الطريقة الأمثل لشحن بطارية الموبايل من وجهة نظر العلم!
كتبت: مها طـه
أول سمارت فون جبته في حياتي، كان زي الفل، وبمجرد ما عدى عليه 6 أو 7 شهور، تحولت لكائن ماشي طول الوقت بالشاحن في الشنطة، وبيدور على مكان يشتري منه باور بنك نضيف عشان الموبايل اللي بقى من المستحيل إنه يكمل 5 أو 6 ساعات على بعض مشحون، وبعدين عرفت إن دي مش مشكلتي لوحدي دي مشكلة عند ناس غيري كتير.
وللأسف أغلبنا برضه كان فاكر إن السبب في ده هو إن موبايلاتنا من ماركة معينة أو إن البطاريات نوعها ردئ أو غيره، لكن الحقيقة إننا السبب في اللي بيحصل ده، لأننا وبمنتهى البساطة بنشحن الموبايلات غلط من الأصل!
بطارية الموبايل بتموت؟.. للأسف إنت السبب
معظمنا فاكر إننا لو شحنا الموبايل لمدد قصيرة متقطعة، فده معناه إن البطارية على المدى الطويل هتبوظ ونعاني منها، وإنه من الاحسن إننا نستنى لحد ما الموبايل بطاريته تجيب جاز وتوصل لأقل من 10% وبعدين نفكر نشحنه، خليني أصدمكم وأصدم نفسي للأسف إن ده من أكبر الأخطاء اللي بنعملها!
في الواقع في جزء من من شركة البطاريات ”كاديكس“ والمُسمى بـBattery University أو جامعة البطارية، شرحوا تفاصيل عن حساسية بطاريات الليثيوم الموجودة في الموبايلات تجاه حالات الـ”الضغط“ يعني زيها زينا بالظبط. الضغط ممكن يكون مُدمر لعمر البطارية نفسه على المدى الطويل. فلو عاوز تحافظ على بطارية موبايلك إنها تفضل معاك اليوم كله من غير ما تقلق كمان على عُمر البطارية نفسها، كل ما عليك إنك تتبع النصايح دي ، وتغير من سلوكك تجاه بطارية الموبايل وطريقة شحنك ليها.
1- شيله من الشاحن أول ما يخلص شحن
أهو ده بالذات من أكتر الحاجات اللي مش بناخد بالنا منها، وفقًا لجامعة البطارية، فكرة إنك تسيب الموبايل في الشاحن وتقوم تنام مثلًا فهو يخلص شحن ويفضل طول الليل في الشاحن وتشيله منه لما تصحى الصبح مُضر بالبطارية ومؤذي على المدى الطويل.
اللي بيحصل لما الموبايل بيوصل لـ100%، وفي نفس الوقت بيفضل في الشاحن، إنه بيفضل ياخد شحنات صغيرة عشان يحافظ على وضع الـ100%، وده اللي بيخلي البطارية في حالة من الضغط و”التوتر“ العالي، اللي بيؤدي لإنهاك كيميائي للبطارية. بالظبط زي فكرة إنك كإنسان تفضل تجري في تراك لمدة ساعتين، بعدها طبعًا لازم ترتاح وتخلي العضلات ترجع تتنفس وتتعافى عشان تقدر بكرة كمان تجري وتمشي.
2- حاول أصلًا ماتخليش الموبايل يشحن لـ100%
تحديدًا الموضوع ده بالذات من ضمن النصايح اللي بتتقال لأي حد مع النصيحة بإنك متشحنوش غير وهو خلاص بيجيب أخره، تخيل إن ده كمان غلط، لأن بطاريات الليثيوم-أيون مش محتاجة أصلًا إنها تبقى مشحونة بشكل كامل، ولا كمان من المُفضل إنها تبقى كده، والسبب ورا ده إن الجهد العالي على البطارية بيتلف البطارية على المدى الطويل.
طبعًا ده ممكن يكون مش مناسب مع الأشخاص اللي بيفضلوا لوقت طويل بعيد عن البيت أو الاماكن اللي ممكن يشحنوا فيها الموبايل، عمومًا لو اضطريت بس إشحنه للأخر، غير كدة حاول بس تخليه في مرحلة الأمان بالنسبة لك وبلاش تتقل على البطارية.
3- اشحن الموبايل كل ما تقدر
اتضح كده من الكلام ده إن البطاريات بتكون في حالة أفضل لما يتم شحنها على فترات طول النهار بدل ما نشحنهم لمدة طويلة لما تبقى قربت تفصل. يعني إشحن تليفونك كل ما يفقد 10% من شحنه، وهي دي أفضل حالة، وفقًا لجامعة البطارية، السيناريو ده طبعًا ممكن يكون غير مناسب لناس كتير، وعشان كدة النصيحة هي إنك تحاول تحط التليفون في الشاحن كل ما تقدر ومن غير ما تستنى يفصل أصلًا.
الطريقة دي مش بس هتحافظ على أداء أطول وأمثل للبطارية، لكنها كمان هتحافظ على كفاءتها على طول اليوم، وعشان كدهمن الأفضل إنك تحط الموبايل وتشيله من الشاحن كذا مرة على مدار اليوم كله. بالإضافة بقى لكل ده فالدورات المستمرة من الصعود والهبوط بتسمح باستخدام التطبيقات ومميزات الموبايل اللي في العادي مش بتستخدمها عشان بتسحب من الشحن بشكل كبير، زي التطبيقات اللي بتستخدم الـGPS، والألعاب.
4- حافظ على درجة حرارة البطارية
بطاريات الهواتف الذكية حساسة جدًا للحرارة، لدرجة إن شركة ”آبل“ نفسها بتنصح بإزالة أي عوازل للحرارة من على أجهزة الآيفون في أثناء الشحن، بمعنى تاني لو حسيت إن الموبايل بيسخن وقت الشحن، شيله من الجراب بتاعه الأول، ولو كنت خارج في وقت الظهر والجو حر أوي، حاول تخلي الموبايل متغطي بشكل يحافظ عليه وعلى صحة البطارية من التلف بسبب الحرارة.
المصادر:
