المملكة العظيمة: ”طحالب“ إيفري-وير!
كتبت- مها طه
طبعًا أول ما نقول ”سوشي“ ييجي في بالنا الطحالب الخضراء اللي على شكل ورقة بيتلف بيها السوشي، وأول ما نفتكر الطحالب ييجي على بالنا النباتات الخضراء الناعمة الأشبه بقطيفة اللي بتبقى مغطية الصخور عند الشواطيء. لكن في الحقيقة، الطحالب من الصعب إيجاد تعريف ثابت ليها، بس نقدر نقول إن الطحالب كائنات ميكروسكوبية في الغالب_أي لا ترى بالعين المجردة_.
الاعتقاد السائد عن الطحالب إنها نباتات مائية بسيطة، بدون ساق أو أوراق أو جذور، بتتكاثر بطرق بدائية جدًا، تقوم بالبناء الضوئى منتجة بذلك كميات كبيرة من الأكسجين.فى حين إنه بعض من أنواع الطحالب تتمتع بخصائص حيوانية كالقدرة على الحركة، وتوجد أنواع أخرى من الطحالب، تحديدًا اللي تتميز باللون الأخضر المايل للأزرق،شكل ووظائف الخلايا فيها أقرب منها للبكتريا عن النباتات.(1)
الطحالب منتشرة فى البيئة المائية بشكل كبير، وتُعتبر مكون رئيسى لمعظم النظم البيئية المائية، لكن كمان في منها أنواع كتيرة أرضية بتعيش فى التربة على الجليد، أو حتى فى نظم معيشة مشتركة مع بعض الكائنات الأخرى بالذات الفطريات والحيوانات.تعيش الطحالب المائية فى الماء المالح أو العذب، تتراوح فى الحجم، فمنها اللى بيوصل طوله لعدة أمتار، وفى منها اللى لا يُرى بالعين المجردة، بعض الطحالب لها فوائد اقتصادية لأنها تُعتبر مصدر للغذاء والطاقة.
طحالب تعددية على كل لون وشكل
الطحالب ممكن تكون كائنات وحيدة الخلية، أو متعددة الخلايا_سواء بشكل خيوط أو مستعمرات_ أو بشكل يشبه النباتات.الطحالب أنواعها كتيرة جدًا زى الطحالب الخضراء، الخضراء المزرقة، البنية، الحمراء، الذهبية، الصفراء المخضرة، الدياتومات، اليوجلينات وغيرها كتير.
1 –الدياتومات
طحالب وحيدة الخلية تُصنف تبع مملكة الأوليات، بتتميز بقشرة من السيليكا، تعيش بشكل منفرد لكن من الممالدياتوماتكن أن تكون مستعمرات، لونها بيكون بين الأصفر والبنى، تقدر تعيش فى أي مكان يتوافر فيه ماء أو رطوبة، سواء الماء مالح أو عذب، على سطح نبات رطب أو حتى فى تربة المهم تكون رطبة.
الدياتومات بتظهر بشكل كبير فى الربيع وللسبب ده بيطلق عليها اسم “زهور الربيع”. لما بتموت، بتترسب الدياتومات فى القاع، ولأن القشرة بتاعتها غير قابلة للتحلل، فبتتجمع فى القاع فى شكل صخور لينة خفيفة الوزن شبه الطباشير.
يتم استخدام الدياتومات كمادة عازلة للحرارة وللصوت فى صنع الديناميت والمتفجرات، وبيتم استخدامها فى صناعة الفلاتر، ده بالإضافة لإن الحجر الجيرى تكون فى الأساس من ترسبات الدياتومات دى، وكتير من النفط اللى موجود فى الارض ناتج من منشأ دياتومى.
2 –الطحالب الخضراء
تقوم بالبناء الضوئى، معظمها كائنات مائية ممكن تبقى وحيدة الخلية أو متعددة الخلايا أو بتعيش فى مستعمرات. الأنواع الأرضية منها قليلة لكنها موجودة، وبتعيش فى التربة، وعلى جذوع الأشجار، وعلى الصخور الرطبة.
3 – اليوجلينات
طحالب مائية معظمها وحيد الخلية، بعضها عنده بلاستيدات خضراء،ويقوم بالبناء الضوئى،والبعض الآخر بيمتص أو يبتلع المواد الغذائية من البيئة المحيطة. معظمها يعيش فى الماء العذب فى البرك، وحمامات السباحة خصوصًأ اللى بتبقى المياه راكدة فيها لفترة طويلة، أو ملوثة بمواد كالأسمدة الزراعية، واللى بتساعدها على النمو والتكاثر بشكل كبير.
4 –الطحالب السوطية
دى نوع من الطحالب اللى ليها أسواط بتستخدمها عشان تتحرك بيها، بعضها غيرذاتى التغذية_بيستمد غذائة من البيئة_ زى إنها مثلًأ بتتطفل على بعض أنواع الحيوانات أو تتكيف مع بعض الأوليات. فى بعض الاوقات ممكن تبقى كائنات مفترسة بتتغذى على الأوليات الحيوانية دى، لكن كمان فى منها أنواع بتعمل بناء ضوئى. فيها أنواع مختلفة من الصبغات غير الكلوروفيل_ الصبغة المسئولة عن اللون الأخضر فى الكائنات اللى بتقوم بعملية البناء الضوئى_، والصبغات دى ممكن تحجب ظهور اللون الأخضر. الطحالب دى تعتبر جزء من العوالق الموجودة فى المحيطات، واللى بتُعتبر مصدر غذائى مهم لكتير من الكائنات البحرية، بعض الأنواع من الطحالب دى بينتُج عنها ظاهرة ”التوهج البيولوجى“.
5 – الطحالب الذهبية
يعيش معظمها فى الماء العذب. تتميز بشكل خلاياها المميز والصبغة الموجودة فيها. الطحالب دى بتقوم بعملية البناء الضوئى وبتتصنف كنباتات بسيطة، موجود فيها صبغة الكلوروفيل (أ)، والكلوروفيل (ج) ، اللى بيدوها لونها الذهبى، الطحالب دى تحت ظروف معينة بتتكاثر جنسيًا لكن فى العادى بتتكاثر لا جنسيًا عن طريق انقسام الخلايا.
6 – الطحالب البنية
معظم الطحالب البحرية المعروفة هى طحالب بنية، لونها البنى ناتج عن وجود صبغة “الكاروتين”، الطحالب دى بتعيش فى المحيطات الباردة بالذات فى مناطق المد والجزر، واللى بيخليها تتعرض لضغط كبير نتيجة حركة الأمواج. يعيش بعضها على أعماق كبيرة فى المحيطات.
7 – الطحالب الحمراء
الطحالب دى بتتميز بلونها الأحمر أو الأرجوانى فى بعض الأحيان، وده بسبب وجود صبغة “فيكوبلين”. الطحالب الحمراء بتكون متعددة الخلايا، وتتميز بتفرعاتها الكتيرة.توجد فى كل محيطات العالم تقريبًا، فمعظم الأعشاب البحرية هى طحالب حمراء، تنتشر بشكل كبير فى المياه الدافئة والمناطق الإستوائية. تعيش على أعماق كبيرة مقارنة بالكائنات اللى بتقوم بالبناء الضوئى.معظم أنواع الطحالب اللى بتعيش على الشعاب المرجانية، وبتفرز كربونات الكالسيوم اللى بتلعب دور رئيسى فى إعطاء الصلابة والقوة للشعاب المرجانية، تُعتبر غذاء فى المناطق الآسيوية.
8 –الطحالب الخضراء المزرقة
النوع ده يُعتبر طحالب لكنه بيحمل كتير من خصائص البكتريا لدرجة إن بعض علماء التصنيف بيتعبروها بكتريا لكنها بتقوم بالبناء الضوئي. ممكن أن تتواجد بشكل منفرد أو مستعمرات على حسب نوعها ونوع البيئة اللى بتعيش فيها _ لو بيئة قاسية مثلًا بتكون مستعمرات.بالرغم من اسمها لكن فى منها أنواع بنية وحمراء وصفراء. الطحالب دى بتكون عبارة عن كتل من الخيوط أو الرقائق اللي بتبقى طافية على سطح الماء. انتشار الأنواع الحمراء منها هو السبب فى تسمية البحر الأحمر بالاسم ده.
على عكس البكتريا اللى بتحلل أجسام الكائنات الحية ومنها بتستمد غذائها، النوع ده من الطحالب بيقوم بعملية البناء الضوئى وينتج غذائه بنفسه. الطحالب موجودة تقريبًا فى كل أنواع البيئة المختلفة؛ فى الماء العذب والمالح، وعلى الصخور، وفي التربة. الطحالب دى هى المسئولة عن رائحة التراب، ورائحة بعض المحيطات والبحار.
الطين الللى بيميل للون الأخضر اللى بيكون جنب بعض الزهور اللى بتتزرع فى الجناين، بعض الحوائط اللى فيها رطوبة، ويبدأ يظهر عليها اللون الأخضر، حتى بعض جذوع الأشجار الكبيرة ما هى إلا هذه الطحالب. الأغرب بقى إن الطحالب دى بتعيش على فرو الدببة القطبية كمان، وهي اللى بتديها مسحة من اللون الأخضر، من الأخر كده الطحالب دى ممكن تلاقيها فى أى مكان فى العالم تقريبًا.(2)
المصادر:
