخدمه كوسيلة للدفاع والهجوم، وكمان أسنانه القوية ومخالبه الطويلة. الكومودو عضّته سامه وفكّه بيحتوي على بكتيريا قاتلة، فالفريسة اللي هتقع في إيده ويعضّها حتى لو بعدها هربت منه هتموت في خلال 24 ساعة.

اللي بيخلي الكومودو كمان من أخطر الحيوانات البرية على الأرض، إن نظره قوي جدًا، وبيقدر يشوف أي شيء على بُعد حوالي 300 متر، وعينه بتُلقط الحاجات المُتحركة أكتر من الثابتة، لذلك خبراء الحيوان بينصحوا أي حد يشوفه يقف ثابت وبهدوء.

في أحد برامج BBC، الطاقم حب يعرف قوّة عضة تنين الكومودو، ولقوا إنها أقوى 5 مرات من عضة الإنسان، ده غير إن حاسة الشم عنده قوية جدًا وبتقدر تشم اللحم والدم من مسافات بعيدة بس الحمد لله مابيسمعش كويس، زائد إنه يقدر ياكل تقريبًا كمية لحمة تساوي من 80% إلى 100% من وزنه، يعني من الاخر بياكل تُقل وزنه لحمة وبعدين يريّح مثلًا أسبوع وأكتر من غير أكل.

تنين كومودو

بالمناسبة، تنين الكومودو مش بينبش القبور زي ما البعض قال، لكنه بيقدر يشم ريحة الجيفة وياكلها لو وصلّها، لذلك سُكان جزيرة كومودو بيغطّوا قبور موتاهم بصخرة علشان مايقربلهاش، لأنه بيدفنوا الموتى في قبور مفتوحة أو مُفرّغة مش بتغطيها حاجة غير طبقة خفيفة من التراب أو القش.

تنين الكومودو يُعتبر من الحيوانات القليلة اللي مابيتمّش افتراسها، وفي الغالب بيموتوا موتة طبيعية بعد حوالي 20 سنة، خصوصًا البالغين منهم أما الصغار فممكن يتم افتراسهم من تنين الكومودو البالغ نفسه أو من حيوانات مفترسة أخرى، ورغم كل ده يُعتبر من الحيوانات المُهددة بالانقراض لتغير ظروف البيئة اللي بيعيش فيها ولأن البشر بيصطادوه، زيّه زي أي حيوان تاني البشر مش سايبينه في حاله، والنتيجة أهيه برنامج رامز جلال، ومش عارفين الدنيا مخبيّة لتنين الكومودو إيه تاني.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى