نوّرها

أغرب أنواع الفوبيا: اللي تخاف منه ابعد عنه!

كتب: أحمد حسين

صاحبك بيترعب يركب أسانسير. مش بالضرورة يكون ركوب الأسانسير خطير، بالعكس هو حاجة عادية جدا عند معظم الناس لكنه في النهاية بيسبب له هو خوف وقلق شديدين، وده حقه كشخص مصاب بالنوع ده من الفوبيا.

الفوبيا كمصطلح يعتبر منتشر ومعروف لناس كتير إلى حدٍ ما. الفوبيا (الرهاب) هي كلمة مشتقة من الكلمة الإغريقية (Phobos) بمعنى الخوف، وبتستخدم الكلمة لوصف حالة الخوف أو القلق أو عدم الراحة في وجود شيء ما. أسباب الإصابة بالفوبيا ممكن تبقى عن طريق التعرض لموقف مخيف من الشيء ده، أو سماع قصص مخيفة عنه، أو وراثيًا لو في حد في العيلة مصاب باضطراب القلق.

وبما إن في مجموعة أنواع كده من الرُهاب أو الفوبيا منتشرين، زي الخوف من الأماكن المغلقة (Claustrophobia) أو الخوف من الأماكن العالية (Acrophobia) مثلًا. فإحنا هنا هنحاول نجمع مجموعة تانية من أنواع الفوبيا غير المنتشرة والغريبة جدًا.

أغرب أنواع الفوبيا .. منها:

فوبيا الخوف من الاستحمام أو غسل الجسم أو النظافة

أو الـ(Ablutophobia)، في الأغلب بتيجي للأطفال والستات أكتر من الرجالة. النوع ده من الأنواع الحساسة أو الخاصة من الفوبيا، لأن المصابين بيه بيحسوا إنهم مش المفروض يتواجدوا في أي تجمعات علشان لو حد عرفه مش هيفهم حالتهم وغالبا هيتريق عليهم الموضوع هيزيد معاهم أكتر.

فوبيا الخوف من الأصوات الـ(Acousticophobia أو Phonophobia)

حد فاكر علاء مرسي في فيلم ميدو مشاكل لما كان عمال يقول “لا لا أرجوك، أرجووووك” وبيطلب منهم يوطوا صوتهم ومش مستحمل حتى صوت تزييق الباب، أهي الفوبيا دي بتكون حاجة شبه كده بس الفرق إن المصاب بيها بيخاف من كل الأصوات اللي في الدنيا، حتى صوته هو نفسه.

Acousticophobia

فوبيا الخوف من الورد

الـ(Anthophobia) هو نوع عجيب جدًا من الخوف لأنه م هيكون في بال حد إنه ممكن يعرض حد بيحبه لموقف مؤذي له علاقة بالورد، لأنه في الغالب الورد ده شيء مش مؤذي، بس المصاب بالفوبيا دي بيخاف من الورد بمجرد ما يشوفه أو يفكر فيه حتى.

فوبيا الخوف من عدم الكمال (Atelophobia)

أصدقاءنا من الـperfecftionists محبي الكمال والمثالية في صنع الأشياء، أحيانا الأمور بيتطور لنوع من القلق الشديد اللي بيخلي المصاب بيه خايف من عمل أي شيء لأنه خايف من إن الشيء ده يكون مش كامل. طبعًا السعي نحو الكمال ده شيء معظم البشر بيعملوه رغم استحالته، بس اللي عنده الفوبيا دي باختصار مابيعملش حاجة خالص لأنه خايف مايكونش كامل في أي حاجة بيعملها.

فوبيا الخوف من السلالم

في الـBathmophobia، الخوف من السلالم هنا مش معناها الصعود أو النزول عن طريق السلم لا، الخوف هنا خوف من كل السلالم، الخوف حتى من رؤيتها والاقتراب منها.

