التنمية المستدامة ودليل الشخص الكسول لإنقاذ العالم
كتب: أحمد حسين
مصر حاليًا بتستضيف مؤتمر التنوع البيولوجي التابع للأمم المتحدة (من 13 حتى 29 نوفمبر) في مدينة شرم الشيخ. المؤتمر معني بالاستثمار من أجل الإنسان والكوكب، ومن ضمن أهم الأفكار أو المفاهيم الخاصة بالاستثمار الأخضر المفيد للإنسان والكوكب، هي فكرة التنمية المستدامة اللي بتحل مساحة كبيرة من أفكار المؤتمر. علشان كده إحنا محتاجين نعرف -على قد ما نقدر- إيه هي التنمية المستدامة وظهرت امتى؟ وإيه أهميتها لينا ولمجتمعنا؟ وإيه الأهداف اللي ممكن نحققها عن طريقها؟
إيه هي التنمية المستدامة وظهرت امتى؟
هي عملية التطوير للأرض والمجتمعات والمدن والعمليات التجارية، بس بشرط مهم، هو إن كل دول مابيوّظوش الأرض والطبيعة، ويحافظوا عليها علشان نقدر وتقدر الأجيال القادمة تستفيد بيها بشكل كويس، علشان ببساطة ممكن حد يكون بيعمل حاجة مفيدة، زي التنقيب عن البترول مثلًا أو التنقيب عن المعادن، ويبوّظ الطبيعة سواء في البحر أو البر، يعني يدمّر مجموعة شعاب مرجانية أو مجموعة أشجار مثلًا. التنمية المستدامة بقى هدفها إنها تحقق الهدفين وبتحافظ على البيئة والأرض في نفس الوقت.
ظهر مصطلح التنمية المستدامة لأول مرة سنة 1987 في تقرير رسمي بعنوان “مستقبلنا المشترك” صدر عن اللجنة العالمية للتنمية والبيئة. قبل التاريخ ده، كان الاتجاه العالمي والمحلي نحو التنمية فقط، الليى ظهرت بشكل أكبر بعد الحرب العالمية الثانية، خصوصًا في البلاد اللي تأثّرت بشدة من الحرب وأهوالها، وأقنعتها الدول الكبرى إن التنمية هي الأهم، دون الإشارة إلى أهمية البيئة والحفاظ على الطبيعة، وبعدها بفترة ظهرت التنمية المستدامة علشان تحافظ على الاتنين مع بعض، لإن تدميرنا للبيئة كان له تمن غالي أثّر علينا بالسلب وأثّر على مستقبلنا كله.
إيه أهمية التنمية المستدامة لينا ولمجتمعنا؟
ببساطة، هو مفهوم بيحافظ على مواردنا، بيطوّرها ويستخدمها في التطويّر من غير ما يدمّرها. يعني مثلًا، منظمة الأغذية والزراعة بتعرّف التنمية المستدامة على أنها إدارة وحماية قاعدة الموارد الطبيعية، يعني مثلًا، إحنا عاوزين نوفّر للناس بيوت، مش أول حاجة هنفكر فيها إننا ندمّر غابة أو غيط زراعي ونبني عليه، لأ، هنفكر إزاي نبني وفي نفس الوقت ماندمّرش الطبيعة، كذلك ما يخص البحار، إحنا بنحتاج نسافر ونستخدم السفن في نقل البضائع، طيب ممكن نعمل كده بس من غير ما نأثّر على التنوع البيولوجي الموجود في البحر وماندمّرش السمك والكائنات البحرية.
دليل الشخص الكسول لإنقاذ العالم
لفت نظري جدًا وأنا بدوّر على معنى التنمية المستدامة، إن الأمم المتحدة عاملين دليل اسمه زي ما هو مذكور فوق كده، دليل الشخص الكسول لإنقاذ العالم، ومقسمين المراحل الخاصة بيه لـ 4 مستويات، ممكن نذكرهم ونذكر بعض خصائصهم كمان:
المستوى الأول: نجمة الأريكة
دي حاجات نقدر نعملها وإحنا قاعدين مكاننا، وبعض خصائصها كالتالي:
- توفير الكهرباء من خلال تجميع أجهزة الكهرباء في موئل واحد للطاقة (مشترك يعني) ونطفيه لما نبقى مابنسخدمش الأجهزة دي.
- التعامل من خلال الإنترنت فيما يخص تسديد الفواتير علشان نقلل استهلاك الورق فنحافظ على البيئة والشجر من التدمير.
- التعامل مع الشركات اللي تعرف إنها مابتضرّش بالبيئة.
المستوى الثاني: بطل المنزل
حاجات نقدر نعملها في البيت، وخصائصها كالتالي:
- تجفيف أو تنشيف الملابس والشعر عبر الهواء، ننشر الغسيل على الحبل بمنتهى البساطة زي ما بيعمل أغلبنا تقريبًا.
- الاستحمام بسرعة نسبيًا، يعني يُفضل الاستحمام ياخد ما بين خمس إلى عشر دقايق، ونوفّر من الميّه اللي نقدر عليه.
- نحاول على قد ما نقدر نقلل من استهلاكنا للحوم والدواجن والأسماك، ونستهلك معاه الخضروات والنباتات بصورة متوازنة.
- نجمّد الأكل اللي ماقدرناش ناكله، ونحاول نسخنه في اليوم اللي بعده بدل ما نرمه، ونبقى وفرنا أكل وفلوس وضربنا عصفورين بحجر واحد، ودي جملة لو الأمم المتحدة عرفت إني قولتها هتنفخني تقريبًا.
المستوى الثالث: الجار اللطيف
حاجات نقدر نعملها برة البيت، وخصائصها كالتالي:
- نشتري من المحلات القريبة، فدعم المحلات القريبة بيزوّد فرص العمل للأفراد وبيوفر كمان بنزين في إننا نشتري من أماكن بعيدة، وإنتم مدركين البنزين بكام دلوقتي طبعًا.
- حاول تخطط لمشترياتك، بمعنى إنك تعرف إنت عاوز تجيب إيه وتجيبه بالظبط، والأفضل تجيب اللي يقضي لك الحاجة مش أكتر من كده، علشان بس الحاجات ماتبوظش وتترمي.
- حافظ على صيانة عربيتك دائمًا، علشان بس مايحصلش أي انبعاثات سامة تأثّر سلبًا عليك وعلى جيرانك اللي بيشاركوك الحياة في نفس المكان.
المستوى الرابع: الموظف المثالي
وبغض النظر عن اعتراضي على كلمة مثالي، دي حاجات نقدر نعملها في الشغل، وخصائصها كالتالي:
- لو معاك أكل أو فاكهة، وإنت شبعت خلاص، ممكن تديهم لحد تاني وتشاركهم معاه بدل ما ترميهم، منها مشاركة لطيفة، ومنها حفاظ على البيئة برضه.
- اكتشف حقوق العمل، من المساواة والرعاية الصحية وغيرهم.
- لو حسيت بظلم واقع على زميلتك في العمل، بسبب عدم المساواة في الأجر أو المعاملة، حاول تقف معاها.
- تأكد من إن الشركة اللي بتشتغل فيها مابتتسببش في ضرر البيئة، يعني على قد ما تقدر اعمل كده.
مدرك إن ده ممكن يكون للبعض شبه الإرشادات اللي بتكون موجودة ورا كتاب الدراسات في رابعة ابتدائي، بس يعني بذمتكم، وأنا بشترك معاكم في نفس الشعور، مش في حاجات من دي ممكن تكون كويسة ونستخدمها فعلًا؟ مش ساعات بيكون نفسنا نقول حاجات شبهها لنفسنا ولغيرنا؟ لذا أدعوكم -فضلًا وليس أمرًا- إنكم تاخدوا فكرة عنها على موقع الأمم المتحدة (اللي موجود في المصادر) ويعني لو عجبكم حاجة خلونا نحاول نعملها على قد ما نقدر.
أهداف التنمية المستدامة
موقع الامم المتحدة برضه عامل جزء خاص بـ 17 هدف للتنمية المستدامة، خلونا نذكرهم ونبص عليهم برضه.
- القضاء على الفقر، عن طريق التبرع بالحاجات اللي مابنستخدمهاش.
- القضاء على الجوع، عن طريق تجنب رمي الأكل.
- الصحة الجيدة والرفاه، عن طريق التلقيحات والرعاية الصحة الشاملة.
- التعليم الجيد، عن طريق مساعدة الأطفال على القراءة.
- المساواة بين الجنسين، عن طريق رفض سلوكيات التحيز على أساس الجنس.
- المياه النظيفة والنظافة الصحية، عن طريق محاولة عدم هدر المياه.
- طاقة نظيفة وبأسعار معقولة، عن طريق توفير الطاقة واستخدام مصابيح موفرة ذات كفاءة عالية.
- العمل اللائق ونمو الاقتصاد، عن طريق تشجيع الشركات الصديقة للبيئة والتي توفر فرص عمل متساوية.
- الصناعة والابتكار، عن طريقة إعادة استخدام وصناعة المواد القديمة.
- مدن ومجتمعات محلية مستدامة، عن طريق استخدام الدراجات (العَجل) أو المشي أو وسائل المواصلات المحلية للحفاظ على البيئة.
دول 10 أهداف من الـ 17، وهما معروضين بشكل جميل على الموقع الخاص بالأمم المتحدة، ممكن برضه نبص عليهم بصة، ويعني نحاول نعمل اللي نقدر عليه، وهنيالك يا فاعل الخير والثواب، وربنا يوفقنا جميعًا.. ولا تخرج قبل أن تقول إن شاء الله 😀
