.
نوّرها

10 نساء أثّرن في تاريخ العلم «لو البشرية عايزة تفهم حاجة في الكون .. تسأل ماما»

كتبت: يارا كمال

جعان؟ هتسأل ماما هناكل إيه النهاردة. نازل من البيت؟ هتسأل ماما شراباتي فين. عيّان؟ هتسأل ماما آخد دوا إيه. الفكرة بقى إن ماما تعرف حاجات كتير في الكون، لو ماما هي رمز الست. المسألة مش بس في تدبير بيت، لأ كمان في دورهم في العلم والإضافة ليه، رغم القيود اللي بتبقى على بعضهم في إنهم يتعلموا أو يوصلوا لدرجات علمية عالية، غير مسئولياتهم تجاه أولادهم وبيوتهم. خلونا نعرف شوية عن 10 نماذج من ستات كتير أوي أثّروا في حياتنا بالعلم على سبيل المثال وليس الحصر للتأكيد.

(1) ماري كوري .. مدوّباهم اتنين!

ca. 1926, France --- Portrait of physicist Madame Marie Curie. She was the first woman to be awarded the Nobel Prize for physics for the work on radioactive elements with her husband Pierre. --- Image by © Hulton-Deutsch Collection/CORBIS

المصريين فخورين جدًا بإن 4 مصريين حصلوا على جايزة نوبل، طيب أحب أقول لكم إن ماري كوري أخدت جايزتين نوبل قبل كده، يعني نص نصيب مصر من الجوايز دي. الست دي قضّت حياتها في دراسة النشاط الإشعاعي، وهو نشاط الجزيئات اللي بتطلع من نواة الخلية، نتيجة عدم استقرار النواة.

ماري اتولدت سنة 1867، وماتت سنة 1934. اتولدت في الأصل في بولندا، بس راحت فرنسا عشان تدرس فيزياء ورياضيات في السوربون، وهناك قابلت بيير كوري، واللي كان أستاذ في مدرسة الفيزياء، وأصبح جوزها بعدها بسنة تقريبًا.  الاتنين اشتغلوا مع بعض على النشاط الإشعاعي في ظل إمكانيات معملية فقيرة وظروف صعبة، زائد إنهم كانوا كمان بيدرّسوا عشان يقدروا يعيشوا.

سنة 1898، اكتشفت ماري وجوزها مادتين مشعتين جداد وهما: البولونيوم والراديوم. حصلت أبحاث ماري وبيير على جايزة نوبل في الفيزياء بالمناصفة سنة 1903، وبعد ما بيير مات سنة 1906، كمّلت ماري المشوار وحصلت على جايزة نوبل للمرة التانية سنة 1911. مدام كوري درست النشاط الإشعاعي لكل المركبات، ووصلت للآتي:

  • إننا نقدر نقيس قوة النشاط الإشعاعي من خلال اليورانيوم.
  • إن شدة النشاط الإشعاعي لمركّب بتتناسب مع كم اليورانيوم أو الثوريوم اللي فيه.
  • إن الإشعاع مابيطلعش اعتمادًا على ترتيب الذرات اللي في الجزئ، لأ بيعتمد على باطن الذرة نفسها.

ولإن العلم موجود عشان يحمينا ويسعدنا، كان لأبحاث ماري دور كبير في تطوير أشعة إكس لاستخدامها في الجراحة. وفي الحرب العالمية الأولى، ماري ساعدت في إن عربيات الإسعاف يبقى فيها أجهزة أشعة إكس. مش بس كده، دي كمان ساقت عربية إسعاف للصفوف الأمامية.

ماري توفت بمرض اسمه فقر الدم اللاتنسجي بسبب التعرض للمواد المشعة، وده مرض بيخلي نخاع العضم ماينتجش كرات دم حمرا كفاية للجسم. مش عارفة إذا كان مهم بعد كل الإنجازات دي إني أقول لكم إنها أول ست تدرّس في السوربون ولا لأ. وعلى فكرة، بنت ماري ”إيرين“ هي كمان حصلت على جايزة نوبل في الكيمياء بالمناصفة مع جوزها، على جهودهم في تأليف عناصر مشعة جديدة، وكمان عن أبحاثها عن نشاط النيوترونات في العناصر الثقيلة، وده كان له دور كبير في اكتشاف انشطار اليورانيوم. وللأسف زي مامتها، ماتت إيرين بالسرطان نتيجة برضه التعرض للمواد المشعة.

