.
النشرة

ازدياد عدد النمور البرية لأول مرة منذ 100 عام

كتبت: مها طه

لأول مرة خلال هذا القرن يزداد عدد النمور البرية في العالم مما أعطى الأمل في جهود المحافظة عليها بعد عقود طويلة من تضاؤل أعدادها، فوفقًا للأرقام اللي قدمها الصندوق العالمي للحياة البرية (WWF)، فقد ارتفع عدد النمور في البرية لـ3890 نمر على الأقل من سنة 2010، في حين كان العدد قبلها 3200 تقريبًا. قال ”ماركو لامبرتيني“، مدير عام الصندوق العالمي للحياة البرية، إنه ولأول مرة منذ عقود بيرتفع عدد النمور فى البرية.

أهمية الخبر ترجع لكونه مُشجع جدًا للجهود اللي بتقوم بيها الحكومات ومنظمات المجتمع المدني، اللي بتشتغل في مجال حماية البيئة والحفاظ على الأنواع وتوافرها.

ومن المعروف إن أي نوع من أنواع الفصائل النباتية أو الحيوانية لو حصل إنخفاض ملحوظ في أعداده، ده بيكون كفيل بإنه يؤذي النظام البيئي ككل لأن كل حيوان أو حشرة أو نبات أو طحلب، هو فرد من أفراد النظام البيئي اللي بيؤدي دور معين عشان سلامة النظام واستقراره.

فعليًا انقراض نوع واحد كفيل بإحداث تأثيرات خطيرة لأن النوع ده من المؤكد بيتغذى على أنواع تانية ممكن تتكاثر بشكل كبير في البيئة في ظل غياب النوع اللي بيتغذى عليها، بالإضافة لتكاثرها وزيادة أعدادها اللي هيؤدي لتنافس كبير على مصادر الغذاء، اللي ممكن في النهاية تؤدي لإنخفاض أعداد النوع ده كمان بشكل ملحوظ.

7318414-3x2-700x467

على الرغم من ارتفاع أعداد النمور منذ عام 2010، واللي بتعني إن جهود المحافظة عليها ماشية في طريقها الصحيح إلا إن الخبراء بيقولوا إن مضاعفة الرقم ده في خلال فترة قصيرة لحد عام 2022 مش مهمة سهلة أبدًا، وعشان كدة لازم تتاخد خطوات مهمة وسريعة لحماية البيئة المنتشرة فيها النمور دي وتكثيف الجهود لحمايتها، الأمر اللي لازم تتعاون فيه الحكومات مع القائمين على حماية النمور.

معظم النمور دي موجود في الهند، ومن بعدها روسيا وأندونيسيا وماليزيا، ونسب أقل في الصين وبنجلاديش وتايلاند والصين وفيتنام.  تعرضت أعداد النمور للانخفاض لأسباب كتيرة لكن أهمها كان الصيد الجائر وإزالة الغابات،ده طبعًا نتيجة عدم فهم الإنسان للبيئة ومحاولاته المستمرة للحصول على الاستفادة بغض النظر عن الضرر البيئي اللي ممكن يلحق بيها، فمثلًا الصندوق العالمي للطبيعة كشف إنه ما بين عامي 2000 و2014، تم ضبط 1590 نمر من قبل السلطات، كانت بتتم المتاجرة بيهم بطرق غير شرعية.

في عام 1900 كان عدد النمور البرية على مستوى العالم بيُقدر ب 100 ألف نمر، وبالرغم من الفرق الكبير ما بين الرقم ده والرقم الحالي، إلا إنه من الممكن وبتكثيف الجهود تبدأ الأعداد تزيد بشكل ملحوظ وننقذ هذا النوع المُهدد بالانقراض.


المصدر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى