هل ذوبان الجبال الجليدية حل محتمل لأزمة تغير المناخ؟!
كتبت: مها طه
ذوبان الجبال الجليدية نتيجة للاحتباس الحرارى سبب رئيسى فى ارتفاع منسوب مياه البحر لكن وفقًا لدراسة جديدة قام بيها فريق من الباحثين فى جامعة شيفيلد فى المملكة المتحدة، فهو فى نفس الوقت ذوبانها سيساعد فى إبطاء آثار تغير المناخ، الدراسة قالت إنه عند ذوبان جبال الجليد دى فهى بتسيب وراها كميات هائلة من الطحالب بتختزن كميات كبيرة من غاز ثانى أكسيد الكربون وبتمنعه من إنه يتسرب للغلاف الجوى.
لتوضيح ده قام فريق البحث بتحليل 175 صورة عالية الدقة صوّرتها الأقمار الصناعية للجبال الجليدية العملاقة فى المحيط قرب القارة القطبية الجنوبية، ولاحظوا إن الجبال دي حجمها بيقل وكتل من الجليد بتبدأ تنجرف منها وبتسيب وراها طحالب خضراء لمسافة قد تصل لألف كيلومتر بتظهر كأنها ممرات من الطحالب، الممرات دى بتبقى بيئة ممتازة لازدهار العوالق النباتية، وهى طحالب صغيرة بتكون قادرة على الازدهار فى المياه الغنية بالمغذيات الناتجة عن ذوبان الجليد.
نمو العوالق دي بيؤدى لاختزان ثانى أكسيد الكربون بشكل طويل المدى فى المحيطات، ووفقًا للحسابات اللى قام بيها فريق البحث فالعوالق المزدهرة دى بتختزن 20% من غاز ثانى أكسيد الكربون الموجود فى المحيط القطبى الجنوبى، والمنطقة دي بتختزن أصلًا 10% من كمية ثانى أكسيد الكربون المُختزن فى الكوكب كله، ولما الطحالب دى بتموت بتبدأ تترسب فى قاع المحيط وبتكون مختزنة كميات ثانى أكسيد الكربون اللى امتصتها فى أثناء وجودها على السطح.
من المعروف طبعًا إن استمرار ذوبان الجبال الجليدية ممكن يؤدى لكوارث خطيرة لكن فى نفس الوقت اختزان ثانى أكسيد الكربون ده ممكن يخفف من الآثار اللى بيتوقع العلماء حدوثها فى السنوات المقبلة. ”جرانت بيج“، قائد فريق البحث، أضاف إن استمرار عملية الذوبان والمرتبط بعملية اختزان ثانى أكسيد الكربون ممكن يكون أثره أكبر بكتير من اللى كان العلماء بيعتقدوه.
وأضاف ”بيج“ إن التحليل الجديد للجبال الجليدية العملاقة دي أظهر إنها ممكن تلعب دور مهم جدًا فى دورة الكربون فى المحيط القطبى الجنوبى، وإنهم اكتشفوا تحسن كبير فى مستويات الكلوروفيل فى مساحة تفوق نصف قطر الجبل نفسه على الأقل من 4 لـ10 مرات.
والزيادة اللى حصلت فى مستويات الكلوروفيل دي بتشير لوجود عوالق نباتية واللى تم اكتشافها بعد شهر من ذوبان الجبل الجليدي وانحداره من مكانه، وده اللى أثبتته الصور اللى تم التقاطها فى الفترة ما بين 2003 و2013، وبالفعل تم اقتراح طرق لعزل الكربون كطريقة محتملة للحد من تغير المناخ، بالرغم من وجود طرق طبيعية للعملية دي زي الحيتان مثلًا الموجودة فى المحيط القطبى الجنوبى واللى بتختزن مغذيات الحديد فيها زيها زى الجبال الجليدية العملاقة وده السبب الرئيسى فى الجدل القائم حول ممارسات صيد الحيتان فى المنطقة دى.
المصدر
