البقرة بتشرب إيه؟ البقرة بتشرب لبن!
كتبت – يارا كمال
اسأل أي حد فجأة السؤال ده ”البقرة بتشرب إيه؟“هتلاقيه بيقول ”البقرة بتشرب لبن!“ من غير أي تفكير، على أساس إن البقرة قربة مخرومة بتشرب لبن من ناحية، وبتنزله من الناحية التانية.
البقرة يا فندم عادي بتشرب ميه وبتاكل حشيش _اللي بيتاكل مش اللي بيتشرب_. البقرة مش بتبقى واخدة خوانة إننا احنا اللي هنشرب لبنها. هي جسمها بينتج لبن عشان بتبقى لسه والدة، فالبقر اللي لسه مولدش مبيبقاش فيه لبن يتحلب.
إحنا البشر بعد ما البقرة من دول تولد بكام يوم، بنبعد العجول الصغيرة عن أمهاتهم، ونديهم هما لبن مخفف ونخلطه ببدائل لبن عشان تزيد قيمته الغذائية. مؤذيين البشر دول، بس في الغالب العجول مابتتعبش من اللي الي بنعمله ده وبتشربه عادي وتستفيد منه.
البقرة مصنع لبن متحرك
البقرة جواها مصنع كبير هو اللي بيحوّل الحشيش اللي بتاكله للبن، لإن الحشيش بالنسبالنا مالوش لازمة، لإننا منقدرش نهضمه. رحلة اللبن بتنتهي عند الضرع أو ثدي البقرة.
الثدي بيحتوي على 4 غدد ثديية أو لبنية موجودين في آخر بطن البقرة قدام رجليها اللي ورا، حواليها كيس من الجلد اللي هو الضرع، آخره أربع حلمات اللي الفلاحة بتضغط عليهم عشان ينزلوا لبن، كل حلمة فيهم بتكون لغدة لبنية، وفيه فتحة في آخر كل حلمة.
الغدد دي بتغذيها أوعية دموية. الخلايا اللي بتنتج اللبن بتتجمع مع بعض عناقيد عناقيد، وبتخرج من كل عنقود قناة رفيّعة ودقيقة شايلة اللبن، بتكوّن قنوات أكبر، والقنوات دي تكوّن قنوات أكبر، لحد ما تفتح على قناة لبنية بتصب في فراغ كبير اسمه “جيب اللبن” فوق الحلمة علطول.
جيب اللبن ده هو اللي بيتخزن فيه اللبن، والجيب ده موصول بتجويف الحلمة أو قناة الحلمة اللي بتنتهي بالفتحة اللي بينزل منها اللبن. ده وصف الضرع نفسه.
بس ازاي بقى اللبن نفسه بيتصنّع جوة البقرة؟
البقرة بتاكل في الصيف حشيش وتبن مخلوطين بمواد تانية بتزوّد قيمتهم الغذائية، الأكل ده فيه بروتين ونشا ودهون، وفي الشتا بتاكل برسيم.
الأكل ده بشكل عام بيبقى فيه ألياف نباتية وسليولوز (السليولوز عبارة عن سلسلة طويلة من جزيئات السكر وهو المكون الأساسي لجدار الخلية النباتية).
احنا منعرفش نهضم السليولوز، لكن الحيوانات فيه جزء في معدتها فيه عدد كبير من البكتريا والحيوانات وحيدة الخلية (اللي بتتكوّن من خلية واحدة يعني).
الكائنات دي بتهاجم السليولوز وتحوله لمواد غذائية ممكن يستفيد جسم البقرة (أو الحيوان عموما) منها، فتاخد جزء، وتدي البقرة الباقي، ولما الكائنات دي تموت، المعدة بتهضمها وتاخد كل ناتج الهضم ده عشان تستفيد منه البقرة.
كوباية اللبن.. الموضوع أكبر مما تتخيل!
ده بشكل عام، إزاي بقى كل عنصر في اللبن بيتصنّع جوا البقرة؟ لبن البقر بيتكون من حوالي 87% ميه، 3,6% بروتين، 4,9% كربوهيدرات، 3,5% دهون، 0,1% كالسيوم، 0,1% فسفور و0,8% مواد تانية. خلينا في العناصر الأساسية اللي هي البروتين، الكربوهيدرات والدهون.
بالنسبة للبروتين، الأكل بتاع البقرة البروتين اللي فيه بيبقى قليل إلى حدٍ ما، لكن اللي بيزوده أجسام الكائنات الدقيقة الميتة اللي في معدة البقرة، لإن الكائنات دي تقدر تصنّع البروتين من مواد مش بروتينية أصلاً. البروتين ده بيتحول في أمعاء البقرة لأحماض أمينية (وحدة بناء البروتين).
الأحماض دي بتتنقل للدم، وبتوصل للغدد اللبنية (الثديية)، وهناك بتكوّن بروتينات اللبن اللي هي الكازين والألبومين.
أما الكربوهيدرات، فدي أصلاً موجودة بنسبة كبيرة في أكل البقرة، بس بتبقى على شكل سليولوز اللي منقدرش نهضمه زي ما قلنا، وده بيتكوّن من جزيئات سكر جلوكوز كتيرة أوي متصلة ببعضها. الكائنات اللي في معدة البقرة بتفتت السليولوز وتحرر جزء كبير من السكر، والدم يشيل السكر ده للغدد اللبنية.
في الغدد دي إنزيمات بتحوّل جزء من السكر ده لنوع سكر تاني شبهه أوي اسمه الجلاكتوز، وبعدين جزيئات الجلوكوز والجلاكتوز يتجمعوا في أزواج (جزيئ جلوكوز وجزيئ جلاكتوز) عشان يعملوا سكر اللبن اللي هو اللاكتوز.
ومع إن أكل البقرة مفيهوش دهون كتيرة، مع ذلك اللبن فيه 3,5% دهون. ازاي بقى؟ هي الكائنات إياها دي برضه بتحوّل السليولوز لأحماض دهنية أهمها حمض الخليك (الخل يعني)، وبعدين الأحماض دي تتنقل للغدد الثديية، وتتصل بعضها مع جزيئ اسمه الجليسرول (اللي هو الجليسرين)، عشان يطلعولنا الدهون اللي في اللبن.
يعني اللبن فيه خل وجليسرين؟ لأ ماهو لما المكونات دي بتتحد مع بعضها بتطلع حاجة تانية خالص، زي ما الأوكسجين والهيدروجين ما بيطلعولنا الميه مثلاً.
يعني من الآخر، الكائنات الدقيقة اللي في معدة البقرة هي اللي بتعملّنا اللبن، الطقس اليومي اللي الأطفال بيهربوا منه. فيعني معلش يا حبيبي، اشرب اللبن. ماهو مش الكائنات دي تعبت والعجول بعدت عن مامتها عشان إنت في الآخر متشربش كوبايتك.
