بولك هو ترمومتر صحتك!
كتبت: يارا كمال
لما بتعيا، الدكتور أحيانًا يطلب منك تروح تعمل تحليل بول. يا ترى أنت تقدر تعمله لنفسك؟ أكيد ما تقدرش تعمل لنفسك تحليل لإن ده محتاج معمل، ده بافتراض إنك تقدر تعمل تحليل في معمل، لكن مجرد إنك تبص على لون البول بتاعك، ده ممكن يديك شوية انطباعات عن حالتك الصحية.
لون البول المثالي بيبقى زي لون القش بس على بهتان، وبيبقى رايق كده، بس لو لون البول شفاف أوي، ده معناه إنك بتشرب ميه كتير، وده ممكن يلخبط توازن المعادن اللي ليها شحنة كهربية في جسمك (زي الصوديوم والكالسيوم والبوتاسيوم). هو الطبيعي إن الجسم بينظّم مستوى الميه والصوديوم، بس لو البول شفاف أوي، وأنت بتخش الحمام للتبوّل ييجي 20 مرة في اليوم، فده معناه إنك بتشرب ميه كتير.
لون البول بيميل للأصفر بدرجاته، بس لما لونه بيكون غامق، ده معناه إن جسمك محتاج ميه. لما الميه تقل في جسمك، ده هيتعبه وهيتعب مخك.
الجفاف البسيط ممكن يحسسك بالإرهاق، وممكن تصدّع، وكمان الأداء الذهني بيتأثّر سلبًا، يعني الذاكرة قصيرة المدى بتتأثّر والقدرة على التركيز كمان في حاجة لأكتر من دقيقة أو دقيقتين، خصوصًا بالنسبة للرجالة.
المشكلة الجامدة بقى في البول اللي لونه محمر لإن ده ممكن يبقى علامة على سرطان في المثانة أو حصوة في الكلى، حتى لو مش حاسس بوجع. وممكن يبقى الموضوع مش أكتر من مجرد إنك أكلت بنجر أو راوند، بس لو مكنتش كلت حاجة منهم يبقى لازم تروح للدكتور.
أما لو البول لونه بني أو زي لون الشاي يبقى دي علامة على مشكلة في الكلى، وممكن يكون برضه من تأثير الفول. أما البول اللي لونه برتقاني، فده ممكن يكون علامة على حالة الكبد أو القناة الصفراوية (القناة اللي بتنقل المادة اللي في الكبد والمرارة للإثنى عشر).
بعض العلاجات والألوان اللي بتتحط في الأكل ممكن تخلي لون البول أخضر أو أزرق، وفيه مكملات غذائية بتخلي لون البول أصفر فاقع.
لو البول فيه رغوة أو فقاقيع كتير، فده ممكن يكون معناه إن أنت بتتناول بروتين كتير في أكلك. لو فضلت الرغاوي دي موجودة، فلازم تشوف دكتور لإن ممكن تكون فيه مشكلة في الكلى.
لو فيه غازات بتخرج من مجرى البول، فدي مشكلة. ده معناه إن فيه عضو تاني هو اللي مخلي ده يحصل في المثانة، زي مثلًا إن يبقى عند حد مرض اسمه ”التهاب الرتوج أو Diverticulitis“، وهو التهاب الأكياس الصغيرة اللي ممكن تتكوّن في بطانة الجهاز الهضمي، واللي في الغالب بتكون موجودة في القولون.
متابعتك لجسمك مهمة لصحتك. ماتسيبش عرض غريب يعدي عليك من غير اهتمام، بس مش لدرجة الوسوسة، يعني ممكن تقرى عنه أو تسأل دكتور عن الحاجة اللي أنت ملاحظها ومستغربها دي.
المصدر
