الحمض النووي: أنا 60% موز؟

Mahmoud Ali19 مايو، 2016

كتب: أحمد حسين

معظم اللي كانوا علمي علوم أو درسوا أحياء بتركيز يعني، عارفين إن الحمض النووي مركب أساسي موجود في الكائنات الحية كلها، وإن أجسامنا بتتكون من 3 بليون وحدة جينية، ودول اللي بيوصفونا وبيوصفوا إحنا مين بالظبط، وبما إن الحمض النووي هو الوحدة الأساسية المشتركة بين الكائنات، فطبيعي يكون في تشابهات بينا وبينهم، بس هل ده معناه إني اشترك في الحمض النووي مع الموز؟!

طبعًا الكلام ده وقعه غريب علينا، بس الحقيقة إن إحنا بنشترك مع حاجات تانية كتير غير الموز في الحمض النووي، وكل حاجة ونسبتها:

-أنت والبني آدمين التانية:

حضرتك بتشترك مع الراجل اللي قاعد جنبك في المترو في حوالي 99.9% من الحمض النووي. الكلام ده بينطبق علينا كلنا، إحنا بنشترك مع بعضنا في حوالي 99.9%، يعني متشابهين تقريبًا في كل حاجة، وباقي الجينات اللي مش مشتركين فيها دي هي اللي بتحدد الاختلافات، يعني لون الشعر، لون العين وكده. الفيزيائي ”ريكاردو ساباتيني“ قال إننا لو عملنا نسخة مكتوبة من الحمض النووي، فغالبًا هتتكتب في 262 ألف صفحة، أو ما يعادل 175 كتاب كبير، من بين كل الصفحات دي بقى، في 500 بس بنختلف بيهم عن بعض، والباقي شبه بعض بالظبط.

المصدر: المعهد القومي لأبحاث الجينوم البشري

-أنت مع لامؤاخذة الشمبانزي:

في 2005 اتعملت دراسة بتقول إن أقرب كائن حي لينا هو الشمبانزي، وبيتشابه معانا في حوالي 96% من الحمض النووي. يعني لو روحت جنينة الحيوانات، في يوم من الأيام وشوفت الشمبانزي، خليك فاكر إن الفرق مابينكم 4% من الحمض النووي بس، فبلاش استعلاء عليهم ع الفاضي ماشي.

المصدر: المعهد القومي لأبحاث الجينوم البشري

-أنت مع القطة:

في 2007 اتعملت دراسة بتقول إن التشابه ما بينا وما بين القطط في موضوع الحمض النووي ده بيوصل تقريبًا لنسبة 90%، وأقرب نوع لينا هو القط الحبشي/المصري Egyptian Mau، اللي هي شبه القطط اللي بتشوفهم في الشارع كده، واللي ليها رسومات على جدران المعابد الفرعونية.

المصدر: المعهد القومي لأبحاث الجينوم البشري

-أنت مع الفيران:

عندما يتعلق الأمر بجينات ترميز البروتين (Protin-encoding genes)، فحدثني عن نسبة الـ85% اللي بنتشابه بيها مع الفيران. أما لو هنتكلم بصراحة عن الجينات غير المشفرة (Non-coding genes) فالنسبة بتقل لـ50% فقط. وبحسب ”المعهد القومي لأبحاث الجينوم البشري“، فالموضوع ده موجود من حوالي 80 مليون سنة، من أيام أجداد أجداد أجدادنا.

المصدر: المعهد القومي لأبحاث الجينوم البشري

-أنت مع البقرة:

بحسب دراسة نشرت في 2009 في مجلة العلوم، فإحنا والبقر بنتشابه في 80% من الحمض النووي. والبقر عمومًا يعني شيء مش غريب علينا، حتى في أساطيرنا الفرعونية، كانت بتعتبرها الإلهة ”حتحور“ إلهة الأمومة والخصوبة شيء مهم جدًا لدرجة إنهم كانوا بيرمزوا للإلهة بالبقرة.

المصدر: مجلة العلوم

-أنت مع ذبابة الفاكهة:

فاكرين مسرحية ”سك على بناتك“ وموضوع ذبابة الفاكهة وسامح عبد الشكور؟ أهو سامح عبد الشكور وذبابة الفاكهة بيشتركوا بنسبة 61% في الحمض النووي، تحديدًا في جينات التسبب بالأمراض. اللي اكتشف الموضوع ده كانت وكالة ناسا، واكتشفوه بالصدفة لما كانوا بيدرسوا الحشرات علشان يعرفوا السفر ممكن يأثر إزاي على جيناتنا.

المصدر: ناسا

-أنت مع الفراخ:

إنت متخيل إننا بنتشارك في حوالي 60% من الحمض النووي مع الكائن اللي بتربيه جدتك فوق السطح؟ متخيل إن العلم بيقول إننا 60% فراخ؟!

المصدر: المعهد القومي لأبحاث الجينوم البشري

-أنت مع الموز:

نيجي بقى للمفيد، عارف الموز اللي إنت بتاكله ده؟ أهو ده لوحده بنشاركه بنسبة 60% تقريبًا من الحمض النووي. يعني خليك فاكر، إنك كل ما بتاكل موزة، فإنت كأنك بتاكل 60% من إنسان.. حظ سعيد المرة القادمة وإنت بتاكل موز.

المصدر: المعهد القومي لأبحاث الجينوم البشري