كائنات بتقرقش البلاستيك أو العكس!
كتبت: يارا كمال
ترضى حد يرميلك زبالة في طبق أكلك؟! أكيد لأ.
أهو إحنا بنعمل كده مع الكائنات والطيور البحرية. مع إننا الكائن العاقل الوحيد على ضهر الأرض، إلا إن مفيش حد بيعمل اللي إحنا بنعمله. الطيور البحرية بقت بتاكل فرش أسنان وولاعات وغطيان أزايز ويمكن حتى دراع عروسة لعبة، فعلًا!
في كل كيلومتر مربع في المحيط 580 ألف قطعة بلاستيك بتلوّثه، وبقوا بيلاقوا القطع دي في أمعاء الكائنات البحرية، زي السلاحف البحرية، والسمك، والدلافين، والطيور البحرية. في 90% من الطيور البحرية بتاكل بلاستيك، 10% من وزنهم بيكون بلاستيك. طب ليه الكائنات والطيور البحرية بتاكل بلاستيك؟ طعمه حلو مثلًا؟
المشكلة إن الكائنات دي بتتلخبط ما بين شكل أكلها الأصلي وبين البلاستيك. يعني السلاحف البحرية ممكن تاكل الأكياس البلاستيك عشان شبه قنديل البحر، والطيور البحرية ممكن تاكل بلاستيك لإنه لازق في أكلها.
المشكلة في البلاستيك إنه صعب _إن ماكنش مستحيل_ يتحلل في أمعاء الكائنات، ويخرج مع الفضلات، عشان كدة بيفضل واخد مساحة في أمعائهم، فيفضل عندهم إحساس إنهم شبعانين، وده بيمنعهم إنهم ياكلوا أكلهم الطبيعي، اللي بيخليهم يموتوا في الأخر من سوء التغذية والجفاف والتلوث. كمان البلاستيك مادة حادة بالنسبة لإنه يتاكل وممكن يعمل ثقوب في أمعائهم. ده غيرالسموم طبعًا اللي فيه، واللي بتبقى شبه الهرمونات بالنسبة للجسم وده بيعمل مشاكل زي إن قشر بيض الكائنات دي يقل سمكه، والقشرة دي هي اللي بتحمي البيضة.
إحنا ما نقدرش نمنع الكائنات دي إنها تاكل زبالتنا، بس ممكن نمنع نفسنا نرمي لهم زبالة في أطباقهم، بإننا نزوّد السيطرة على رمي النفايات في البحار والمحيطات، وخصوصًا إن إنتاج البلاستيك بيزيد، يعني اللي تم إنتاجه من البلاستيك من 2004 لـ2005 قد اللي أنتجناه من ساعة ما عرفنا البلاستيك لحد 2004، ولسه الكمية دي هتتضاعف تاني من 2015 لـ2026.
المصدر
