ليه الشتا محتاج حضن؟!
كتب: أحمد حسين
قبل بداية الشتاء، لو قرر بعض الأشخاص كتابة تصوراتهم عن الشتاء، اللي بيحبوه فيه واللي بيكرهوه، أو اللي محتاجين له، هنلاقي منهم اللي قال أنه بيحب الشتاء عشان اللبس الشتوي شيك، واللي قال أنه بيحب الشتاء لأنه بيحب فاكهة الشتا أكتر من فاكهة الصيف وشايفها أجمل، وفي اللي هتقول إن الشتاء أجمل لأنه موسم المطر.
في بقى شوية هيركزوا على إن الشتاء هو موسم المشروبات الساخنة، وتحديدًا الهوت شوكليت وحمص الشام والبليلة والسحلب ، وفي بقى اللي شايفين إن الشتاء محتاج حضن. وتقريبًا كل التصورات والإجابات عن الشتاء مفهومة، ماعدا موضوع إن الشتا محتاج حضن ده؟!
ليه الشتا محتاج حضن ؟!
مبدئيًا الموضوع _من وجهة نظر العلم_ مش عاطفي ولا علاقة له بالمشاعرخالص، الموضوع له علاقة بدرجة الحرارة. أي والله درجة الحرارة، أمر محبط مش كده، بس خلينا نشوف درجة الحرارة هتاخدنا لفين؟ في اعتقاد سائد بأن الستات بيحسوا بالبرد بنسبة أكبر من الرجال، والاعتقاد ده صحيح بالمناسبة، وفي عوامل مختلفة وأسباب بتؤدي لكدة.
نسبة الدهون
أولًا: نسبة الدهون في جسم الست أكبر من نسبة الدهون في جسم الرجل، لأن نسبة العضلات عند الرجل أكبر بالمقارنة بنسبتها عند الست. الدهون غالبًا بتحتفظ بحرارة الجو أما العضلات فبتطردها، لذلك للراجل عادةً بيحس بالدفا أسرع من الست اللي بتحتاج لوقت أطول، عشان كدة الرجال عادةً بيكونوا متعايشين مع برد الشتاء على عكس السات اللي حاسة طول الوقت بالتكتكة.
في عامل آخر نحطه في الاعتبار. درجة حرارة الأطراف غالبًا بتكون أقل من درجة حرارة الجسم. بمعنى إنك لما تدخل السرير، جسمك هيحس بالدفا قبل أطراف إيديك ورجليك. الأوعية الدموية للست بقى بتتقلص أكثر من الرجل، ولما الأوعية الدموية بتتقلّص، الدم مايوصلش بسرعة للأطراف، لذلك بتفضل ساقعة جدًا لفترة طويلة لذلك درجة حرارة أطراف بعض الستات والبنات في بعض الأحيان بتبقى أقرب للتلج.
اعرف أكتر| اشمعنا ”صلاح“ سقعان و”عاطف“ حران؟
الهرمونات
ثانيًا: السبب التاني لشعور المرأة بالبرد أكتر من الراجل هو الهرمونات بشكل مباشر. حرارة جسمنا الداخلية بتتغير نتيجة لتغيّر نسبة الهرمونات، وغالبًا بتتغيير نسبة هرمونات الستات في أوقات مختلفة منها وقت الدورة الشهرية والحمل، وعشان كده الست في الأوقات دي بتحس بالبرد على عكس الرجل اللي شعوره بالبرد وانتظام درجة حرارة جسمه بيكون حاصل أغلب الوقت لأن هرمون التيستوستيرون لا بيتأثر ولا بتتغير نسبته.
في دراسة طريفة نشرتها مجلة ”Nature“ قال مجموعة من الباحثين الهولنديين بأن الستات عندهم نقطة ضعف تجاه الشغل في المكاتب، لأن الحرارة المركزية غالبًا بيتم تظبيطها عن طريق رجل، وعشان كدة بيظبطها على حسب إحساسه بالبرد أو الحرّ، وهو أمر غير محمودة عواقبه خالص بالنسبة للستات، لأن الحرارة اللي بتحتاجها الست بتكون ما بين 24-25 درجة مئوية، وده أكتر من اللي بيحتاجه الرجل بنسبة 2.5 درجة مئوية، لذلك غالبًا بتحس الست في مكاتب العمل بالخارج بالبرودة، ومش بتقدر تكمل شغلها بطريقة مريحة وصحيحة.
يمكن عشان الأسباب انتشرت قصة أن الشتا محتاج حضن بين الناس (البنات والستات تحديدًا) لدرجة إن بقى تريند على السوشيال ميديا، في حين إنه في الواقع الشتا مش محتاج حضن قد ما هو محتاج لدفاية ولبس تقيل ويمكن حلة محشي مع فرخة محمرة كما أفتانا صلاح عبد الصمد في “صغيرة على الحب”.
المصادر: sciencefocus nature