الـ(Chaetophobia) فوبيا الخوف من الشعر

خوف بييجي للمصاب بالفوبيا دي لما بيشوف أي نوع من الشعر سواء شعر البشر أو شعر الحيوانات، والموضوع ساعات بيوصل لإن الشخص يخاف من شعر راسه وشعر جسمه كمان. من أعراض الفوبيا دي هي سقوط الشعر دون سبب عضوي واضح.

فوبيا الخوف من الألوان

المصاب بالخوف من الألوان أو الـ(Chromophobia) غالبًا بيكون خايف من لون محدد. فمثلا في نوع من الفوبيا دي اسمه (Chlorophobia) وده الخوف من اللون الأخضر تحديدا، فاللون الأخضر على أي حاجة بقى بيبقى مخيف بالنسبة للمصاب بالنوع ده من الفوبيا.

فوبيا الخوف من الزمن

 تقريبًا مفيش حد مابيخافش الوقت يفوت بسرعة أو بمعنى أصح يفرط بسرعة من إيده، لكن المصاب بالفوبيا دي بيخاف خوف مرضي من تقدم الزمن بشكل عام يعني، وبيفضل عايش في قلق رهيب لمجرد تذكّر إن الساعة ماشية.

فوبيا الخوف من المهرجين

سواء روحت في مرة السيرك أو ما روحتش فأكيد تعرف الـClowns أو المهرّجين، اللي بيبقوا مبهجين ومضحكين جدًا، لكن المصاب بالـCoulrophobia بيشوفهم عكس كده خالص، ومش القصد إنه بيخاف من اللي شكلهم شرير زي بتوع أفلام الرعب كده لأ، بيخاف من أي مهرج حتى لو كان شكله لطيف.

اعرف أكتر| هل إنت من الناس اللي بتخاف من البلياتشو؟

فوبيا الخوف من الكمبيوتر

الـCyberphobia أو الخوف من التكنولوجيا بشكل عام. ظهر المصطلح ده سنة 1985، لما ظهرت حالة خوف شديدة عند مجموعة من البشر من التعامل مع التكنولوجيا، لدرجة إنهم كان بيجي لهم أعراض مرضية زي كرشة النفس والتعرّق الشديد من مجرد رؤية مظاهر التكنولوجيا.

فوبيا الخوف من الحرية

المصاب بفوبيا الخوف من الحرية أو الـEleutheromania مابيعرفش يكون حر في حياته خالص، مابيعرفش يحس بفكرة الحرية من الأساس ولازم يكون في حد بيتحكم فيه بشكلٍ ما. وده الحقيقة من أغرب أنواع الفوبيا اللي مرت عليا بشكل شخصي.

فوبيا الخوف من العمل

مش الخوف الطبيعي أو القلق لأ، فوبيا الخوف المرضي من العمل وأي بيئة تدل على العمل أو الـErgophobia، يعني المصاب بالفوبيا دي بيخاف من فكرة الزمالة أو أماكن زي الشركات والمصانع وأي بيئة تدل على العمل.

فوبيا الخوف من الستات

زي ما هو واضح إن أغلب المصابين بالـGynophobia رجّالة، بس يظل في عدد صغير من الستات بيخافوا برضه بشكل مرضي من الستات. الحالة دي تختلف عن حالة الـ (Misogyny) أو احتقار المرأة، المصابين بالحالة دي مابيحتقروش المرأة، بس بيترعبوا منها بشكل عام.

الخوف من الإحساس الجيّد بالجنس

نوضح أكتر، المصاب بالنوع ده من الفوبيا بيخاف من إنه يشعر شعور جيد داخل نفسه تجاه الجنس بشكل عام. وده يختلف عن (Sexophobia) وهو الخوف من ممارسة الجنس أو من الأعضاء الجنسية.

النوع الأخير ده شبيه بنوع تاني يطلق عليه (Genophobia) أو الخوف من العلاقة الجنسية أو الحميمية الطبيعة، بمعنى إنه المصاب بيها بيكون خايف من العلاقات الرومانسية توصل لعلاقات حميمية. في برضه نوع تاني ممكن نذكره بالمرة وهو نوع اسمه (Eurotophobia) وده الخوف من الأعضاء التناسلية للمرأة.

