شغالات النحل: بالروح.. بالدم نفديكي يا ملكة!
كتبت: مها طـه
في سلوك عجيب من نوعه قامت مجموعة من النحل بمطاردة سيارة إحدى السيدات وذلك في أثناء رحلة بحثهم عن ملكتهم! 😀
تخيل كده إنك تبقى ماشي بعربيتك في أمان الله وتلاقي سرب من النحل، شوية مهابيل بيطيروا حواليك ويطاردوك وإنت مش فاهم السبب أصلًا! في الحقيقة ده شئ مرعب جدًا بالنسبة لي.
ست بريطانية فوجئت بسرب نحل بيطارد العربية بتاعتها لمدة يومين! وبالبحث ورا السبب طلع إن الملكة بتاعتهم دخلت جوا شنطة العربية واتقفل عليها، وبالرغم من إن ده مُرعب جدًا، لكن شغالات النحل قدروا يتعرفوا على مكان الملكة من خلال ريحتها لأن ملكة النحل بتفرز فيرمونات _جزيئات كيميائية ليها ريحة مميزة_ فريدة من نوعها ومُختلفة عن اللي بتفرزها أجسام الشغالات.
الحادثة بدأت لما كانت ”كارول هاورث“ _سيدة بريطانية عندها 65 سنة_ خرجت من محمية طبيعية ومشيت على الطريق وفوجئت وقتها بحوالي 20 ألف نحلة بيطاردوها، حسب ما ذكرت الـBBC.
”توم موسى“، الحارس بالمحمية الطبيعية والمُهتم بالنحل، هو اللي رصد تعقُب النحل للعربية دي، وكان قلقان جدًا من إن حد يحاول يأذي النحل، زي إنه مثلًا يصب عليه مياه مغلية، لأن كل نحلة بتُعتبر كنز في حد ذاتها.. أه والله مش ده حقيقي.
تم استدعاء جمعية ”مربيّ النحل“ في المنطقة اللي فيها العربية، وقام ”موسى“ واتنين تانيين من مُربيّ النحل بالعمل مع بعض عشان يحاولوا يحاوطوا سرب النحل، ويحافظوا عليهم بأمان ويدخلوهم الصندوق اللي هيتنقلوه فيه للمحمية الطبيعية مرة تانية.
لحد دلوقتي الموضوع عادي وتحت السيطرة أهوه..
لكن المفاجاة كانت إن الست قامت من النوم تاني يوم لقت نفس السرب رجع تاني لنفس المكان! والسلوك ده كان مُحير جدًا للمسئولين عن المحمية واللي لقوا إن التفسير الوحيد للسلوك العجيب اللي قام بيه سرب النحل، هو إن الملكة بتاعتهم تكون اتحبست جوه شنطة العربية، أو إنها على الأقل سابت جزء من فيرموناتها في العربية دي، وعشان كده رجعوا تاني لنفس العربية. فالنحل بتمتع بقدرة عالية جدًا على الشم، واللي ممكن تتساوى مع قدرة الكلاب على الشم.
”روجر بيرنز“، واحد من مُربي النحل، صرح لـ”Metro“، بإنه يعتقد إن الملكة دخلت العربية دي بالغلط بعد انجذابها لشئ ما، ممكن يكون حاجة حلوة، وتكون اتحبست في العربية ومعرفتش تخرج منها، مما استدعى النحل لإنه يشم ريحتها ويخرج يدور عليها ويوصل للمكان اللي هي موجودة فيه.
”بيرنر“ قال إنه في خلال 30 سنة من عمله كمُربي للنحل، عمره في حياته ما شاف سرب بيتصرف بالشكل ده، وقال إنه من طبيعي إن الشغالات تحاول تتبُع الملكة، لكن فكرة إنهم يخرجوا بالأعداد دي وبالشكل ده مُثيرة جدًا، بالإضافة لإنهم مش بس خرجوا، دول كمان بعد ما تم استعادتهم خرجوا مرة تانية وراحوا لنفس المكان.
وفي الحقيقة ولحد دلوقتي مفيش حد اتأكد من سلوك النحل ده، ولا لقوا الملكة دي، إلا إنهم مهتمين جدًا بمحاولة تفسير السلوك ده، لأنه بالرغم من كل الضغوط والمخاطر اللي بتواجهها الحشرات طول الوقت، سواء من النشاط البشري والمبيدات الحشرية وغيرها، فكون سرب من النحل وبالعدد ده يقدر يخرج ويرجع تقريبًا من غير أي ضرر واقع عليه.
بالنسبة لي على الأقل النحل كائن مُبهر كله كده على بعضه، كفاية إني أقولك إن 75% من عمليات التلقيح بين النباتات بتتم عن طريقه، يعني من غيره ممكن مانلاقيش الأكل أصلًا، ولأن النحل بالفعل كائن مثير للإهتمام، فنصيحة مني لو مُهتم بالنحل وحابب تعرف قد إيه هو عبقري ومُثير للدهشة إقرأ المقال ده
المصادر:
sciencealert sciencealert1 telegraph.co.uk bbc.com sciencealert2 sciencealert3
