اضطرابات الأكل: ليه مش عارف أبطل أكل؟!

كتبت: مها طــه

حالة من النهم الشديد، تلاقي نفسك عسكرت قدام باب التلاجة، أكلت نص كيلو اللحمة من الحلة، بعتت طلبت 2 شاورما عربي كبير، طبق رز بلبن، نص ساعة بالظبط، مولتن كيك، وبعدها نحدق بقى، كيس بطاطس عائلي بالملح، وجنبه بيض بالبسطرمة ورغيفين عيش سخنين، وفجأة تنطلق على الحمام، وعمدًا تحط صباعك في بوقك، وتستفرغ كل اللي أكلته ده، وتاني يوم تنزل الجيم من الساعة 10 الصبح لـ4 العصر! إيه اللي بيحصل ده؟!

اضطرابات الأكل.. مش عارف أوقف أكل

في الجزء الأول من كلامنا عن اضطرابات الأكل، اتكلمنا عن فقدان الشهية العصبي، ودلوقتي جه الدور على العكس، الاضطرابات الخاصة بالافراط في الأكل، حالة شره فظيعة مش ممكن السيطرة عليها، وللأسف عواقبها لا تقل خطورة عن فقدان الشهية.

• الشره العصبي:

الأشخاص اللي بيعانوا من النوع ده من اضطرابات الأكل بييجي لهم نوبات متكررة من الشره للأكل، وهنا مش قصدنا حالة جوع مفاجئ وبتعدي، لأ الحقيقة الموضوع مختلف، لأنه في نهاية نوع من الأمراض العقلية يعني الأمر خارج نطاق السيطرة مهما عملت، هي نوبات وبتتكرر كل فترة.

النوبات دي بتبدأ بأكل بكميات كبيرة وغير معتادة ومن مختلف أنواع الأكل بدون سيطرة، وبعدها تبدأ نوبات من السلوك المضاد تمامًا، زي تعمد التقيؤ والإفراط في استعمال أدوية الملينات (بتسبب الإسهال) أو مدرات البول، والموضوع كمان ممكن يمتد للصيام والامتناع عن الأكل لفترة، وممارسة التمارين الرياضية بشكل مفرط، وأحيانًا مزيج من كل السلوكيات دي مع بعضها.

وبسبب النوبات المتكررة من الأكل بشراهة وبعدها ممارسة سلوكيات “التطهير” إن صح التعبير، المصابين بالنوع ده من اضطرابات الأكل بيقدروا يحافظوا على وزنهم ضمن الحدود الطبيعية والصحية كمان بالمناسبة، عامل زي اللي بيثبّت وزنه، قصاد كل أسبوع لخبطة في أسبوع دايت وهكذا.

اعرف أكتر| معجزة الأكل.. طبق الملوخية يحميني من الاكتئاب

الأعراض:

لو فاكر إن ده حاجة حلوة، ويا سلام الناس دي مرتاحين، أحب أقولك لأ للأسف خالص. الشره العصبي بيتسبب في التهاب مزمن في الحلق، وتورم في الغدد اللعابية في منطقة الرقبة والفك، تآكل مينا الأسنان وزيادة الحساسية وضعف الأسنان وتعرضها للكسر، وكل ده بسبب التعرض المستمر لأحماض المعدة، كنتيجة للقئ المتعمد وباقي مشاكل الجهاز الهضمي الناتجة عن تكرار النوبات دي.

كل ده غير الاضطراب المعوي والالتهاب اللي بيحصل من كتر أخد الملينات، والجفاف الشديد كنتيجة لتعمد الإصابة بالإسهال، وفقد كميات كبيرة من الصوديوم والكالسيوم والبوتاسيوم والمعادن التانية المهمة جدًا بالنسبة للجسم، وحدوث خلل في مستوياتها ممكن يؤدي للإصابة بسكتة دماغية أو أزمة قلبية.

• اضطراب الإفراط في تناول الطعام:

قد يبدو من الاسم إن اضطراب الإفراط في تناول الطعام والشره العصبي واحد، لكن الحقيقة إنه لأ حتى لو تشابهوا من حيث الإفراط في الأكل، لكنهم مختلفين عن بعض بشكل واضح. الأشخاص اللي بيعانوا من اضطراب الإفراط في تناول الطعام بيفقدوا السيطرة على كميات ونوعيات الأكل اللي بياكلوها، وعلى عكس الشره العصبي، نوبات الإفراط في الأكل مفيش بعدها فترات تطهير من اللي قولنا عليها.

نتيجة بقى للكلام ده، الأشخاص اللي بيعانوا من اضطراب الإفراط في تناول الطعام غالبًا بيعانوا من زيادة الوزن وأحيانًا السمنة، وبيعتبر اضطراب الإفراط في تناول الطعام هو اضطراب الأكل أكثر شيوعًا في أمريكا مثلًا.

الأعراض:

بيتميز الاضطراب ده بإن أصحابه بيتناولوا كميات كبيرة وغير معتادة من الأكل في فترة زمنية محددة، ده كمان بياكلوا وهما مش حاسين بالجوع أصلًا، واستهلاك كميات الأكل الكبيرة دي غالبًا بيتم بسرعة جدا، فتلاقيهم بياكلوا بدون وعي ولا سيطرة وبسرعة أوي وبيستمروا في الأكل لحد ما يوصلوا لحالة الامتلاء.

وهنا لازم نفرق ما بين الامتلاء والشبع، الشبع هو إنك تستكفى بالأكل خلاص وتتخلص من الشعور بالجوع، لكن الامتلاء هو إن المعدة تتملي كلها لدرجة الإحساس بإن الأكل خلاص واصل لحد الحلق ومؤثر على قدرتك على التنفس أو شرب المياه أو حتى الحركة.

في الأغلب، اللي بيعانوا من الاضطراب ده بيفضلوا ياكلوا لوحدهم أو في السر عشان يتجنبوا الشعور بالإحراج، كمان ده بيولد نوع سئ من المشاعر المرتبطة بالخجل أو الشعور بالذنب وأحيانًا الميل للعزلة والاكتئاب، وكنتيجة للمشاعر السيئة دي، بيلجأ أصحاب الاضطراب ده لحالة من تكرار أنظمة الريجيم بشكل مستمر، وللأسف في أوقات كتير ما بيكونش في خسارة وزن حقيقية.

• أنواع أخرى من اضطرابات الأكل الخاصة

ودي في حد ذاتها مشكلة لوحدها، لأن المصاب بالنوع ده من اضطرابات الأكل بيبقى مش منطبق عليه أوي كل الأعراض الخاصة بنوع بعينه، يعني ممكن تلاقيه بيعاني من فقدان شهية لكن مش واصل لمرحلة النحافة، أو عنده شره عصبي لكنه مش بيعاني من مدة طويلة من الأكل وبعدها إجراءات عنيفة للتطهير وهكذا.

الغريب إن الأنواع دي بتتصنف كلها تحت بند واحد بس عند الدكتور. من ضمن أشهر أنواعها متلازمة الأكل بالليل اللي بيعاني منها ناس كتير أوي، بالنهار زي الفل بتاكل عادي أو أقل، ويجي عليك الليل تتحول لوحش في البراري. “الأنواع الأخرى من اضطرابات الأكل الخاصة” تعتبر الأكثر شيوعًا بين كل أنواع اضطرابات الأكل، بعدها بييجي “الإفراط في تناول الطعام”، وبعدهم “الشره العصبي”، وأقلهم شيوعًا هو “فقدان الشهية العصبي”.

اضطرابات الأكل.. تحول النعمة لمأساة

الباحثين في اضطرابات الأكل بيقولوا إن مفيش سبب مباشر للوصول لأي من الحالات التلاتة اللي اتكلمنا عنها، لكنها نتيجة تفاعل معقد بين العامل الجينية والبيولوجية والسلوكية والنفسية والاجتماعية كمان، الموضوع حقيقي كبير، ومش جانب واحد اللي نقدر نركز عليه في العلاج أو حتى الفهم.

كمان دراسة المخ نفسه بتضيف كتير لمحاولات فهم الأسباب وبالتالي إيجاد العلاج. مثلًا لما تم دراسة أنماط المخ عند سيدات وبنات بيعانوا من اضطراب أكل معين، لقوا إنها مختلفة عنها في السيدات الأصحاء، وده معناه إنه مرض عقلي وبتتداخل فيه كيماء المخ نفسها، وده في حد ذاته ممكن يفتح مجالات لأبحاث تانية كتير أوي.

أما بالنسبة للعلاجات المتبعة لحد دلوقتي أغلبها بيحتاج لمتابعة مع طبيب تغذية بشكل مباشر، ده غير ضرورة اللجوء للعلاج النفسي لأنه جانب مهم جدًا من المشكلة، وهو اللي قادر على تصحيح السلوكيات الخاطئة المتعلقة بالاضطراب أيًا كان نوعه. وفي بعض الحالات بيستعين الطبيب النفسي بأدوية زي مضادات الاكتئاب أو مضادات الذُهان ومنظمات الحالة المزاجية، اللي يتستخدم في حالات الاكتئاب والقلق المفرط.

اعرف أكتر| 10 أطعمة مثالية لإزالة التوتر والشعور بالقلق

في النهاية، لا إفراط ولا تفريط هي دي القاعدة الحاكمة لأغلب الممارسات في حياتنا، لو إن انت أو حد تعرفه بيعاني من أي نوع من اضطرابات الأكل، توجه بسرعة لطبيب مختص عشان يقدر يتعامل مع حالتك، وماتتكسفش أبدًا من طلب المساعدة. أما لو كنت أب/أم بيعاني طفله من مشكلة زي دي، رجاءًا تحاول تتكلم معاه وتفهم مشكلته وتشجعه على الأكل الصحي وممارسة الرياضة وكله “بالمعقول”.

المصادر:   beateatingdisorders  nhs  nedc  mayoclinic