بالمناسبة.. بحسب علماء النفس، أغلب المصابين بالأنواع دي من الفوبيا هما المنتمين للجماعات الدينية المتشددة.

الـ(Haphephobia) فوبيا الخوف من اللمس

بمعنى خوف الشخص من إنه يلمس حد أو حد يلمسه، وبيحس ساعات إن اللمس ده حارق. معظم المصابين بالنوع ده من الفوبيا بيكونوا اتعرضوا في وقت ما في حياتهم لاعتداء بدني أو جنسي.

الخوف من الانتظار

أو الـMacrophobia، حاجة كده شبه مطلع قصيدة محمود درويش ”في الانتظار، يصيبني هوس برصد الاحتمالات الكثيرة“، دي فوبيا حقيقية يا أستاذ درويش.

الـ(Philophobia) أو فوبيا الخوف من الحب

أااه جينا للمهم، المصابين بالنوع ده بيحسوا بخوف من الإحساس بالحب بشكل عام، وبيميلوا أكتر للعزلة والوحدة علشان لا يحسوا بالحب ولا حد يحبهم. ويبقى يا دار ما دخلك شر.

مش دي كل أنواع الفوبيا، في أنواع تانية كتير أو بالأصح في حاجات لا حصر لها في العالم قد تسبب خوف مرضي وقلق شديد لشخص ما أيا كانت ماهيتها أو شيوع استخدامها في الحياة. يعني هنلاقي ناس عندها فوبيا من البرد أو الـFrigophobia الشخص بسببها بيكون دايمًا خايف يبرد لدرجة إنه يتلّج.

أو مثلا فوبيا الخوف من رقم 666 اللي هو بيعتبر في ديانات ومعتقدات كتير رقم الشيطان.. يمكن ده السر ورا الخوف منه عند البعض؟! ماحدش عارف. ده غير الـHeliophobia أو الخوف المرضي من التعرض لشعاع الشمس، أو الخوف من الجنة أو عدمه واللي بيطلقوا عليه Uranophobia

ده غير بعض أنواع الفوبيا المرتبطة اللي مش بتكون تجاه أشياء لكنها تجاه أفعال لكن المرة دي كلها أفعال غاية في العادية، والإنسان بيعملها كل يوم عدد لانهائي من المرات زي حركة البلع، في الـ(Phagophobia)فوبيا الخوف من البلع المصابين بالنوع ده بيخافوا يبلعوا علشان بيكونوا خايفين خوف مرضي من إنهم يشرقوا أو يتخنقوا من أيًا كان اللي هيبلعوه.

أو الخوف المرضي من الحركة (Kinetophobia) الأشخاص المصابين بالنوع ده بيخافوا من الحركة بشكل عام، سواء حركة الأشياء اللي حواليهم، أو حركتهم هما شخصيًا، أو حالة الفوبيا اللي ممكن نسميها دوارين في الشوارع زي ما غنتها نجاة الصغيرة لأن اللي عندهم الـ(Nostophobia) أو فوبيا الخوف من الرجوع للبيت بيكونوا اتعودوا بشكل ما على ترك بيوتهم والعيشة خارجها، فلما بيرجعوا لها بيحسوا بضيق شديد، علشان كده بيخافوا يرجعوا.

كمان في الـ(Scriptophobia) أو فوبيا الخوف من الكتابة، واللي المصابين بيها ممكن يصيبهم أعراض زي ضيق التنفس والدوار لما يفكروا في الكتابة، سواء في مكان عام، أو لو فكّروا فيها من الأساس.

الفوبيا شعور حقيقي بالخوف والرعب، قد يثير استغرابنا لكن ماينفعش أبدا يكون مادة للسخرية أو التريقة على أصحابها. قولوا لنا لو في أنواع تانية غريبة من الفوبيا سمعته عنها؟


المصادر: oxforddictionaries  webmd

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق