اعرف إيه بيتغير في جسمك خلال 10 سنين؟

كتبت: مها طه

بقى لنا يومين دلوقتي والفيسبوك كله غرقان بكميات رهيبة من الصور في تحدي العشر سنين أو #10yearschallenge، طبعًا في ناس بقى شكلها أصغر وناس شكلها اتغير وناس زي ما هي كأن الزمن مش بيمر عليهم لكن على مين، كلنا وبلا أي استثناءات كبرنا خلال الـ10 سنين دول وجسمنا جسمنا كبر معانا وكمان حاجات كتير فيه اتغيرت عشان كده هنوريكم الجزء الخفي منكم اللي مش ممكن الكاميرات تجيبه أبدًا.

تغيرات الجسم على مدار 10 سنين.. يا ترى بيحصل إيه؟

1-الشعر:
شعرك اتغير خلال العشر سنين دول، ومش قصدنا خالص تسريحة شعرك، لكن الشعر في حد ذاته كخلايا، تخيل إن مفيش ولا شعراية من الموجودين في صورتك الجديدة كان موجود في الصورة القديمة، لأن كل شعر رأسك بيتبدل بالكامل بشعر ما بين كل 2 – 7 سنين. كل يوم بتتساقط مئات الشعرات وبيتجدد مكانها.

2-الأظافر:
ضوافر حضرتك بقى بتتجدد كليًا كل 6 شهور تقريبًا، بتطول وإنت بتقصها وترجع تطول وهكذا. ده معناه إن اللي كان المرة اللي فاتت عند منبت الظفر بقى هو الجزء اللي حضرتك بتقصه دلوقتي. شوف بقى في خلال عشر سنين ضوافرك اتغيرت كام مرة، تقريبًا كدة حوالي 20 مرة فرق ما بين الصورتين.

3-الجهاز الهضمي:
لو فاكر إن التغير ده حصل من بره وبس، نحب نقولك لأ، حتى جدار أمعاءك ومعدتك اتغيروا. تخيل إن جدار المعدة والأمعاء بيتعرض يوميًا لكميات من الأحماض والإنزيمات الهاضمة، وفي الآخر هو خلايا مصنوعة من البروتين، وبالتالي لازم تتجدد أول بأول عشان مايحصلش أي ضرر والأحماض والإنزيمات دي توصل للأنسجة الداخلية، ولذلك الخلايا دي بتتجدد تقريبًا كل 2 – 9 أيام.
يعني بتتغير بمعدل أكتر من 3 مرات في الشهر الواحد، احسب إنت بقى في عشر سنين ممكن تكون تجددت واتغيرت مئات المرات في الفترة دي.

4-البشرة:
طبعًا في صور البنات بالذات، اتضح الفرق ما بين دلوقتي ومن عشر سنين، بسبب ظهور الفيلر والكريمات اللي بالكولاجين وغيرها من منتجات تحسين صحة البشرة والمحافظة عليها، لكن خلينا نقول إن الطبقة الخارجية من جلد الجسم كله بتتبدل كل 2 – 4 أسابيع بشكل كامل، يعني في خلال العشر سنين دول ممكن تكون غيرت جلدك أكتر من 120 مرة.

5-خلايا الدم الحمراء:
كرات الدم الحمراء الموجودة في جسمك بتتغير تمامًا كل 4 شهور تقريبًا، مئات الملايين من خلايا الدم الحمراء الجديدة بيتم إنتاجها كل دقيقة، ومئات الملايين منها بتموت ويتم تدميرها والتخلص منها بشكل دوري. وبتيم استخدام المواد الناتجة عن تكسير الخلايا الميتة دي عشان تصبغ أماكن الكدمات والبول باللون الأصفر. لو افترضنا إن خلايا الدم الحمراء عندك بتتجدد كل 4 شهور، يبقى بحسبة بسيطة في خلال العشر سنين، خلايا اتبدلت تمامًا حوالي 30 مرة.

6-الهيكل العظمي:
كل 10 سنين تقريبًا هيكلك العظمي بيتغير بالكامل، يعني في الصورة القديمة حضرتك كنت بهيكل قديم تخلصت منه وده الجديد اللي هيشيلك لحد ما تعمل 20 years challenge وعليك خير. وده بيحصل عن طريق نوع خاص من الخلايا اللي بتشيل خلايا العظام القديمة، وخلايا تانية تبني الخلايا العظمية الجديدة، وده بيحصل على مدار 10 سنين.

7-العضلات:
كل 15 سنة عضلاتك الهيكلية (العضلات المتصلة بالهيكل العظمي) بتتغير ويحل محلها خلايا عضلية جديدة بالكامل. يعني أخيرًا نقدر نقول إن جزء من عضلاتك في الصورة القديمة غالبًا لسة معاك لحد دلوقتي.

8-الخلايا الدهنية:
كتير من الناس ظهرت في صورهم القديمة بوزن أقل من الحالي، وفي منهم اللي نجح يعمل العكس، لكن لو فاكر إن خلاياك الدهنية إنت فقدتها أو اكتسبتها، نحب نقولك مش حقيقي، كل الحكاية إنك سواء اكتسبت أو فقدت وزن، كل اللي حصل إن الخلايا الدهنية كبرت أو صغرت على حسب وزنك، وده لأنها غالبًا بتاخد حوالي 25 سنة عشان تتبدل أو تتجدد أو حتى تقل وتكتر. ولذلك الخلايا الدهنية هتفضل هي صديقتك لحوالي ربع قرن مهما عملت.

9-القلب:
لأن معدل تجدد خلايا القلب يعتبر بطئ جدًا؛ خلايا قلبك بالذات تعتبر من الخلايا الوفية جدًا ليك، حوالي نصها بيفضل معاك طول حياتك من يوم ما تتولد لحد ما تموت.

10-المخ:
معظم الخلايا العصبية والأعصاب الموجودة في المخ بتكون مولودة معاك، وتم تكوينها قبل ولادة حضرتك، وعدد قليل أوي هو اللي بيتوجد باقي مدة حياتك، لكن اللي بيتغير جوا مخك باستمرار هو الاتصال العصبي بين الخلايا عشان يكون الذكريات في المخ. وعشان كدة غالبًا ممكن تبقى مش فاكر مين اللي أخد لك الصورة اللي من عشر سنين دي أصلًا، إلا لو هي ذكرى مهمة مازال مخك محتفظ بيها.

11-العين:
تحديدًا عدسة العين، دي الحاجة اللي بتفضل معاك من يوم ما تتولد لحد ما تموت من غير ما تتغير تقريبًا، ومش بس من يوم ما تتولد، دي في أثناء التكوين الجنيني لحضرتك، بتبدأ تتجمع بروتينات شفافة في المنطقة اللي المفروض هتكون العين بعد الولادة، وحتى بعد الولادة بتفضل البروتينات والألياف دي تتجمع لحد ما تكون العدسة اللي حضرتك شايف العالم كله من خلالها دلوقتي، واللي شفت بيها صورتك القديمة والجديدة.