الكاتاتونيا التي أخرست نيللي كريم!
كتبت: يارا كمال
مع بداية رمضان وبداية المسلسلات، أو خلينا نقول مع بداية إعلانات المسلسلات السنة دي، وأنا حاسة إن نيللي كريم مش هتجيبها لبر، وخصوصًا لما عرفت إن مريم نعوم هي اللي كاتبة المسلسل، ده غير إنهم قالوا إنها دراما نفسية (حلاوته)، وقد كان.
برغم الأداء العظيم لنيللي كريم، إلا إن اللي بيبقى طالع عليا طول مانا بتفرّج على الحلقة:”بصوا حضراتكم ممكن تطلعوا تغزّوني بسكينة في بطني ونستريّح كلنا“.
ورغم إن نفسي الهشة لا تحتمل هذا الكم من الحزن والعذاب والألم، إلا إني لحقت التشخيص بتاع حالة نيللي كريم. الدكتور قال إن عندها كاتاتونيا أو ذهان تخشبي.
ولإني بثق جدًا في مريم نعوم، قلت أكيد دي حالة حقيقية، مش معقولة هيكونوا بيشتغلونا يعني، وقد كان برضه.
بس السؤال بقى إيه هي الكاتاتونيا؟
فيه عالم اسمه كارل كالبام (Karl Kahlbaum)، هو أول واحد وصف المتلازمة دي سنة 1874، وقال عنها إنها عبارة عن خلل في الأداء الحركي عند المريض وبتعتبر مرحلة في مرض تقدمي (يعني مرض بتفضل حالة المريض فيه تتدهور مع الوقت)، واللي بيتضمّن مراحل من الهوس، والاكتئاب والذهان، واللي بينتهي عادةً بالخرف.
ورغم إن الكاتاتونيا كتير بيربطوها بالسكيزوفرينيا أو الفُصام، لدرجة إنهم بيعتبروها نوع فرعي من الفصام، إلا إنها موجودة عند حوالي 10% من المرضي النفسيين بشكل حاد، قلة منهم بس اللي عندهم فصام. وعلى منتصف سبعينات القرن الماضي، كانوا فاقوا لفكرة إن الكتاتونيا كتير بترتبط بالاضطرابات المزاجية، ووصلوا بعد كده لإن 20% من المصابين بالهوس بيبقى عندهم أعراض الكتاتونيا. من الآخر يعني، الكتاتونيا مش مرض، هي مجموعة أعراض مرتبطة ببعضها. والكتاتونيا ممكن يكون تشخيصها فُصام أو اكتئاب أو هوس أو اضطرابات عضوية زي اضطرابات التمثيل الغذائي والصرع، أو العقاقير، أو الهيستريا، وممكن تكون الكتاتونيا مجهولة الأسباب.
أغلب المصابين بالكاتاتونيا بيبقى عندهم ذهان متزامن مع الحالة دي، والذهان هو فقدان الاتصال مع الواقع، يعني المريض بيه بيبقى عنده اعتقادات غلط عن اللي بيحصل حواليه أو بمعني آخر أوهام، وبيبقى عنده هلاوس (زي كده ما نيللي كانت بتكلّم أختها اللي المفروض إنها قتلتها أو على الأقل اللي اتقتلت).
خلونا نفهم أكتر شوية، إيه هي الكاتاتونيا، يعني إيه الأعراض اللي بتشكّلها، بس لو سمحت وأنا بكلمك عن أعراضها حاول تتخيّل أستاذة نيللي وتذرف الدموع معايا، ولو إنها مش هتسيب لك فرصة لإن فعلًا أعراض المتلازمة دي هي اللي بتعمله نيللي في المسلسل.
علامات الكتاتونيا هي:
- الصمت والتحديق (طبعًا ده واضح).
- الذهول، وده خليط من الصمت والجمود أو حاجة منهم. يعني أستاذة نيللي مش مابتتكلمش عشان ما أخدتش بقية أجرها ولا حاجة.
- البقاء على نفس الوضع لفترات طويلة، والمرونة الشمعية (waxy flexibility) يعني الشخص اللي بيفحص المريض يقدر يخليه في وضع مش مريح خالص والمريض يفضل ثابت عليه فترة كبيرة، أو إن المريض يقاوم محاولات الشخص اللي بيكشف عليه إنه يحرّك أجزاء من جسمه، بحيث تبقى المقاومة قد القوة اللي بتمارس عليه بالظبط.تبدو آخر علامتين عكس بعض صح؟ طب خدوا دي.
- تناقض الاستجابات (Ambitendency) ودي إن المريض أحيانًا يقاوم إرشادات الشخص اللي بيكشف عليه وأحيانًا يبقى متعاون معاه، يعني مثلًا لو الدكتور قال للمريض يسلّم عليه، هتلاقي المريض بشكل متكرر بيمد إيده ويسحبها تاني.
- المريض كمان بياخد وضع الاستلقاء لمدد طويلة بحيث تبقى راسه فوق سطح السرير بكام بوصة، وتلاقيه كمان بيقفش في إيد الشخص اللي معاه بقوة وبشكل متكرر.
- ممكن المريض في وسط حركته يوقفها فجأة بدون ما يقدر يقول سبب لده.
- ممكن كمان يجيله نفور من الدكتور مثلًا، بمعنى إنه بيبعد عنه.
- الحركات المتكررة اللي بدون هدف زي الاهتزاز أو المرجحة، أو تكرار حركة سببها الأصلي خلص خلاص.
- بيبقى عنده خلل في الكلام زي إنه يتكلّم بطريقة رتيبة ومش مترابطة ومتواصلة (Logorrhoea )، أو إنه يفضل يعيد كلمات أو مقاطع من كلمات أو جمل (Verbigeration).
- ممكن كمان المريض يعاني من الإغماء التخشبي (اتفضلي يا أستاذة نيللي، اعملي كده عشان أروح أنط من الشباك). ها، فيه حاجة تانية عايزينها؟
معنى كده إن نيللي كريم ممكن تعمل فينا أكتر من كده، تمام.
طب إيه الآلية اللي بتحصل بيها الكاتانونيا أو إيه سببها؟
والله مفيش حاجة واضحة أوي، كلها نظريات. فيه نظرية بتقول إن ممكن يكون ده ناتج عن نقص في حمض الغاما- أمينوبيوتيريك (GABA)، وده الناقل العصبي المثبط الأساسي في المخ، أو فرط في الجلوتامات، وده الناقل العصبي المثير الأساسي.
فيه نظرية تانية بتقول إن الكاتاتونيا نتيجة منع مفاجيء وكبير للدوبامين، اللي هو من هرمونات السعادة (واخد لي بالك).
وفيه نظرية كمان بتقول إن الكاتاتونيا المزمنة المرتبطة بخلل في الكلام، ممكن يكون سببها خلل في التمثيل الغذائي في الفصوص الأمامية من المخ والمهاد.
طب الحالة دي علاجها إيه؟
المصابين بالكتاتونيا بياخدوا عقاقير اسمها البنزوديازيبينات، ولما مابيتسجيبوش للعلاج بيتعمل لهم علاج بالكهربا. ده هيبقى مرار طافح. أنتوا فاكرين إن رمضان هيعدي علينا بسهولة كده واحنا بنتفرّج على ”سقوط حر“؟ لا ماتجيش.
المصادر:
ncbi.nlm.nih ajp.psychiatryonline
apt.rcpsych ncbi.nlm.nih1 nlm.nih