(2) روزاليند فرانكلين .. يا ما في العلم مظاليم

rosalind-franklin-legacy-merl

روزاليند نموذج للعالمة والست الجميلة اللي روحها حلوة وبتحب السفر، بس للأسف اتظلمت. الست دي في عمرها القصيّر (1920 – 1958) قدرت تكتشف هيكل الـDNA، اللي هو الحمض النووي اللي بيحفظ صفاتنا الوراثية (اقرأ موضوع الـDNA )، عن طريق حاجة اسمها دراسة البلورات بأشعة إكس، اللي فيها بيحوّلوا المركبات لبلورات وبعدين يصوّروها بأشعة إكس.

الظلم فين بقى؟ إنه حصل بينها وبين زميل ليها اسمه موريس ويلكنز مشكلة، في الوقت اللي كان فيه اتنين باحيثن اسمهم ”فرانسيس كريك“ و”جيمس واتسون“ بيشتغلوا برضه على الـDNA. بقال إن ويلكنز خلاهم يشوفوا صور الـDNA اللي طلعتها روزاليند، واللي مكانتش لسه نشرتها. المهم كريك وواتسون نشروا هيكل الـDNA، والموضوع نُسِب ليهم خلاص. روزاليند ماتت بالسرطان سنة 1958، وبعدها بأربع سنين ويلكنز وواتسون وكريك خدوا جايزة نوبل عن اكتشافهم لهيكل الـDNA.

(3) سيسيليا هيلينا باين .. متخليش حاجة توقفك

Cecilia_Helena_Payne_Gaposchkin_(1900-1979)_(6891597275)

الست دي قدرت تتحدى الظروف اللي كانت بتواجه الستات وقتها. هي اتولدت سنة 1900، وماتت سنة 1979. درست في جامعة كامبريدج، بس مارضيوش يدوها الدرجة العلمية، لإنه في الوقت ده ماكنتش البنات بتحصل على درجات علمية. فسابت إنجلترا وراحت أمريكا، وخدت دكتوراه في علم الفلك من كلية رادكليف، ودي كانت أول دكتوراه تتاخد في المكان ده.

الست دي توصلت لإن الهيدروجين والهليوم هما أكتر عناصر متوفرة في النجوم، وكانت عالمة مهمة جدًا في دراسة هيكل مجرة درب التبانة، ودراسة النجوم المتغيرة (اللي بتغيّر سطوعها). كما إن سيسيليا هي أول ست تحصل على الأستاذية الكاملة من جامعة هارفارد، وتبقى رئيسة قسم هناك كمان.

(4) آدا بايرون .. مصائب قومٍ عند العلم فوائد

Ada_Lovelace_portrait

لو مكانش أبو وأم آدا سابوا بعض، مكانتش عملت لنا أول برنامج كمبيوتر في التاريخ! آدا عاشت من سنة 1815 لسنة 1852، كانت بنت اللورد بايرون اللي كان شاعر. لما أم آدا سابت أبوها، ماحبتش بنتها تبقى شاعرة زيه، عشان كدة بدأت تعلمها رياضيات من سن صغيّر، رغم إن البنات في الوقت ده في انجلترا كانوا ممنوعين من المشاركة في قاعات الدراسة. لكن آدا كانت واخدة من أبوها شوية، فكانت بتحب تمزج فهمها للعلم بالخيال والأسلوب الأدبي الجميل. لولا مامت آدا مكانش وصلنا لبرمجة الكمبيوتر دلوقتي وممكن آدا مكانتش هتبقى شاعرة عظيمة للدرجة.

في حفلة عشاء كانت عملاها ماري سوميرفيل، ودي كانت عالمة رياضيات وفلك وكاتبة وكانت بتشجّع آدا، سمعت آدا أفكار العالم تشارلز بابيج، وإنه عمل آلة اسمها ”Analytical Engine“ أو المحرّك التحليلي، وده نوع من الكمبيوترات اللي بتقدر تعمل حسابات معقدّة بالنسبة للوقت اللي ظهر فيه. آدا ترجمت مقال كتبه واحد إيطالي عن ابتكارات بالفرنساوي للإنجليزي، بس أضافت عليه ملاحظاتها وتنبؤاتها بإن هيكون فيه آلة بتلّحن مزيكا وتعمل جرافيكس وتستخدم في العلوم والحياة العملية. حاجة كدة مابنقومش من قدامها دلوقتي مش فاكرة اسمها ايه، وغالبا إنت بتقرا المقال عليها. إضافات آدا زوّدت المقال الأصلي اللي قامت بترجمته 3 أضعافه، ده غير أسلوبها الجميل في كتابته.

آدا اقترحت على تشارلز كتابة خطة إن إزاي الآلة اللي ابتكرها دي تقدر تحسب حاجة اسمها الأعداد البيرنولية، ودي أرقام لها خصائص حسابية معينة، وتعتبر الخطة دي أول برنامج كمبيوتر يتعمل في التاريخ، عشان كدة وزارة الدفاع الأمريكية لما عملت لغة برمجيات، سمتها ”آدا“ على اسمها. بس للأسف آدا كانت حياتها قصيرة وماتت بالسرطان وهي عندها 36 سنة.

(5) جريس هوبر .. استكمالًا لمسيرة آدا

صورة: Courtesy of Vassar Archives and Special Collections

رغم اختلافها عن آدا في الظروف وفي الشخصية، جريس هوبر برضه كان ليها دور كبير في برمجة الكمبيوتر. الست دي عاشت في القرن اللي فات من سنة 1906 لسنة 1992. اتولدت في عيلة عسكرية، جوزها مات في الحرب العالمية التانية، اشتركت في القوات البحرية الاحتياطية النسائية وأخدت رتبة ملازم. قبلها  كانت حصلت على دكتوراه من جامعة ييل، ودرّست في كلية فاسار اللي درست فيها رياضيات وفيزياء. الست دي قدرت تطوّر نظم البرمجة البدائية لحاجة اسمها التحويل البرمجي، وده عبارة عن برنامج وسيط بيحوّل الأوامر اللي مكتوبة بالإنجليزي للغة الكمبيوتر.

(6) هيدي لامار .. أيوة الممثلة!

1440_Hedy-Lamarr

عندنا غية كدة إننا نطلع العلماء والعالمات منكوشين ولابسين نضارة كعب كوباية وشكلهم وحش. طب إيه رأيك بقى إن هذه الفاتنة كانت عالمة؟ هيدي كانت ممثلة جميلة من أشهر نجمات هوليود. وهي السبب في الحاجة الشديدة للواي- فاي اللي بنحس بيها لدرجة إننا بنشمشم عليه. الست دي كانت عايزة  تساعد الحلفاء في الحرب العالمية التانية، فابتكرت حاجة اسمها ”نظام الاتصالات السري“.

توصلت هي وصديقها الملحن ”جورج أنثيل“ لطريقة تمنع الغواصات الألمانية من إنها تشوّش على إشارات الراديو بتاعة الحلفاء. الطريقة دي اسمها ”“القفز الترددي”، ودي اللي مبني عليها البلوتوث والـ GPS والواي – فاي دلوقتي.

(7) ريتا ليفي مونتالشيني .. للكتاكيت استخدامات أخرى

imgresize

ماذا تمثل لك أجنّة الفراخ؟ أكيد إنها هتبقى كتاكيت. بس بالنسبة لريتا، الأجنّة دي كانت حيوانات تجارب عشان توصل لعامل النمو بتاع الأعصاب ودي المادة المسئولة عن بقاء الخلايا العصبية ونمو وتجديد الخلايا العصبية التالفة.

الإنجاز ده أخدت عليه بالمناصفة مع زميلها ستانلي كوهين جايزة نوبل سنة 1986 . الست دي كانت إيطالية يهودية، عاشت أيام موسيليني وهتلر والحرب العالمية التانية، وعشان تقدر تستكمل أبحاثها عملت لنفسها معمل في أوضتها، والقنابل بتنزل حواليها وعادي الدنيا ماشية. بس في الآخر الست عاشت لحد ما إيطاليا أدِتها عضوية مجلس الشيوخ مدى الحياة، وما شاء الله عاشت لحد 2012 وماتت وهي عندها 103 سنة.

(8) باربرا ملكنتوك .. الأول (بصوت أنور وجدي في أمير الانتقام)

151106204131-09-barbara-mcclintock-restricted-exlarge-169

باربرا هي أول ست في الدنيا تاخد جايزة نوبل، لإنها عرفتنا إزاي فيه جينات متفعّلة وجينات تانية لأ، بمعنى إنه ليه إنت باباك عينه لونها أزرق ومامتك عينها سودا، فأنت تطلع عينك زرقا لباباك وعين أخوك سودا لمامتك. باربرا اكتشفت إن ده بيحصل عن طريق عملية اسمها ”Transposition“، يعني إن العناصر الجينية ممكن تغيّر مكانها على الكروموسوم (اقرأ موضوع الـDNA).

كنّا ممكن نتحرم من إنجاز زي ده لو كانت باربرا رضخت لتحكيم دماغ مامتها اللي كانت شايفة إنه مش من المنطق إنها تدفع فلوس عشان تودي بنتها الجامعة، بس باربرا أصرت إنها تدرس لأ دي كمان أخدت الدكتوراه في علم النبات من جامعة كورنيل، وعملت أبحاثها على الدرة الشامية.

(9) إيمي نويثر .. يهودية في زمن هتلر

صورة: arageek

أسوأ حاجة ممكن تحصل إنك تكون في وسط جماعة مغضوب عليهم، وخصوصًا لو اللي غضبان عليهم ده هتلر، وبالأخص بقى لو أنت شخص نابغ زي إيمي نويثر.

إيمي واحدة من اللي أسسوا علم الجبر المجرد، وده فرع في الرياضيات بيكتشف معادلات بتعبّر عن حاجات مش موجودة أساسًا في الواقع. آينشتاين بجلالة قدره قال عنها إنها أهم عباقرة الرياضيات من ساعة ما سمحوا للبنات يتعلموا تعليم عالي.

بس للأسف، أولًا لإنها ست فضلت سنين تدرّس في جامعة جوتنجين بدون أجر، لحد ما اعتمدوها كمحاضرة كاملة العضوية سنة 1919. وثانيًا، بعد الحكم النازي لألمانيا، اليهود اتفصلوا من المناصب الجامعية، بما فيهم هي، فتولت منصب في كلية برين ماور في بنسلفانيا، وعاشت هناك باقي حياتها.

(10) إنجي لمان .. الست اللي جابت بطن الأرض

Inge-Lehmann-l-hommage-de-Google-a-une-feministe-danoise_reference

الستات وصلوا حتى لأسرار الأرض. إنجي في سنة 1936، وصلت لإن لب الأرض بيتكوّن من لُب صلب محاط بلب سائل. في سنة 1970، عرفوا من خلال أجهزة قياس الزلازل إن كلامها كان صح. وبكده إنجي كسرت الاعتقاد السائد، إن لب الأرض سائل محاط بغطاء صلب وبعدين القشرة الأرضية.

إنجي ليها جملة ملقتش حاجة أحسن منها أختم بيها: ”يجب أن تعلموا كم من رجال غير أكفاء يجب أن أنافسهم بلا فائدة“. ورغم مرور سنين على الستات اللي ذكرناهم، إلا إن معتقدات البشرية، وخصوصًا عندنا هنا بتحصر الست في دورها في البيت زي ما هي، حتى من قبل ما البيت ده ما يتكون (وده غريب جدًا)، وشوفوا بقى ده ممكن يدمّر كم بنت كانوا ممكن يبقوا حاجة. طبيعي إن الست دورها كبير في البيت وتربية الأولاد بس ده لا يتعارض مع دورها في التاريخ.

بس عزاءنا الوحيد إن أي واحدة هيبقى عندها العبقرية والموهبة دي، صعب تتخلى عنهم وتسيب الظروف تغلبها زي اللي الستات العظيمة اللي اتكلمنا عنهم، ودول عينة بس، لكن فيه غيرهم أكتر.


المصادر: edition.cnn  eiu.edu  bbc  nobelprize  nobelprize  hyperphysics  nobelprize  businessinsider  nature   science.howstuffworks  cs.yale  math.wichita  adsabs  science  sdsc.edu  cs.yale  nytimes  scientificamerican  nature  today.uconn  e-education  telegraph

زر الذهاب إلى الأعلى