9 نصائح ”علمية“ لتجنُب أضرار قعدة المكتب
كتبت: مها طـه
مبدئيًا وبما إني من ضمن زُمرة الشغالين على مكاتب، اللي بيقعدوا طول النهار على كرسي وفي مواجهتهم شاشة كمبيوتر، وعارفة كويس جدًا إن نسبة كبيرة من اللي شغالين حاليًا في وظائف مختلفة بيعانوا من أضرار قعدة المكتب.
وانطلاقًا من الجزء الاول اللي اتكلمنا فيه عن أضرار قعدة المكتب المرعبة، واللي منها إنك لو بتقعد على مكتب تشتغل لمدة 11 ساعة يوميًا، فمعدل الوفاة خلال التلات سنين الجايين بيرتفع بنسبة 40% مقارنةً باللي بيقعدوا لمدة 4 ساعات فقط.
هنا بقى هنعرفكم ونعرف معاكم 9 نصايح علمية تخلينا نتجنب أضرار قعدة المكتب.
تجنُب أضرار قعدة المكتب
1- قوم أقف
بمنتهى البساطة اللي في الدنيا القاعدة الأولى هي إنك تقوم تقف، العلماء بيقولوا إنك لو شخص بتقعد فترات طويلة كل ما عليك هو إنك تقوم كل ساعة تقريبًا وتقف لمدة 5 دقايق بس، تتمشى بقى تاخد بريك تقف وخلاص في مكانك وتحاول تحرك رجليك، فده كفيل إنه بإنه يمحي الآثار السلبية للقعدة.
2- هات مكتب بيقف
أيوه لو حضرتك في مكتب مضطر تشتغل فيه طول الوقت وماينفعش تاخد راحة غير في الوقت المخصص ليها، ممكن تجيب مكتب بيتحرك لفوق، بحيث تقدر تشتغل عليه وإنت واقف، هو صحيح وغالبًا بعد الوقفة لمدة عشر دقايق بس هتحس وإنت بتشتغل إنك تعبت وعاوز تقعد، لكن الحقيقة إنك كدة خلاص حققت الغرض وممكن ترجع تقعد تاني.
3- اشرب مياه أكتر
طبعًا شرب المياه من أهم الممارسات الطبيعية اللي لازم نعملها يوميًا، وبعيدًا عن كون المياه عامل مساعد في الحفاظ على الوزن والجلد وغيرهم من أجزاء الجسم.
مجرد وضع إزازة مياه على مكتبك هيخليك فاكرها وبتشرب فعلًا الكميات اللي جسمك محتاجها، والاهم هنا إنك هتضطر تقوم عشان تروح الحمام كل فترة، وده في حد ذاته تغيير لفكرة القعدة المستمرة.
4- اتكلم مع الناس بنفسك
لو حضرتك في الشغل وعاوز تبعت لمديرك ملف مهم أو تتكلم مع زميل ليك في موضوع مُعين في الشغل، بلاش فكرة إنك تبعت له مسج أو إيميل، إنت ببساطة ممكن تستغل ده كفرصة عشان تقوم من مكانك وتتكلم معاه وبكده تبقى غيرت من وضع القعدة.
5- اتحرك جوا المكتب
بين وقت والتاني قوم خد لفة جوا المكتب نفسه، قوم حرك جسمك يمين وشمال، أو كلم زمايلك في المكتب، ويُفضل إنك تخلي الاوراق والملفات الخاصة بالشغل بعيد عنك شوية بحيث إنك تضطر تقوم كل فترة تشوفها.
6- عليك وعلى الترامبولين
صحيح الفكرة دي بالذات تبدو بعيدة شوية عن كتير من مصالحنا الحكومية وشركاتنا حتى، إلا إنها فكرة مميزة جدًا، إنك تقوم كل فترة وتتنطط لمدة 5 دقايق، ده مش بس هيكون مفيد لصحة جسمك وعمودك الفقري، لكن كمان مفيد لحالتك النفسية ولسير العمل نفسه. إقنع مديرك بس وملكش دعوة.
7- حاول تمشي على قد ما تقدر
غالبًا معظمنا بيروح شغله وهو متأخر أو في ميعاده بالظبط، وبالتالي محتاج يركن العربية تحت الشركة على طول، ويطلع في الأسانسير بدل السلم، لكن صدقني ده مش مفيد خالص، لأنك قمت من النوم ركبت مواصلة غالبًا قاعد فيها، وبعدها طلعت قعدت على مكتبك.
وإنت نازل غالبًا هتعمل نفس الحاجات، وتروح البيت تقعد قدام التليفزيون، وبكدة إنت أضفت لأضرار قعدة المكتب أضرار تانية للقعدة عمومًا كفيلة تدمر صحتك، فالأفضل إنك تحاول تمشي على قد ما تقدر، وياسلام لو شغلك قريب ياريت متركبش مواصلات أصلًا.
8- استغل التليفون والشات
كلنا حياتنا مرتبطة بشكل أو بآخر بالموبايلات، إيه رأيك لما تجيلك مكاملة تاخد الموبايل كدة وتطلع ترد برة المكتب، أولًا تبقى حافظت على خصوصية المكالمة وثانيًا تبقى قمت واتمشيت شوية، ونفس الموضوع في حالة الدردشة مع أي حد، بس نصيحة بلاش تطول أوي يعني عشان مديرك وكده.
9- استخدم تطبيق عد الخطوات
حاليًا في تطبيق على الموبايل لعد خطوات المشي طول الوقت، غالبًا عدد الخطوات اللي بيمشيها الشخص اللي بيشتغل على مكتب حوالي 1500 خطوة في اليوم، وبيقعدوا في مقابلها حوالي 600 دقيقة، في حين إن المزارعين مثلًا، بيمشوا حوالي 5000 خطوة يوميًا، وبيقعدوا لأقل من 300 دقيقة بس.
أخيرًا كل النصايح دي ما هي إلا محاولة عشان نكسر حالة القعدة المستمرة دي ونتجنب مخاطرها، فأوصيكم ونفسي باتباع النصايح دي، وطبعًا لو حاولت تعدل في الموضوع طبقًا لطبيعة مكان الشغل، فده شئ عظيم في حد ذاته 😉
المصادر: webmd mayoclinic livescience fitnessmagazine
