تعرف على أسياد العالم فى التخفي!
كتبت: مها طه
عالم الحيوان فى الحقيقة عالم مدهش بكل ما فيه، والحقيقة إن من أكتر الحقايق المدهشة فى عالم الحيوان هى القدرة على التخفي، يعني مثلًا كلنا كنّا بنندهش جدًا من قدرة الحرباء على تغيير لونها عشان تناسب البيئة اللي بتعيش فيها وتتخفى عن العيون وده كان أكتر مثال شائع عن عملية تماهي الحيوانات مع البيئة اللي حواليها كنوع من التخفي والدفاع عن النفس. فى المقال ده بقى هناخدكم فى جولة ونعرفكم علي مجموعة من الحيوانات اللى ممكن تكون مش مشهورة أوى، لكنهم فى مجال التخفي أساتذة!
- حصان البحر:
النوع ده من حصان البحر، واللي يُعتبر من أصغر الأنواع فى العالم، بيطلق عليه اسم ”حصان البحر القزم“. بيعيش فى المياه فى جنوب شرق آسيا، جسمه بيكون مُغطى بأهداب ملونة، شكلها قريب من الشعاب المرجانية والأعشاب البحرية، وده اللي بيمكنه من إنه يتخفى كويس، الكائن ده بيتغذى بنفس أسلوب المصفاة بمعنى إنه بيسحب المياه ويصفيها من خلال أسنانه وياخد منها الكائنات الصغيرة والعوالق.
- الأوراق المتحركة:
الحشرات اللى بتنتمي لعائلة ”Phylliidae“ أو العائلة الورقية، العلماء بيطلقوا عليها لقب ”الأوراق المتحركة“. الحشرات دي اكتشفها الباحث الإيطالي ”أنطونيو بيجفاتا“ على جزيرة ”ميجلان“. الحشرات دي شبه أوراق الأشجار جدًا لدرجة إنها فعلًا بتظهر وكأنها أوراق شجر، الحاجة الوحيدة اللي تخليك تشك فيها هو إنها بتتحرك. هي أشبه بأوراق التوت، وبتكون موجودة فى أستراليا امتدادًا لجنوب آسيا.
- عين الجاسوس:
الكائن ده بالنسبة لي على الأقل كانت صورته مربكة، هو فين أصلًا؟ أعتقد إنك كمان هتتصدم، لأ الصورة دي مش فوتوشوب ولا حاجة، ده كائن ليلي موجود فى مدغشقر، وزى ما هو واضح مش بيظهر منه غير عينيه، يعني لو مغمض ولا هتلاحظه أصلًا، الكائن ده بيُعتبر من السحالي، بيتميز بصوته العالي _أصله مش هيبقي صوت وصورة يعني_ ورجليه عندها القدرة على الالتصاق بالأسطح حتى الأملس منها، بيعيش فى المناطق الدافية فى العالم.
- سمكة الحجر:
أعتقد حضرتك محتاج تدقق شوية عشان تاخد بالك من إنها سمكة مش مجموعة شعاب مرجانية، اسمها ”سمكة الحجر المرجانية“ لأنها فعلًا شبه الشعاب المرجانية أوي لكن دي مش أخطر حاجة فيها، السمكة دي هي أكتر سمكة سامة فى العالم! بتتجول عادي بين الشعاب المرجانية في المحيط الهندي والهادي _الحمدلله مش عندنا_، وبتتغذى على الأسماك الصغيرة والقشريات، في على جسمها حوالي 13 شوكة بيغذيهم كيسين مليانين سم، لو كان حظك سئ وقابلتها من غير ما تاخد بالك، فخليك عارف إن السم بتاعها بيسبب ألم شديد، وأحيانًا ممكن يؤدي للوفاة.
- طائر خشب:
الطائر ده موجود فى أستراليا، بيظهر وكأنه جزء من خشب الشجرة، صعب تكتشفه غير لو ركزت أوي أو شوفته بيتحرك، شخصيًا بحسه كأنه قطعة فنية منحوتة فى الشجرة مش طائر عادي واقف عليها، فى شهور الشتاء، الطائر ده بيعمل بيات شتوي، بيقضى الليل فى الصيد، وبالنهار بيفضل واقف على الشجر بالشكل ده.
- مثال حي للشفافية
ركز شوية كدة فى الصورة هتلاقي كائن بحري جميل وشفاف! أول مرة تم اكتشاف النوع ده كان فى 1885، واسمه ”جمبري البحر الكاريبي الناعم“، أيوه حضرتك ده جمبري طوله لا يتعدى كام سم، وعلى النقيض من الحيوانات اللي بتتخفى بإنها تتلون زي اللي حواليها، ده بقى، تقريبًا شفاف، وأعضاؤه الداخلية بتميل للون الأحمر.
في الآخر الحيوانات بتلجأ غالبًا للتخفي عشان تقدر تعيش فى البيئة، وتتعامل مع الحيوانات التانية لأن الحقيقة العالم مكان قاسي والبقاء فيه للأصلح اللي بيقدر يتكيف مع البيئة ويحمي نفسه من المفترسات والكائنات الأقوى أو حتى يقدر بيها يصطاد الكائنات الأضعف.
المصادر
