![](https://neonsciences.com/wp-content/uploads/2016/01/الموبايلات-وصراع-الساعة-البيولوجية.jpg)
الموبايلات وصراع الساعة البيولوجية!
كتبت: مها طه
”سيب الموبابل من إيدك، وإنت تعرف تنام“. واحدة من أشهر الجمل اللي بنسمعها من ماما كل يوم. الغريب إن معظمنا قبل ما ننام لازم نشوف آخر الأخبار كنوع من مرازية نفسنا، نتابع أصحابنا على الفيسبوك، أو حتى نلعب لعبة ما عبيطة مالهاش لزمة، المهم إنه بقى من طقوسنا إننا ندخل السرير ومعانا الموبايل.
وكلنا غالبًا بنقوم تانى يوم الصبح مش قادرين نفتح عينينا، ونحس إننا مش مرتاحين، ومحتاجين ننام تانى حتى لو كان عدد ساعات نومنا طبيعى!
مجموعة من الباحثين قرروا إنهم يكتشفوا هل فعلًا الأجهزة الإلكترونية – وبالذات الموبايل – لها علاقة باضطراب النوم؟ الإجابة كانت أيوه الموبايلات كانت سبب رئيسي من أسباب إضطرابات النوم اللى أغلبنا بيعانى منها.
طب إيه هى العلاقة ما بين الاتنين؟
الحقيقة إن السبب مش موبايلك فى حد ذاته لكن المشكلة إنك بتدخل السرير بموبايلك. لما بتدخل سريرك بعد يوم طويل بيكون ده الوقت اللي بتشتغل فيه ساعتك البيولوجية وهى الجزء المسئول في المخ عن تنظيم النوم، و اللى بيحفز إفراز هرمون ”الميلاتونين“، وده الهرمون اللى بيخليك تحس بالنُعاس، الهرمون ده بيتم إفرازه بناءًا على كمية الضوء اللى بتستقبلها العين وبعدين ترسلها للمخ، ولما الضوء بيقل بيبدأ إفراز الهرمون ده.
بالليل جسمك بيبدأ يفرز الهرمون ده لأن كمية الضوء بتقل، موبايلك بيصدر منه ضوء طبعًا، الضوء ده بيخلى مخك يقول لا ده مش وقت النوم، وبالتالى بيتوقف إفراز الميلاتونين. وعليه مهما تحدد لنفسك وقت معين تنام فيه، فجسمك مش هيستجيب وهتفضل على موبايلك لوقت أطول ممكن يمتد لساعات لحد ما فعليًا مخك يتعب تمامًا، فتضطر تنام.
الحقيقة إنك حتى لو نمت، فأنت نمت متأخر، وهتضطر تانى يوم تصحى فى ميعادك الطبيعى. في الحالة دي، جسمك كل يوم بيفقد عدد من الساعات اللى المفروض ينام ويرتاح فيها.
طب وإيه المشكلة لما نقل عدد ساعات نومنا الطبيعية كام ساعة؟
الباحثين وجدوا إن عدد ساعات النوم اليومية لازم تكون ما بين 7 لـ 9 ساعات، وده اللى بيخلى الخلايا العصبية الموجودة فى المخ _اللى بتشتغل طول اليوم_ ترتاح، كمان خلايا الغراء العصبى (ودي اللي بتقوم بالحفاظ على الخلايا العصبية الموجودة فى المخ من التلف لأنها بتقوم بتنظيفها، وإزالة السموم منها) لما بيقل عدد ساعات النوم، بتبدأ تتأثر ووظائفها تختل، الخلل ده ممكن ينتُج عنه ضعف فى الذاكرة، والإنتباه بالإضافة لضعف القدرة على التفكير السليم.
عدد ساعات النوم القليلة تؤثر بشكل كبير كمان على عملية التمثيل الغذائى فى جسمك، لأن طبيعة جسمك إختلت وعشان كده بتزيد شهيتك تجاه الأكل، وعملية الهضم بتتأثر، وطبيعي ساعتها إن وزنك يزيد. لو كل ده مش كافى بالنسبة لك فالحقيقة إن قلة عدد ساعات النوم كفيل بإنه يدمر خلايا المخ تمامًا.
عشان كل اللي فات ده حاول قبل ما تنام إنك تبعد عن موبايلك لمدة ساعة تهيئ فيها جسمك للنوم والراحة والحصول على القدر الكافى منهم.
المصادر: youtube scientificamerican ncbi wikipedia